1 Be varihaba si keke tie meke mudina sa nana vinarihaba si lopu qetu nia sa sa nana barikaleqe, sina kaiqa toṉa si taveti sa sapu variva kurekuredi koasa; ke kubere la nia sa koasa si keke pepa vinariluari, meke la vala nia sa koasa, meke hitu taloa nia sa pa nana vetu si asa.*Mt 5:31, 19:7; Mk 10:4 2 Meke pa mudina sipu taluarae si asa koasa nana vetu si la vagi hobea pule sa barikaleqe hie si keke tie meke ta evaṉae na loana pule sa tie hie sa barikaleqe sana. 3 Beto asa si lopu hiva nia pule sa palabatu vina rua si asa, ke kuberia pule sa si keke pepa vinariluari meke la vala nia sa koasa barikaleqe hie, meke tiqe hitu taloa nia sa koasa nana vetu, babe guana mate sa nana palabatu vina rua hie. 4 Be ta evaṉa si keke koari karua ginugua hire, si lopu kaqu haba pulea sa nana palabatu kekenu sa barikaleqe hie, sina kaqu balabala ia sa sapu ele boni si asa pa dinoṉo te Zihova. Ba be haba pulea sa si va maledere ia sa se Zihova, meke kote tavetia sa si keke sinea kaleana koasa popoa sapu ponini gamu Zihova sa mia Tamasa.

5 Pana tiqe varihaba vaqura si keke koreo, si lopu kaqu ta garunu la pude somana pa vinaripera babe va tupitia pa kaiqa tinavete si asa. Ba kaqu ta rupaha pa keke vuaheni doduruna si asa pude koa mo pa nana vasileana meke koa qetuqetu turaṉia mo sa nana barikaleqe sapu tiqe haba ia sa.

6 Pana vala nia goi si keketoṉa koa ke tie si mamu lopu vagi sari karua patu munamunalana ginani tanisa pude na kinopuna sa nana gale koa goi, sina kote ta hena palae mo sa tiṉitoṉa tavetaveteana ginani sapu boka toania sa tatamana.

7 Be ta poho si keke tie sapu korapa tuqe vagia si keke tie Izireli tasina meke vata evaṉae nia nana pinausu sa babe holuholu nia sa, si garona pude kaqu tava mate si asa. Pa siraṉa gua mo asa si kaqu boka tava beto sa kinaleana asa.*Ekd 21:16

8 Pana raza gamu sa minoho popoqu si mamu kopu sisigiti nia pude va tabei sapu gua zamani gamu na va tumatumaeni gamu rina hiama pa butubutu Livae, kaqu luli va hiteki gamu gua sapu ele zama la nia rau koa rini.*Liv 13:1 kamo hinia 14:54 9 Mi balabala pulea sapu gua evaṉia e Zihova sa mia Tamasa koe Miriami koasa mia inene pa mudina sipu ele taluarae pa popoa Izipi si gamu.*Nab 12:10

10 Pana vala nia goi si keketoṉa koa ke tie, si mu lopu nuquru la pa nana vetu pude vagia sa poko sapu korapa hiva vatu nia sa pude na kinopuna sa nana gale koa goi.*Ekd 22:26-27 11 Kaqu aqa mo pa sada si goi, meke telena kaqu paleke vatu nia koa goi si asa. 12 Be na tie habahualana si asa, si mu lopu va hola nia keke boṉi sa nana tiṉitoṉa vina sosodena sa gale koa goi. 13 Totoso lodu rimata si mamu va pulea sa nana koti pude ni va sagea meke puta nia. Beto hoi si kote zama leana nigo sa, meke kaqu qetu nigo e Zihova sa mua Tamasa si goi.

14 Mu lopu ṉoṉovalia goi si keke nabulu ta tabarana sapu habahualana na malaṉana, babe keke tasimu babe na tie karovona pu koa turaṉa gamu pa mia vasileana.*Liv 19:13 15 Koari hopeke rane si mamu tabaria sa nana rane tavetavete sipu lopu ele lodu sa rimata. Ura na habahuala si asa, ke ta hivae hola koasa sa poata, pude meke mani kebokebo nigo sa koe Zihova, meke ta evaṉae sea si goi.

16 Sari na tiatamadia rina koburu si lopu kaqu tava mate koari na sinea tadi na tudia meke sari na tudia ba lopu kaqu tava mate koari na sinea tadi na tiatamadia. Ba hopeke tie si kaqu tava mate koari nana sinea sapu tavete sotia sa telena.*2 Baṉ 14:6; 2 Koron 25:4; Izk 18:20

17 Mu lopu ṉoṉovali goi sari na tie karovodi meke sari na tie eapadi, mu lopu vagia sa koti tanisa nabonaboko meke hobe nia koasa mua gale.*Ekd 23:9; Liv 19:33-34; Diut 27:19 18 Mi balabala ia sapu na pinausu mia si gamu pa popoa Izipi, meke vata rupaha gamu e Zihova sa mia Tamasa, gua asa ke ponini gamu rau sa tinarae hie.

19 Pana paleke varigarani gamu sari na mia iqoso huiti saripu ta pusidi, meke ta muliṉae si kaiqa iqoso pa mudimia si mu lopu kekere pule la vagi, ba mi veko valani koari na tie karovodi, na eapadi, meke na tie nabonabokodi pude di vagi, pude boka mana nigo e Zihova si goi koari na tinavete pa limamu.*Liv 19:9-10, 23:22 20 Pana zoru va hoqai goi sari na vuana sa huda olive, si mu lopu zoru karua totoso ia. Ba mi vekoi si kaiqa tadi na tie karovodi, na tie eapadi, meke na tie nabonabokodi. 21 Pana paleke varigarani gamu sari na vua vaeni koari na mia inuma vaeni, si mu lopu kekere pule la i sari na vaeni pa vina rua totoso. Veko vala i koari na tie karovodi, na tie eapadi, meke na tie nabonabokodi saripu koa hola pa mudimia. 22 Mi balabala ia sapu gamu ba na pinausu mia mo pa popoa Izipi. Gua asa ke tozini gamu rau pude tavetia sapu gua asa.