1 Mu lopu va ene hoboro inavoso kokohadi, meke lopu toka nia sa tie seana, pude helahelae vurani sari na zinama kokohadi.*Ekd 20:16; Liv 19:11-12; Diut 5:20

2 Mu lopu somana luli koasa vinarigara tie totoso lulia rini sapu seana babe tozi vura nia sapu seana pude huaria sa vinilasa toṉotona. 3 Be koa pa vinaripitui si keke tie, si mamu lopu toka kale nia, sina na tie habahualana si asa.*Liv 19:15

4 Be ta evaṉa sapu dogoria goi sa bulumakao babe doṉ'ki tanisa mua kana sapu ene hoboro, si mamu turaṉa pule la nia koasa pu tagona.*Diut 22:1-4 5 Be hoqa turaṉia sa nana doṉ'ki sa nana pinaleke si mamu lopu va talevara hola, ba mamu toka nia sa mua kana pude va turu pulea sa doṉ'ki.

6 Mu lopu oso nia goi koa ke tie habahualana sa tinoṉoto, pana ta pitu si asa.*Liv 19:15; Diut 16:19 7 Mu lopu zutu kokoha ia goi si keke tie meke lopu va mate hoboria goi si keke tie toṉoto, ura kote zutua Rau sa tie gua asa, sapu tavete va sea. 8 Mu lopu ade vagia goi sa poata tanisa tie pu hiva nigo, pude tavete ponia sa kinaleana koasa, ura sa poata gua asa si va behui sari na tie koasa tinoṉoto, meke ṉovali sari na tie hokara pu loke dia ginugua. 9 Mi lopu ṉoṉovalia gamu si keke tie karovona; na ele gilania mia mo gamu si pude na tie karovona, ura gamu ba na tie karovo mia mo pa popoa Izipi.*Ekd 22:21; Liv 19:33-34; Diut 24:17-18, 27:19

10 Ura koari ka onomo vuaheni si kaqu lelete na pakepakete si gamu koa ri na mia inuma,*Liv 25:1-7 11 ba koasa vuaheni vina zuapa, si mani tava magogoso meke lopu ta lete pule sa pepeso. Meke sari na tie malamalaṉadi saripu koadi koa gamu, si madi vagi gedi ginani vasina, meke sari na kurukuru pinomodi si madi gani saripu veko hola i rini. Meke gua tugo sari na mia inuma vaeni na linetelete olive.

12 Ka onomo rane koari hopeke vuiki si kaqu tavetavete si gamu, ba loke tie si kaqu tavetavete koasa rane vina zuapa koari hopeke vuiki. Sari na mia pinausu na tie karovodi saripu tavetavete poni gamu meke sari na mia kurukuru ṉame ba kaqu magogoso beto tugo.*Ekd 20:9-11, 31:15, 34:21, 35:2; Liv 23:3; Diut 5:13-14

13 Kaqu avosi na kopu valeani gamu sari na doduru zinama saripu zamani Arau Zihova koa gamu. Mu lopu varavara la koari kaiqa tamasa pule; namu lopu hivani Rau pude pozai gamu pozadi si arini.

14 Ka ṉeta totoso koari hopeke vuaheni si kaqu tavete inevaṉa si gamu, pude va lavatau. 15 Koasa sidara Abibi, sapu taluarae ia gamu pa popoa Izipi, si kaqu tavetia gamu sa Inevaṉa Bereti Loke Isitina d . Koari ka zuapa rane tanisa inevaṉa, mi hena ia gamu sa bereti loke isitina, gua sapu ele tozini gamu Rau. Mu lopu mae somana pa vinahesi pana lopu paleke maeni gamu sari na mia vinariponi gua. *Ekd 12:14-20; Liv 23:6-8; Nab 28:17-25

16 Mi tavetia sa inevaṉa pakepakete, totoso podalae paketi gamu sari na mia vuvua, mi vala i koe Tamasa saripu vua kenudi pa mia inuma.*Liv 23:15-21,39-43; Nab 28:26-31

Mi tavetia sa Inevaṉa vina balabaladi rina dia ipi pa qega pa totoso paketi gamu sari na vua huda na vaeni. 17 Gamu doduru palabatu si kaqu mae vahesi Au si Arau, Zihova, sa mia Tamasa, koari ka ṉeta inevaṉa, koari hopeke vuaheni.

18 Totoso va vukivukihi nia ehara kurukuru ṉame koa Rau, si mi lopu tavete turaṉia si keke vinariponi sapu henia na isiti, meke lopu kaqu va malumia goi si keke vasi deana koa holana koasa vina vukivukihi, pude tanisa rane vugo.

19 Hopeke vuaheni si mi paleke va maei sari na mia pinakepakete huiti kekenu pa inuma koa rau pa vetu te Zihova sa mia Tamasa.*Ekd 34:26; Diut 14:21, 26:2

Keke tuna qoti babe na tuna sipi sapu korapa susu pa tinana, si mi lopu raroia gamu koasa meleke tanisa tinana.

20 Kaqu garunu va kenue atu nia Rau si keke mateana pude kopuni gamu koasa mia inene, meke pude turaṉa lani gamu koasa vasina sapu ele va nama veko nia Rau, gua. 21 Kaqu avosia na va tabea gamu si asa. Mu lopu toketokea gamu si asa. Na lopu kaqu taleosoni sa sari na mia tinoketoke la koasa, sina pozaqu Rau si koa koasa. 22 Ba be va tabei na taveti gamu sari doduru gua pu tozini gamu Rau, si kaqu varipera poni gamu Rau koari na mia kana. 23 Sa Qua mateana si kaqu la va kenue koa gamu meke va kilasa beto pani sari doduru mia kana sapu sari na butubutu Amoraiti, Hitaiti, Perizaiti, Kenanaiti, Hivaiti meke Zebusaiti, meke turaṉa lani gamu koari na popoa arini. 24 Mi lopu todoṉoni na vahesi gamu sari na dia tamasa, meke lopu vagi va karovi sari na dia hahanana vinahesi beku. Huari gedi sari na dia tamasa, mamu seke huhuari gedi sari na dedegere, saripu va hopei rini koari na dia vinahesi. 25 Mi vahesi Au si Arau Zihova, sa mia Tamasa. Pana vahesi Au gamu, si kaqu qetuni gamu Rau meke poni gamu ginani na kolo, meke lopu kaqu raza gamu minoho. 26 Namu loke barikaleqe pa mia popoa si kaqu mate tudia, sipu lopu ele kamo sa nana totoso podo, babe tige. Kaqu va toa gelenae i Rau sari na mia tinoa.

27 Kaqu va tarazuzu kenui Rau sari na tinoni pu kana gamu, meke kaqu va pupuhi Rau sarini pu razai gamu, meke kaqu va goveti Rau koa gamu sari doduru mia kana. 28 Kaqu va tarazuzu kenui Rau sari na mia kana, meke kaqu hadu taloani Rau sari na tie Hivaiti, na tie Kenani, meke sari na tie Hitaiti pa seu. 29 Ba lopu kaqu hadu taloani Rau sari doduru tie pa keke vuaheni, be gua asa si kote ivulu sa popoa, meke kote ta soku holani gamu sari na kurukuru pinomodi. 30 Gua asa ke kaqu kaiqa paki, osolae pada pude vagia gamu doduruna sa popoa. 31 Kaqu taveti Rau sari na volosodi sari na mia popoa pude na kokoina sa pepeso, sapu kamo mae gua koasa koqu lavata pa Aqaba, meke kamo la gua pa kolo Meditareniani, meke topue koasa soloso qega tata pa Izipi, meke kamo la gua koasa Ovuku Iuparetisi. Kaqu poni gamu Rau sa ṉiniraṉira sapu holani koari pu koadi koasa popoa, meke kaqu hadu la ni gamu pa seu si arini. 32 Mi lopu taveti gamu si kaiqa vinariva egoi koari na tie sara, babe koari na dia tamasa. 33 Lopu kaqu va koai gamu pa mia popoa sari na tie arini, be va koai gamu, si kote turaṉa va sea gamu rini, meke kana Au si Arau. Meke be vahesi gamu sari na dia tamasa, si kote gua tugo sa tie sapu ele soto pa sipata si gamu.”