1 Vegua, balabala ia gamu sapu guana podalae vahesi puleni gami pule si gami? Babe gua ri kaiqa tie si gami, sapu hiva pude gamu kote va lavata gami pa mia leta la koari na votiki tie pude di va kamo gami, babe arini si kubere atu koa gamu pude mi va kamo gami, gua? 2 Lokari, gamu mo si nada leta sapu ta kubere pa buloda, pude gilania meke tiroa ri doduru tie. 3 Bakala mo koasa mia tinoa vaqura, sapu gamu si va hinokaria sa Inavoso Leana sapu tozia gami koa gamu. Gua asa, ke gua na leta te Karisito si gamu. Lopu ta kubere iqi si asa, ba koa sa Maqomaqona sa Tamasa toana. Lopu ta kubere pa patu labelabe, ba pa bulo tie.*Ekd 24:12; Zer 31:33; Izk 11:19, 36:26

4 Zama gua asa si gami, sina gilana valeania gami sapu hie mo sa vina sosode, sapu gami sina nabulu te Karisito pu ta garunu koe Tamasa. 5 Loke mami binokaboka soti si gami pude tavetia sa tinavete hie. Sa binokaboka sapu tagoa gami, si maena mo koe Tamasa. 6 E Tamasa telena si va boka gami pude nabulu nia si Asa koasa vinariva egoi vaqura, sapu lopu tanisa Tinarae ta kuberena koe Mosese, ba sapu tanisa Maqomaqo Hope tu. Sa Tinarae ta kuberena si evaṉia sa minate koari na tie pu lopu va tabea si asa, ba sa Maqomaqo Hope si ponini gita sa tinoa.*Zer 31:31

7 Totoso ta kubere pa patu labelabe sa Tinarae te Mosese, si bakala vura sa ṉinedala te Tamasa. Meke totoso korapa murimuri taloa sa ṉinedala pa isumatana e Mosese, ba lopu boka doṉo la ia tugo ri na tie Izireli si asa. Sina ele vura mae sa ṉinedala tolavaena te Tamasa totoso ta kubere sa Vinariva Egoi Koana sapu evaṉia sa minate,*Ekd 34:29 8 ke kaqu noma hola latu sa tinoa tolavaena tamigami sapu vura mae totoso tozi vura nia gami sa Inavoso Leana tanisa Vinariva Egoi Vaqura sapu poni gita sa Maqomaqo Hope. 9 Sa tie sapu va mae ia sa Vinariva Egoi koana pu tozia sa tinazutu sapu la gua pa minate, si tolavaena sa ṉinedalana sa isumatana, gua asa ke tolavaena hola la tu sa tinoa vaqura tanisa sa tie pu va mae ia sa Inavoso Leana sapu va toṉoti sari na tie koe Tamasa. 10 Ura sa tinolava kamahire si bakala sisigiti hola nia sa ṉinedala tolavaena pukerane, ke boka zama si gita sapu ele murimuri taloa sa tinolava koana, gua. 11 Be sa Tinarae koana sapu lopu koa seunae ba koa ia na tinolava, si sa tinoa vaqura sapu koa hola ninae rane, si kaqu tolavaena hola la tu.

12 Gua asa, ke varane si gami, sina rove va hinokaria gami sapu kaqu vagia gami sa tinoa tolavaena. 13 Gami si lopu kekeṉoṉo e Mosese sapu goba hukatia sa sa isumatana, pude madi lopu dogoria ri na tie Izireli sa minurimuri taloana sa ṉinedala koa sa.*Ekd 34:33 14 Ba tava pupuhu sari na binalabala tadi na tie Izireli, osolae kamo pa rane ṉinoroi. Ura lopu boka gilania rini sa hinokara totoso tiroa rini sa Vinariva Egoi Koana te Tamasa. Kekeṉoṉo gua na poko sapu va paere ia sa isumatana Mosese, si korapa tava paere tugo sari na isumatadia. Ba pana soto mo sa dia rinaṉeraṉe koe Karisito, si kote tava rizu palae sa poko pa isumatadia. 15 Kamoa kamahire, totoso tiroa rini sa Tinarae te Mosese, ba korapa va paere ia na poko sa bulodia koasa hinokara. 16 Ba pana soto mo sa rinaṉeraṉe tanisa tie koasa Baṉara, si kaqu tava rizu palae sa poko asa.*Ekd 34:34 17 Ego, sa zinama “Baṉara” koasa vesi asa, ginuana si sa Maqomaqona sa Tamasa, meke sarini pu vagia sa Maqomaqona sa Tamasa, si vagia tugo sa tinarupaha. 18 Gita doduru si vata dogoro nia pa nada tinoa sa tinoa tolavaena tanisa Baṉara, meke lopu ta nobi gua e Mosese sari isumatada. Meke korapa ta hobe si gita, pude keha lulia sa kinehana sa Baṉara, meke toqolo gigiri hola latu sa tinoa tolavaena sapu koa koa gita. Meke sa tinoa tolavaena asa si mae guana koasa Baṉara, sapu sa Maqomaqona sa Tamasa.