18
Hopeke Lalaeni Nada Tinavete
1 Kamo mae koa rau sa zinama te Zihova: 2 “Nasa si guni nia gamu na tinoni totoso zama nia gamu sa zinama tumatumae hie pa guguana sa popoa Izireli:*Zer 31:29
‘Sari tamadia si hena vua huda kubolodi,
meke sari koburu si gagarikana livodi,’ gua?
3 Gua sapu hinokara toaqu si Arau, zama vura gua si Arau Zihova sa Baṉara, si lopu kote zama pule nia gamu sa zinama tumatumae hie pa Izireli. 4 Ura sari doduru tinoni sapu toadi si na taqaraudi beto, sari tamadia meke gua tugo sari koburu, karua beto si Taqaraudi. Sa tie sapu tavete va sea, si asa tugo si kote mate.
5 Be guana koa nana si keke tie toṉotona
sapu tavetia sapu leana meke toṉoto.
6 Lopu somana henahena si asa koari na hope pa toqere
babe vahesi sari na beku tadi pa Izireli.
Lopu barabarata si asa koa sa barikaleqe tanisa turaṉana
babe puta turaṉa barikaleqe dogoro sidarana.
7 Lopu sekesekei nia sa sa likakalae tanisa keke tie,
ba va pulei sa sari tiṉitoṉa tadi tie sapu tuqei sa totoso va malumu ni lipulipu sa.
Lopu hiko si asa
ba ponini ginani sa sarini pu ovia
meke va pokoi sa sarini pu dodoho.
8 Va malumu lipulipu la pa tie si asa ba lopu pude tavete poata
babe tepa vagi vina tomo la koari na linipulipu.
Kopu pule nia si asa pude lopu tavete va sea sa limana
meke gotogoto si asa totoso pitu i sa sari tie.
9 Luli sa sari Qua vina turu
meke kopu va leana i sa sari Qua tinarae.
Sa tie asa si na tie toṉotona;
hinokara kote toa si asa,
zama vura gua si Arau Zihova sa Baṉara.*Liv 18:5
10 Be guana koa nana si keke nana koburu sapu vari variperana, sapu va mate tie babe taveti sari hahanana kaleadi, 11 ba sari hahanana kaleadi si lopu taveti sa tamana;
somana henahena sa tuna koari na beku pa toqere,
baratia sa sa barikaleqe tanisa turaṉana.
12 Ṉoṉovali sa sari pu malaṉa meke loke gedi,
meke hoke hiko si asa.
Sa tinago sapu vagia sa tana votiki tie sapu lipulipu koasa si lopu va pule ia sa.
Vahesi sa sari na beku
meke taveti sa sari tiṉitoṉa variva malederedi.
13 Lipulipu la pa tie si asa pude vagi va tomo poata meke tepa va noma poata koari na linipulipu.
Vegua, kote toa sa tie gugua asa? Lopu kaqu! Sina taveti sa sari tiṉitoṉa variva malederedi hire ke hinokara kote tava mate si asa meke kote telena ta zutu pule nia sa nana minate.
14 Ba be sa koburu hie si tagoa si keke koburu pule sapu dogori sari na kinaleana sapu taveti sa tamana, meke vea dogoro gunini sa ba lopu tavete luli sa:
15 Lopu somana henahena si asa koari na beku pa toqere
babe vahesi sa sari na beku pa Izireli.
Asa lopu baratia sa barikaleqe tanisa turaṉana.
16 Lopu ṉoṉovala ia sa si keke tie
ba be tepa ia si keke tinago tanisa tie pu tepa pude lipulipu koa sa.
Lopu hiko si asa
ba poni ginani sa sari pu ovia
meke va poko i sa sari pu dodoho.
17 Kopu pule nia si asa pude lopu tavete va sea sa limana
Va malumu lipulipu la pa tie si asa ba lopu pude tavete poata
babe tepa vagi vina tomo la koari na linipulipu.
Kopu ni sa sari Qua tinarae meke luli sa sari Qua vina turu.
Asa lopu kote mateni sari sinea tanisa tamana; na hinokara kote toa si asa. 18 Ba sa tamana si kote mate ni sari nana sinea telena, sina vagi likakalae tanisa turaṉana, hiko si asa koasa tasina, meke taveti sa sapu sea la koari na tie.
19 Be nanasa guahe si agoi, ‘Na vegua ke lopu somana ta gore nia sa tuna sari sinea tanisa tamana?’ Ura taveti sa tuna sapu leana meke toṉoto meke kopu si asa pude kopuni sari doduru Qua vina turu, ke hinokara kote toa si asa. 20 Sa tie sapu tavete va sea si asa tugo si kote mate. Sa sinea tanisa tamana si lopu kote somana ta gore nia sa tuna, meke sa tamana lopu kote somana ta gore nia sa sinea tanisa tuna. Sa laena sa tinoṉoto si kote ta poni nia sa tie pu koa va toṉoto, meke sa kinaleana si kote ta gore nia tugo sa tie kaleana.*Diut 24:16
21 Ba be sa tie kaleana si kekere koari doduru kinaleana sapu taveti sa meke kopu ni sa sari Qua vina turu meke taveti sa sapu leana meke toṉoto si hinokara kote toa si asa; na lopu kote mate si asa. 22 Lopu keke ri na kinaleana sapu taveti sa si kote ta zutu nia sa. Sina tavete va leana si asa ke kote toa si asa. 23 Vea, qetu nia Rau sapu mate sari tie kaleadi? zama vura gua si Arau Zihova sa Baṉara. Lokari, ba qetu hola si Arau totoso kekere si arini koari na dia tinoa na hahanana kaleadi.
24 Ba pana kekere sa tie toṉotona koari nana hahanana toṉotodi meke podalae taveti sa sapu variva malederedi, sapu hoke taveti sa tie kaleana, si vea kote toa sia? Lokari! Lopu keke ri nana tinavete leadi si kote ta balabala. Koa gua sapu lopu kopu ni sa gua sapu leana ke ta zutu si asa, meke koa gua koari na tinavete kaleadi sapu taveti sa, si kote mate mo si asa.
25 Ba zama guahe si gamu, ‘Sa siraṉa te Zihova si lopu leana.’ Mi va avoso, gamu na butubutu Izireli: Vea, lopu leana sa Qua siraṉa? Vea, lopu sari mia siraṉa tu si lopu leana? 26 Pude kekere sa tie toṉotona koari nana tinoṉoto meke podalae tavete va kaleana, si kote mateni tugo sa; sina tavete va kaleana si asa ke kote mate tugo si asa. 27 Ba pana kekere si keke tie kaleana koari nana tinavete kaleadi meke taveti sa sapu leana meke toṉoto, si kote harupia sa sa nana tinoa. 28 Sina gilae si asa koari na kinaleana sapu taveti sa meke kekere taloa si asa koa rini, si hinokara kote toa si asa. 29 Gua ba zama sa butubutu Izireli, ‘Sa hahanana vinari pitui te Zihova si lopu toṉoto.’ Hinokara sapu sari Qua hahanana si lopu toṉoto, ta butubutu Izireli? Vea, lopu sa mua hahanana tu si lopu toṉoto?
30 Kei, gamu pa butubutu Izireli, gua ke Arau kote pitu gamu, kote hopeke ta viliti sari mia hahanana, zama vura gua si Arau Zihova sa Baṉara. Mi hobe! Kekere taloa koari doduru mia tinavete kaleadi; meke kote lopu hoqa si gamu koari mia sinea. 31 Mi veko pani sari doduru kinaleana sapu taveti gamu, mi vagia si keke bulo vaqurana meke keke maqomaqo vaqurana. Na vegua ke kote mate tu si gamu pa butubutu Izireli? 32 Ura Arau lopu qetu nia sapu pude mate si keke tie, zama vura gua si Arau Zihova sa Baṉara. Kekere pude mamu toa!”