1 Zama se Samuela koe Saula, “Arau mo sa tie sapu garunu au Zihova pude va madigo meke va baṉara igo koari Nana tie. Ego mamu va avosia gua sapu zama nia e Zihova Tadi na Qeto Minate,*1 Samuela 10:1 2 ‘Kaqu va kilasi Rau sari na tie Amaleki d koa gua sapu tavetia rina tiatamadia koari na tie Izireli, pa totoso sipu mae gua ri pa Izipi.*Ekd 17:8-14; Diut 25:17-19 3 La mamu rapata i sari na tie Amaleki, mamu zalo beto i sari doduru gua pu tagoi rini. Lopu veko hokaria keke, ba va mate betoi doduru tie, na barikaleqe, koburu, na haha, na bulumakao, sipi, kameli, meke na doṉ'ki,’ ” gua.

4 Tioko varigara ni Saula sari nana tie varipera meke viliti sa si arini pa Telemi; koadia karua gogoto tina tie varipera pa Izireli meke manege puta tina pa Ziuda. 5 Asa meke sari nana tie si la koasa vasileana nomana tadi na Amaleki meke aqa pa keke lolomo loke kolona pude rapata va hodaka gua. 6 Garunu la nia sa sa vina balau koari na tie Kenaiti. Sari na tiatamadia si tataru ni sari na tie Izireli sipu mae gua pa Izipi si arini. Meke zama si asa, “Mi taloa, mamu veko pani sari na tie Amaleki pude mi lopu tava mate turaṉae koa rini.” Ke taluarae taloa sari na tie Kenaiti.

7 Va kilasi Saula sari na tie Amaleki. Varipera si arini podalae pa doduruna sa vasina pa Havila meke kamo pa Sura sapu pa kali gasa rimata pa Izipi. 8 Va mate betoi rini sari doduru tinoni, 9 ba va sarea Saula meke sari nana tie varipera se Aqaqa sa baṉara. Lopu va matei rini sari na bulumakao na sipi leadi, na tuna bulumakao, na tuna sipi tugo, meke gua tugo kaiqa tiṉitoṉa leadi, ba sari na tiṉitoṉa pu loke laedi, na loke dia tinavete si zalao betoi rini.

10 Zama se Zihova koe Samuela, 11 “Talotaṉa si Rau koa gua sapu va baṉaria Rau se Saula, sina ele kilu pani Au sa si Rau meke sekei sa sari na Qua tinarae.” Ta ṉaziri hola se Samuela meke doduru boṉi si varavara la koe Tamasa si asa. 12 Pana munumunu hokara tugo si topue si asa, meke la hata ia sa se Saula. Avoso nia sa sapu ele la si asa koasa vasileana pa Kameli gua, vasina pu ele kuria sa si keke nana vina tigono telena, meke hola la nana tu pa Qiliqali. 13 Ene sage la se Samuela koe Saula, meke va kamoa sa si asa, meke zama, “Mani mana nigo e Zihova si goi Samuela! Ele va tabea rau sa hiniva te Tamasa.”

14 Nanasa se Samuela, “Na vegua, ke, korapa avosi tu rau kabodi sari na bulumakao na sipi?”

15 Olaṉa se Saula, “Sari na qua tie vagi si arini koa rina tie Amaleki. Va toai rini sari na sipi na bulumakao leadi pude tana vina vukivukihi la koe Zihova sa mua Tamasa, ba sari doduru pule si ele zalo betoi gami.”

16 “Noso!” gua se Samuela, “Maqu tozi nigo gua sapu tozi nau e Zihova pana boṉi.”

“Tozi nau,” gua se Saula.

17 Olaṉa se Samuela, “Balabala pule nigo telemu sapu loke laemu gua si goi, ba agoi si na koimata pa butubutu Izireli. Ele va madigo e Zihova si agoi pude na baṉara pa Izireli, 18 meke garunigo Sa si goi pude zalo pani sari na tie kaleadi pa butubutu Amaleki. Ele tozi nigo Sa pude mu varipera la osolae va mate betoi goi si arini. 19 Na vegua ke lopu va tabea goi si Asa? Na vegua ke bebeno vagi tu goi sari na tiṉitoṉa, meke evaṉia sa sinea nomana sapu lopu qetu nia e Zihova?”

20 “Lokari, ele va tabea mo rau se Zihova,” gua se Saula. “Ele lulia mo rau gua sapu tozi nau Sa. Turaṉa pule mae nia rau sa baṉara Aqaqa, meke va mate betoi sari doduru tie Amaleki. 21 Lopu va matei ri na qua tie sari na sipi na bulumakao pu leadi, ba turaṉa mae ni rini tani pa Qiliqali pude va vukivukihi lani koe Zihova sa mua Tamasa.”

22 Ba zama se Samuela, “Na sa si okoro nia e Zihova, na vinatabe babe na vinariponi na vina vukivukihi? Leana hola si pude va tabea si Asa hola nia sa vina vukivukihidi rina sipi leadi koa Sa. 23 Na vina karina Sa si kaleana hola kekeṉoṉo gua puta tugo na vinakuvakutae; meke na vinahesi pule si sea hola gua tugo na vinahesi beku. Kilugo tugo Sa si goi pude na baṉara, sina sekea goi sa hiniva te Zihova.”

24 “Uve, ele sea tugo si rau,” gua se Saula. “Ele sekea rau sa hiniva te Zihova meke sari na mua zinama. Na matagutu ni rau sari na qua tie meke lulia mo gua sapu hiva nia rini. 25 Ba tepa igo rau kamahire, mu taleoso nau. Mada pule la pa Qiliqali, pude boka vahesia rau se Zihova vasina.”

26 “Lopu kaqu luli pule koa goi si rau,” gua se Samuela. “Kilua goi sa hiniva te Zihova, ke kiluigo tugo Sa si goi pude na baṉara pa Izireli.”

27 Meke taliri se Samuela pude taluarae taloa gua, ba tuqe vagia Saula sa nana poko meke rikatia sa.*1 Samuela 28:17; 1 Baṉ 11:30-31

28 Meke zama se Samuela koa sa, “Ele rikata pania Zihova koa goi sa binaṉara pa Izireli pa rane hie meke vala nia Sa koa keke pu leana hola nigo. 29 Se Zihova sa Tamasa Lavata pa Izireli si lopu kokoha meke lopu hobe sa Nana binalabala. Lopu na tie si asa, ke lopu hobea Sa sa Nana hiniva.”

30 “Ele sea mo si rau,” gua se Saula. “Ba mamu va lavatau mo pa kenudi rina tie tuturaṉa koari na qua tinoni. Mamu luli pule somanae koa rau pude maqu vahesia rau se Zihova sa mua Tamasa.” 31 Ke luli la koa sa pa Qiliqali se Samuela, meke vahesia Saula se Zihova.

32 “Turaṉa mae nia koa rau sa baṉara Aqaqa,” gua se Samuela. Mae koa sa se Aqaqa, neneqara mate na matagutu. Balabala golomo telena si asa, “Kei, ele hola taloa tugo sa totoso kaleana pude mate si rau,” gua.

33 Zama se Samuela, “Gua sapu ele va matei sa mua vedara sari soku koburu tadi na barikaleqe, ke kamahire si kaqu loke tuna tugo sa tinamu.” Meke va matea sa se Aqaqa pa kenuna sa hope pa Qiliqali.

34 Pule la nana pa Rama se Samuela, meke pule pa nana vasileana soti pa Qibea se Saula. 35 Podalae pa totoso asa si lopu hite dogoro pule hokaria se Samuela sa baṉara, ba kuliusu nia sa si asa. Talotaṉa nia tugo Zihova sapu va baṉaria Sa se Saula pa butubutu Izireli.