1 Zama la ia e Zihova se Mosese, 2 “Mamu tozini sari na tinoni Izireli: Arau se Zihova sa mia Tamasa. 3 Mi lopu tavete luli gamu sari na tinavete kaleadi pu taveti ri na tinoni pa popoa Izipi, vasina pu ele koa ia gamu, babe sari na tinoni pu koadi pa popoa Kenani, vasina pu korapa turaṉa lani gamu Rau kamahire. 4 Mi va tabei sari na Qua tinarae, mamu taveti gua sapu garununi gamu Rau. Arau se Zihova sa mia Tamasa. 5 Mi luli na taveti sari na Qua tinarae saripu ponini gamu Rau; ura sa tie pu va tabei sari na Qua tinarae si kaqu toa. Arau se Zihova.*Nehe 9:29; Izk 18:9, 20:11-13; Lk 10:28; Rom 10:5; Qal 3:12

6 Loke tie koa gamu si kaqu eko turaṉia pa tinavete vinari riqihi si keke turaṉana soti pa pinodo. Arau se Zihova. 7 Mu lopu va kurekurea goi sa tamamu pude eko turaṉia sa tinamu. Mu lopu va kurekurea goi sa tinamu soti. 8 Mu lopu va kurekurea goi sa tamamu pude eko turaṉia sa nana barikaleqe sapu sa tinamu karokarovo.*Liv 20:11; Diut 22:30, 27:20 9 Mu lopu eko turaṉia goi sa vavenemu babe sa tasimu vinatakele tanisa tamamu babe tanisa tinamu, be podona koasa mua vetu soti ba be pa votiki vasina.* Liv 20:17; Diut 27:22 10 Mu lopu eko turaṉia goi sa tuna sa tumu koreo babe sa tuna sa tumu barikaleqe, ura kote kurekure si goi. 11 Mu lopu eko turaṉia goi sa tasimu karokarovo sapu sa tuna sa tinamu karokarovo, ura asa ba na tasimu vineki tugo. 12-13 Mu lopu eko turaṉia goi sa tasina barikaleqe sa tamamu babe tinamu. Ura na turaṉamia soti pa pinodo si asa.*Liv 20:19-20 14 Mu lopu eko turaṉia goi sa barikaleqe tanisa tasina koreo sa tamamu, ura asa ba na buhimu goi. 15 Mu lopu eko turaṉia goi sa mua roroto. Asa sa barikaleqe sina tumu,*Liv 20:12 16 babe sa barikaleqe tanisa tasimu koreo.*Liv 20:21 17 Mu lopu eko turaṉia goi sa tuna vineki sa mua barikaleqe. Meke lopu kaqu eko turaṉia tugo goi sa tuna sa tuna vineki sa mua barikaleqe, babe na tuna vineki sa tuna koreo sa mua barikaleqe. Ura na turaṉamu soti mo goi si arini, meke lopu leana sapu gua asa.*Liv 20:14; Diut 27:23 18 Mu lopu haba ia goi sa tasina barikaleqe sa mua barikaleqe, sipu korapa toana sa mua barikaleqe soti.

19 Mu lopu eko turaṉia goi pa totoso kamoa na minoho barikaleqe sa barikaleqe. Ura na lopu via si asa pa kenuqu Rau. *Liv 20:18 20 Mu lopu eko turaṉia goi, si keke barikaleqe tanisa turaṉamu, sina lopu kaqu via si goi pa kenuqu Rau. *Liv 20:10 21 Mu lopu va vukivukihi lani pa vinahesina sa tamasa Moleki sari kaiqa mia koburu, ura kote ṉoṉovalia goi sa pozaqu Rau e Zihova sa mia Tamasa pa siraṉa gua asa.*Liv 20:1-5 22 Mu lopu eko turaṉia goi si keke tie pa tinavete vinari riqihi, guana keke barikaleqe, namu kaleana hola koe Tamasa sapu gua asa.*Liv 20:13 23 Loke tie babe keke barikaleqe si kaqu papa ia si keke kurukuru ṉame. Ura sa sinea gua asa si boni hola pa kenuqu Rau.*Ekd 22:19; Liv 20:15-16; Diut 27:21

24 Mi lopu va boni sari na mia tinoa koari na tinavete gua arini. Ura gugua arini sari na tinavete bonidi pu taveti ri na tie huporo, saripu koadi tatasana sipu lopu ele mae si gamu pa popoa Kenani, meke Arau e Zihova si kaqu hadu vurani, pude boka nuquru la si gamu vasina. 25 Sari na tinavete kaleadi tadirini si va bonia sa pepeso, gua asa ke tava kilasa si asa koe Zihova. Kote ta hitu sari na tinoni pa popoa Kenani kekeṉoṉo gua sapu sa tie si lua vura nia sa ginani kaleana. 26-27 Sari na tie hire si taveti sari na tinavete kaleadi gugua arini meke va bonia rini sa popoa; ba gamu si lopu kaqu taveti sari na tinavete gugua arini. Gamu doduru mo, be na tie Izireli si gamu, babe na tie karovodi pu koa somanae koa gamu, si kaqu va tabei sari na tinarae na zinama te Zihova. 28 Be guana taveti gamu sari na tinavete kaleadi sara, si kaqu va bonia gamu sa popoa meke kaqu ta hitu vura si gamu koasa popoa kekeṉoṉo gua sapu lua vurani sa tie sa ginani kaleana, meke kekeṉoṉo gua sapu ta hadu vura sari na tinoni pu koadi vasina tatasana, sipu lopu ele mae si gamu. 29 Gilania, mia gamu sapu be taveti gamu sari na tinavete kaleadi gugua arini, si kaqu ta hitu palae koasa butubutu Izireli si arini.

30 Mi va tabei gamu sari na tinarae saripu ponini gamu Rau; mamu lopu luli sari na tinavete pu tavetaveti ri na tinoni pu ele koadi koasa popoa sana tatasana, sipu lopu ele mae gamu. Mamu lopu va boni sari na mia tinoa koari na tinavete kaleadi gugua arini. Arau se Zihova sa mia Tamasa.”