2
Sa Vinaravara te Hana
1 Varavara guahe se Hana:* Lk 1:46-55
“Ele va siṉi nia qinetuqetu e Zihova sa buloqu;
va ṉiṉira au Sa si rau koa gua sapu ele taveti Sa!
Hegere ni rau sari na qua kana;
qetuqetu hola si rau sina ele toka nau sa Tamasa.
2 Loke tie si hopena na toṉoto kekeṉoṉo gua e Zihova;
loke tie si kekeṉoṉo gua Asa,
loke Patu aqoroana sapu kekeṉoṉo gua sa nada Tamasa.
3 Mamu beto zama vahesi pule Nigo,
mamu lopu zama ni sari na mua zinama vinahesi pule.
Ura e Zihova si na Tamasa gilagilana,
meke vilasi Sa sari doduru gua pu evaṉi ri na tie.
4 Sari na bokala tadi na tie varipera ṉiṉiradi si ele ta moku beto,
ba saripu malohorodi tu si ṉiṉira.
5 Sari na tinoni pu ta poni valeana ginani tatasana,
si tavetavete mo kamahire meke vagi ginani,
ba saripu oviadi si lopu hite ovia pule.
Sa barikaleqe tigena si ele podoi sa ka zuapa tuna,
ba sa barikaleqe sapu soku tuna si namu murimuri taloa beto tu.
6 E Zihova si va mate meke va toa pule tie;
garunu lani Sa pa popoa tadi na tie matedi sari na tinoni,
meke turaṉa pule ni Sa si arini.
7 Hoke va habahuala i Sa si kaiqa tie meke va tagotago i Sa si kaiqa.
Va pepekae i Sa si kaiqa, meke ovulu sage ni Sa si kaiqa.
8 Va tekulu pule i Sa sari na tie habahuala pa korapa kavuru,
meke ovulu sage ni Sa saripu habahuala sisigiti koari na dia minalaṉa.
Va baere ni koburu tavia Sa si arini;
meke va lavati Sa si arini.
Sa sinokiraena sa pepeso si va podaki e Zihova;
koa rini si kuri ia Zihova sa kasia popoa.
9 Kopu totoko ni Sa sari na tie raṉeraṉe pa dia tinoa,
ba sarini pu va guguedi si taluara palae pa hinuporo,
sina lopu boka koa mataqara si keke tie pa nana ṉiniraṉira soti.
10 Sari na kana te Zihova si kaqu tava mate beto;
kaqu velavela gore mae guana paka maṉauru si Asa koa rini.
Kaqu varipitui nia e Zihova sa doduruna sa kasia popoa;
kaqu ponia ṉiniraṉira Sa sa Nana baṉara.
Kaqu va mataqaria Sa sa Nana baṉara ta vizatana.”
11 Meke tiqe pule la pa nana popoa soti pa Rama se Elikana, ba sa koreo se Samuela si koa hola tu pa Saelo, meke nabulu nia sa se Zihova pa tinokae te Ilai sa hiama.
Sari na Tuna Ilai
12 Sari na tuna e Ilai si namu kaleadi hola. Lopu hiva va avoso la ia rini se Zihova, 13 babe kopu ni sari na tinarae gua sapu kaqu tavetia sa hiama koari na tie. Be guana korapa va vukivukihi nana si keke tie, si hoke mae sa nabulu tanisa hiama, palekia sa si keke poka sapu ka ṉeta livolivona sipu korapa ta raro sa miti, 14 meke hoke suni la nia sa sa nana poka pa korapa raro, meke gua sapu vagi vura ni sa poka si tanisa hiama tugo si arini. Sari doduru tie Izireli pu mae pa Saelo pude va vukivukihi gua, si hoke ta tavete gua la mo asa. 15 Meke gua pule he: sipu lopu ele ta magu paqaha sa deana pude ta sulu va vukivukihi la koe Zihova, gua, ba hoke mae sa nabulu tanisa hiama meke zama koa sa tie pu korapa va vukivukihi, “Mu poni au kaiqa miti pude telena sa hiama raroi; lopu kaqu hiva ni sa sari na miti pu ele ta rarodi, ba na miti makatadi tu, gua.”
16 Be olaṉa guahe sa tie, “Mada tavetia gua sapu toṉoto, mada sulu kenu pania sa deana, beto mamu tiqe vagia gua sapu hiva nia goi.” Ba hoke zama tu sa nabulu tanisa hiama, “Lokari! Mamu va maea tugo kamahire! Be lopu gua goi, si kote atu saputu vagi mo rau si arini!”
17 Sa sinea tadi na tuna Ilai hire si kaleana sisigiti pa dinoṉo te Tamasa, sina loke dia pinamaṉa koa sa vinariponi la koe Zihova.
Samuela pa Saelo
18 Pa totoso hie si podalae nabulu nia sa koreo Samuela se Zihova. Va sagea sa si keke poko hiama hopena. 19 Hopeke vuaheni si hoke piti ponia sa tinana si keke poko doduru hite tanisa meke paleke la nia sa sipu luli koasa loana, pude la va vukivukihi nia sa vina vukivukihi sapu hoke ta tavete pa hopeke vuaheni. 20 Meke hoke mana nia Ilai se Elikana meke sa nana barikaleqe, meke zama koe Elikana, “Mani ponigo e Zihova kaiqa koburu pule koasa barikaleqe hie pude na hinobena sa koburu sapu va madi la nia goi koa Sa.” Sipu hola sapu gua asa si pule la pa dia vasileana soti si arini.
21 Mana nia e Zihova se Hana, ke podoi pule sa si ka ṉeta tuna koreo meke karua tuna vineki. Noma sage meke nabulu nia sa koreo Samuela se Zihova pa vetu hopena.
Ilai meke sari na Tuna Koreo
22 Namu barogoso nopele kamahire se Ilai. Ele avoso betoi tu sa sari doduru hahanana pu taveti rina tuna koari na tie Izireli; hoke puta turaṉi tugo rini sari na barikaleqe pu tavetavete pa sasadana sa vetu Hope pa kenuna Zihova. 23 Ke zama si asa koa rini, “Na vegua ke evaṉi gamu sari na hahanana gua arini? Doduru tie mo tozi nau guguadi sari na hahanana kaleadi pu taveti gamu. 24 Mi noso, ba karu tuqu! Hie si keke hahanana lopu leana sisigiti sapu korapa zama nia ri na tinoni te Zihova! 25 Be guana va sea la koa keke tie si keke tie, si kote toka nia Tamasa si asa; ba esei kote boka lavelave hukata nia sa tie sapu tavete va sea la koe Zihova?” Ba lopu hiva va avosia ri karua sa tamadia, sina ele balabala ia tu Tamasa pude va matei sarini.
26 Noma sage sa koreo Samuela* Sa ginuana sa pozana Samuela si “Sa pozana Sa si El. El sina zinama papakana koasa pozana Elohim. Sa ginuana Elohim si na Tamasa.” meke ta qetue koe Zihova meke koari na tie.* Lk 2:52
Sa Kinorokorotae Lagua koasa Tatamana te Ilai
27 Keke poropita si mae koe Ilai na paleke mae nia sa sa inavoso hie te Zihova: “Sipu koa tava pinausu se Eroni sa tiatamamu meke sari na nana tatamana koa sa baṉara pa Izipi, si va vura pule Nau Telequ si Rau koe Eroni. 28 Koari doduru butubutu pa Izireli si ele vizatia Rau sa nana puku tatamana pude na Qua hiama, pude tavetavete koasa hope, pude va uqua sa vina uququ, meke pude poko nia sa poko tana hiama pude zama mae koa Arau. Meke Arau poni nia sa vina malumu pude kopu nia si keke kukuruna sa vina vukivukihi sapu tava uquna koa sa hope.* Ekd 28:1-4; Liv 7:35-36 29 Na vegua, ke doṉo okoro ni tu gamu pa pinuhi sari na vina vukivukihi na vinariponi saripu okoro ni Rau koa ri na Qua tie? Ilai, na vegua ke va lavata hola i goi sari na tumu hola nau si Arau, meke va malumi tu goi pude va noboko pule ni koari na kukuru ginani leadi saripu va maei ri na tinoni koa Rau?
30 Arau Zihova, sa Tamasa tadi pa Izireli, sapu ele va tatara nia pukerane sapu sa mua tatamana meke na mua butubutu si kaqu nabulu Nau guari na hiama doduru totoso. Ba, kamahire zama si Rau sapu hobea Rau sa Qua zinama! Kaqu va lavati Rau saripu va lavatau si Arau, meke kaqu kilui Rau si arini pu va gugue mae koa Rau. 31 Mu avoso mae, korapa mae sa totoso pana kaqu va mate betoi Rau sari doduru koreo vaqura pa mua tatamana na mua butubutu, ke loketoṉa tie pa tutimu goi si kaqu koa hola kamoa barogoso. 32 Kaqu koa tasuna si agoi meke kaqu okoro ni goi sari doduru minana sapu kaqu vala ni Rau koari votiki tie Izireli, ba loke tie pa mua butubutu si kaqu toa kamoa barogoso. 33 Ba kaqu va toaia Rau si keke tie koasa tutimu pude na hiama meke nabulu nau si Arau. Ba kaqu behu si asa meke malohoro pa rinaṉeraṉe meke sari doduru votiki tie pa tutimu si kaqu mate pa vinaripera.
34 Pana mate beto sari karua tumu koreo sari Hopini meke e Pinehasi koasa rane tugo asa, si kaqu vata dogoro nigo sapu sari doduru tiṉitoṉa pu ele zama ni Rau si kaqu gorevura beto.* 1 Samuela 4:11 35 Kaqu vizatia Rau si keke hiama sapu kaqu nabulu zoṉazoṉa Nau meke taveti sari na tinavete saripu hiva ni Rau pude taveti sa. Kaqu va malumi Rau sari na tutina pude nabulu nia sa baṉara ta vizatana doduru totoso. 36 Kaiqa ri na tutimu goi pu toa si kaqu la koa sa hiama sana meke tepa poata na ginani, meke pude tava malumu pude toka ni sari na hiama, pude boka vagi kaiqa toṉa pude hena gua.”
*2:26 Sa ginuana sa pozana Samuela si “Sa pozana Sa si El. El sina zinama papakana koasa pozana Elohim. Sa ginuana Elohim si na Tamasa.”