1 Mi va lavatia se Zihova sa mia Tamasa, mi tavetia sa Inevaṉa Pasova d koasa sidara Abibi. Pana boṉi koasa sidara sana, si ele turaṉa vurani gamu Sa pa popoa Izipi. *Liv 23:5-8; Nab 28:16-25 2 La koasa vasina vahesihesiana sapu ta vizatana koe Zihova, mi la va matea si keke koari na mia sipi babe na bulumakao, tana Inevaṉa Pasova, pude va lavatia se Zihova sa mia Tamasa. 3 Pana hena ia gamu sa ginani hie, si lopu kaqu hena ia gamu sa palava sapu ta henie isiti. Ura koari ka zuapa rane si kaqu hena ia gamu sa bereti sapu lopu ta henie isiti, kekeṉoṉo gua sapu evaṉia gamu, sipu tuturei taluarae pa popoa Izipi si gamu. Kaqu hena ia gamu sa bereti hie, sapu sa bereti sapu ta pozae na tinasigiti. Pana be ve seunae gua sari na mia tinoa, si kaqu balabala pulea gamu sa rane sapu taluarae ia gamu pa popoa Izipi, sa vasina tana tinasigiti. 4 Ura koari ka zuapa rane si namu loke tie pa popoa si kaqu va naqitia si keke isiti d pa korapa nana vetu; meke sa masana sa kurukuru sapu tava mate koasa veluveluna sa rane kekenu asa, si kaqu ta hena beto tugo koasa boṉina asa.

5-6 Mi va matei sari na kurukuru tanisa Inevaṉa Pasova koasa vasina vahesihesiana sapu vizata poni gamu e Zihova sa mia Tamasa, meke loke vasina pule koasa popoa. Mi tavetia pana veluvelu lodu rimata koasa rane, sipu ele taluarae gamu pa popoa Izipi. 7 Mi va kina ia sa masa, mi hena ia tugo koasa vasina hopena tana vinahesina e Zihova sapu ta vizatana koe Zihova; meke pa koivugona si mi pule la pa vetu. 8 Ura koari ka onomo rane dodurudi, si kaqu hena ia gamu sa bereti loke isitina, meke koasa rane vina zuapa si kaqu varigara meke vahesia gamu se Zihova sa mia Tamasa, meke loke tie si kaqu tavetavete koasa rane sana.

9 Naei sari ka zuapa vuiki, podalae koasa totoso sipu podalae ta pakete sari na huiti,*Nab 28:26-31 10 beto asa, si mi tavetia sa inevaṉa pakepakete, pude va lavatia se Zihova sa mia Tamasa koari na mia vineko vinariponi moka, koasa padana sa Nana minana sapu ponini gamu Sa. 11 Mi koa qetuqetu somanae koari na mia koburu meke sari na mia nabulu pa kenuna e Zihova sa mia Tamasa koasa vasina hopena tana vinahesina e Zihova sapu vizatia Sa; gamu meke sari na tumia, na mia nabulu, meke sari na tie Livae, na tie karovodi, na eapadi, meke saripu nabonabokodi, pu koadi koari mia vasileana. 12 Mi kopu totokoni pude va tabei gamu sari doduru vina tumatumae hire: Mi balabala pulea doduru totoso sapu na pinausu si gamu pa popoa Izipi pukerane.

13 Pa mudina sipu ta vagi beto sari na mia kiko huiti koari na vasina pu neti varipaqahini gamu sari na kiko koari na qaqalotodi, meke ta munala beto sari doduru mia vua qurepi meke ta vagi sa kolo vaeni meke ta veko pa korapa ipi, si kaqu ta tavete sa Inevaṉa Vina Balabaladi rina Ipi pa Qega koari ka zuapa rane.*Nab 29:12-38 14 Mi koa qetuqetu koasa Inevaṉa hie turaṉi sari na tumia, na mia nabulu, meke sari tie Livae, na tie karovodi, na eapadi, meke saripu nabonabokodi pu koa koari na mia vasileana nomadi. 15 Mi va lavatia se Zihova sa mia Tamasa, mi tavetia sa inevaṉa hie koari ka zuapa rane koasa vasina vahesihesiana sapu vizatia e Zihova. Mi koa qetuqetu, ura kaqu manani gamu e Zihova koari na mia pinakepakete na tinavetavete.

16 Doduru tiena sa mia butubutu si kaqu varigara mae meke vahesia se Zihova ka ṉeta totoso koari hopeke vuaheni, koasa vasina hopena tana vinahesina e Zihova sapu vizatia Sa: pa totoso Pasova, na Inevaṉa Pakepakete, meke na Inevaṉa Vina Balabaladi rina Ipi pa Qega. Doduru hopeke tie si kaqu paleke mae vinariponi, 17 koasa padana gua sapu bokaia sa koasa tinamanae sapu ponia e Zihova sa mia Tamasa koa sa.

18 Kaqu vizati gamu sari na tie varipitui, meke kaiqa koimata na palabatu nomadi, koari doduru vasileana, pu ponini gamu e Zihova sa mia Tamasa. Sari na tie arini si pude varipitui pa tinoṉoto koari na tinoni. 19 Sari na tie hire si lopu tozi vura nia sapu seana pude huaria sa vinilasa toṉotona babe toka kale pa tie pa dia tinavete varipitui, meke lopu kaqu va egoa rini sa tinabaradi pude tavete poni vinizata kokohadi. Sari na vinariponi gugua arini si hoke va behui matadi rina tie varipitui, sina lopu kaqu hinokara sari dia vinizata.*Ekd 23:6-8; Liv 19:15 20 Kaqu na tinoṉoto mo si zama vura nia gamu doduru totoso, pude boka la, koa ia gamu sa popoa sapu kaqu ponini gamu e Zihova sa mia Tamasa, meke lopu kaqu kokoi sa mia kinoa vasina.

21 Pana tavetia gamu sa hope te Zihova sa mia Tamasa, si lopu kaqu turu kapae nia koasa si keke huda sapu ta tavete guana kinehana Asera, sa tamasa barikaleqe.*Ekd 34:13 22 Meke lopu va turu sagea si keke dedegere patu sapu ta tavetae beku pude tavahesi; ura etuli e Zihova si arini.*Liv 26:1