1 Pa vina rua vuaheni koasa binaṉara te Zehoasi sa baṉara pa Izireli sapu sa tuna koreo e Zehoehazi, si tava baṉara pa Ziuda se Amazaea sa tuna koreo e Zoasi. 2 Hiokona lima vuahenina totoso tava baṉara si asa, meke koa baṉara si asa pa Zerusalema ka hiokona sia vuaheni. Sa tinana sa si e Zehoadina, mae guana pa popoa Zerusalema. 3 Taveti sa gua sapu toṉoto pa dinoṉo te Zihova, ba lopu gugua e Devita, sa tamana kenuna; taveti tu sa saripu gua tavetaveti e Zoasi sa tamana. 4 Lopu huara gore ni sa sari na vasidi tana vinahesi tomate koari na toqere, ke sari na tie si lamo sa vina vukivukihi na va uququ oto huda humaṉa lea koa rina vasidi arini.

5 Sipu ele turu va nabu pa nana ṉiniraṉira se Amazaea koasa binaṉara, si va matei sa sari na koimata saripu va matena sa tamana, sapu sa baṉara, 6 ba lopu va matei sa sari na tudia. Lulia mo sa gua sapu zama nia e Zihova koasa Tinarae te Mosese, “Sari na tiatamadia rina koburu si lopu kaqu tava mate koari na sinea tadi na tudia meke sari na tudia ba lopu kaqu tava mate koari na sinea tadi na tiatamadia. Ba hopeke tie si kaqu tava mate koari nana sinea sapu tavete sotia sa telena.”*Diut 24:16

7 Va matei e Amazaea si ka manege puta tina tie varipera pa Edomu koasa Lolomo Soloti; tuqe vagia sa pa vinaripera sa vasileana lavata pa Sela meke poza nia Zokohili, korapa asa tugo si ta pozae nia sa kamahire.

8 Meke garunu la tie palepaleke inavoso se Amazaea koe Zehoasi sa baṉara pa Izireli, tepatepa ia sa pude varipera. 9 Ba garunu pule la nia Zehoasi sa baṉara sa inolaṉa hie: “Keke huda rakihi pa toqere Lebanoni si garunu la inavoso koa keke huda sida pa Lebanoni meke zama, ‘Va haba nia sa tumu vineki koasa tuqu koreo,’ gua. Meke ene hola si keke kurukuru pinomo meke neti va ṉozo gore nia sa huda rakihi asa. 10 Ego, Amazaea, ele va kilasi goi sari na tie pa Edomu, meke ta siṉie vinahesi pule si goi. Mamu qetu nia mo sa mua inavoso leana asa, mamu koa mo pa mua vetu. Na venagua ke hata tinasuna sapu kote va kaleana pule nigo si goi meke sari na mua tie pa Ziuda?”

11 Ba korona va avosia Amazaea si asa, ke vura la raza ia e Zehoasi sa baṉara pa Izireli meke sari nana tie, meke pa Beti Semesi pa Ziuda si vari tia i sari karua. 12 Tava kilasa sa qeto minate te Amazaea, meke govete pule pa dia vetu si arini. 13 Vagia meke pusia e Zehoasi se Amazaea. Beto asa si hola la pa Zerusalema, meke huara gore nia sa sa gobana sa vasileana lavata pa Zerusalema podalae pa sasada ta pozae Iparemi kamo koasa sasada bara ta pozae na Sasada iio, pada karua gogoto mita gelena si asa. 14 Vagi betoi sa sari na siliva na qolo saripu boka dogori sa, sari doduru likakalae tana Zelepade meke sari doduru tinagotago tanisa vetu baṉara, meke paleke pule lani sa pa Sameria. Turaṉi tugo sa si kaiqa tie ta pusidi.

15 Doduru pule saripu evaṉi e Zehoasi, somanae la sari nana vina rane pa vinaripera la koe baṉara Amazaea pa Ziuda, si ta kubere koasa Buka Tinozi tadi na Baṉara Izireli. 16 Mate meke ta pomunae koasa popomunuana baṉara pa Sameria se Zehoasi, meke e Zeroboami vina rua sa tuna koreo sa si baṉara hobea sa si asa.

17 Mudina sa minate te Zehoasi sa baṉara pa Izireli si toa hola la tu sa baṉara Amazaea ka manege lima vuaheni pa Ziuda. 18 Doduru ginugua pule saripu taveti e Amazaea si ta kubere koasa Buka Tinozi tadi na Baṉara pa Ziuda.

19 Kuhana nia rina tie pa Zerusalema pude va matea se Amazaea, ke govete la si asa koasa vasileana lavata pa Lakisi, ba luli la ia tugo ri nana kana meke va matea vasina. 20 Ta suraṉa pule pa hose sa tomatena meke ta pomunae koasa popomunuana baṉara koasa vasileana lavata te Devita. 21 Beto si va hake nia toropae baṉara rina tie pa Ziuda se Uzaea sa tuna koreo sapu manege onomo vuahenina pude na baṉara. 22 Mudina sa minate tanisa tamana si la raza ia e Uzaea meke vagi pulea si pa Elati meke kuri pulea sa sa vasileana asa.

23 Pa vina manege lima vuahenina sa binaṉara te Amazaea sa tuna koreo e Zoasi sa baṉara pa Ziuda, si tava baṉara pa Izireli se Zeroboami vina rua sa tuna koreo e Zehoasi, meke koa baṉara ka made ṉavulu eke vuaheni pa Sameria si asa. 24 Tavete va kaleana pa kenuna e Zihova si asa, lulia sa sa hahanana te Zeroboami sa tuna koreo e Nebati, sapu turaṉa lani sari na tie Izireli pa sinea koari na vinahesi beku. 25 Asa la raza i meke vagi pule ni sari doduru popoa pu tagoi Izireli tatasana meke va toṉoto pule ia sa sa voloso te Izireli, podalae koasa karovoana pa toqere sapu ta poza Hamati kamo la gua koasa kolo matena. Hiera gua sapu ele va tatara nia e Zihova, sa Tamasa pa Izireli, koasa poropita Zona sa nana nabulu, sapu sa tuna koreo e Amitai pa Qati Hepa.*Zna 1:1

26 Dogoria e Zihova sa tina sigiti lavata tadi doduru tie Izireli; loke tie hokara boka tokani. 27 Ba lopu Nana hiniva e Zihova pude huara pani hokara nia sa popoa Izireli, ke tavetavete nia Sa se Zeroboami vina rua sa baṉara, pude harupi sari pa Izireli.

28 Doduru pule saripu taveti e Zeroboami vina rua, sari nana vinarane pa vinaripera, meke sa vinagi puledi rina vasileana pa Damasikasi meke Hamati pule la pa Izireli, si ta kubere beto koasa Buka Tinozi tadi na Baṉara pa Izireli. 29 Mate meke ta pomunae koasa popomunuana baṉara se Zeroboami, meke baṉara hobea e Zakaraea sa tuna koreo si asa.