9
1-2 Koasa vina hiokona made rane pa sidara tugo asa, si varigara sari na tie Izireli, meke madi pa ginani, pude vata dogoro nia sa dia tinalotaṉa koari dia sinea, gua. Ele paqaha pule ni teledia si arini koari na tie pa votiki popoa. Va sage poko baika si arini, meke vekoni kavuru rini sari na batudi, pude vata dogoro ni sari na dia tinalotaṉa. Turu si arini meke podalae helahelae ni sari na dia sinea saripu ele evaṉi rini, meke sari na tiatamadia tatasana. 3 Padana ka ṉeta aoa si ta tiro vala koa rini sa Tinarae te Zihova, sa dia Tamasa. Meke padana ka ṉeta aoa pule si helahelae ni rini sari na dia sinea, meke vahesia rini se Zihova sa dia Tamasa.
4 Koa nana si keke hatara ululu tadi na tie Livaeti, turu vasina sari Zesua, Bani, Kedimieli, Sebanaea, Buni, Serebia, Bani, meke Kenani, meke varavara va ululae la koe Zihova sa dia Tamasa si arini.
5 Hire sari na tie Livaeti pu podalae nia sa vinahesi: ari Zesua, Kedimieli, Bani, Hasabinea, Serebia, Hodaea, Sebanaea, meke e Petahia. Zama si arini,
“Turu gamu, mamu vahesia se Zihova sa mia Tamasa,
mi vahesia si Asa pu koa ninae rane ka rane!
Madi vahesia ri doduru tie sa Pozana lavata,
sapu loke vinahesi tana tie boka ṉana kamoa.”
Sa Vinaravara Hinelahelae
6 Beto asa, si varavara sari na tie Izireli sapu guahe:
“Agoi mo telemu se Zihova;
Agoi mo tavetia sa Maṉauru meke sari na pinopino.
Agoi mo tavetia sa pepeso meke sa lamana,
meke doduru likakalae pu koadi koarini;
meke Agoi tugo poni ni tinoa sari doduru.
Sari soku tinoni pa Maṉauru si todoṉo gore meke vahesigo si Agoi.
7 Agoi, Zihova Tamasa mo, si vizatia se Ebarami,
meke turaṉa vura ia pa vasileana Ura pa popoa Babiloni;
meke Agoi tugo hobe nia Ebarahami sa pozana.*Zen 11:31, 12:1, 17:5
8 Ele gilania Goi sapu raṉe va hinokarigo sa si Agoi, *Zen 15:18-21
meke tavetia Goi si keke vinariva egoi koasa.
Ele va tatara nia Goi sapu kaqu ponia koasa sa pepeso tadi na tie pa butubutu Kenani, Hitaiti, Amoraiti,
Perizaiti, Zebusaiti, meke Qeqasaiti,
koasa pepeso vasina kaqu koa sari na tutina.
Lopu hobea Goi sa Mua vina tatara,
sina toṉoto si Agoi meke soto va nabu si Goi pa Mua binalabala.
9 Dogoria Goi sa tinasigiti tadi na tiatamamami pa popoa Izipi;*Ekd 3:7, 14:10-12
meke olaṉia Goi sa dia tinepa tinokae pa Kolo Ziṉara.
10 Meke taveti Goi sari na tinavete variva magasadi koasa baṉara,*Ekd 7:8 kamo hinia 12:32
meke koari na nana palabatu, na tinoni pa popoa Izipi,
sina gilania Goi sapu ṉoṉovali rini sari na Mua tie.
Sa inavosona sa pozamu Goi si koa hola kamoa pa rane ṉinoroi.
11 Vari paqaha nia Goi sa kolo pa kenudia pa korapa lamana,*Ekd 14:21-29, 15:4-5
meke turaṉa vura lani Goi pa pepeso popana si arini.
Arini pu hadu lulidi, si lodu mate pa lamana peava,
gua puta tugo na patu loduna totoso nakili sa kolo.
12 Turaṉi Goi si arini pa keke lei pana rane,*Ekd 13:21-22
meke pana boṉi si va kalalasa nia nika Goi sa dia siraṉa.
13 Gore mae gua pa maṉauru si Agoi,*Ekd 19:18 kamo hinia 23:33
meke gore mae pa Toqere Saenai;
zama koa rina Mua tie,
meke ponini tinarae leadi na vina tumatumae hinokara Goi si arini.
14 Va tumatumae nia Goi koa rini pude va madia sa Mua Rane Sabati,
meke koe Mosese sa Mua nabulu, si vala ni Goi sari na Mua Tinarae.
15 Sipu ovia rini, si poni ni bereti mae guana pa maṉauru Goi si arini,*Ekd 16:4-15, 17:1-7; Diut 1:21
meke sipu memeha rini, si va napo ni kolo mae guana koa keke patu Goi si arini.
Ele tozi ni Goi si arini pude la vagia sa pepeso,
sapu ele va tatara nia Goi.
16 Ba sari na tiatamamami si na tie tasunadi, meke luli dia hiniva,*Nab 14:1-4; Diut 1:26-33
meke korodia va tabei sari na Mua tinarae.
17 Korodia va tabe si arini,*Ekd 34:6; Nab 14:18
meke muliṉi ni tugo rini, sari na tiṉitoṉa pu taveti Goi;
muliṉi ni tugo rini sari na tiṉitoṉa variva magasadi pu evaṉi Goi.
Korodia va avoso meke vizatia rini si keke dia koimata,
pude turaṉa pule lani pa tinoa pinausu pa popoa Izipi, gua.
Ba Agoi si keke Tamasa, sapu variva taleosae;
harupu tie pa tataru si Goi,
meke lopu tuture bugoro;
kopu valeani Goi sari na Mua vina tatara na vinariva egoi nabuna,
ke lopu luara pani Goi sari na tie Izireli.
18 Meke tavetia rini si keke beku pa kinehana keke bulumakao,*Ekd 32:1-4
meke zama si arini, sapu asa sa tamasa pu turaṉa vurani pa popoa Izipi si arini, gua.
Ṉoṉovala sisigitigo rini si Agoi Zihova.
19 Ba lopu veko pani Goi pa popoa qega si arini,*Diut 8:2-4
ura sa Mua tataru variva taleosae si noma hola.
Lopu hena pania Goi sa lei babe sa nika,
sapu vata dogoro nia koa rini sa siraṉa pana rane meke pana boṉi.
20 Pa korapana sa Mua Maqomaqo leana si tozia Goi koa rini sapu gua kaqu tavetia rini.
Poni ni mana meke na kolo Goi si arini pude napo.
21 Pa korapadi ri ka made ṉavulu puta vuaheni pa popoa qega
si poni ni Goi sapu gua hiva nia rini;
lopu hite popozu sari dia poko,
meke lopu hite ozoṉo sari nenedi pa tinasigiti.
22 Ele va malumi Goi si arini pude va kilasi sari na butubutu na binaṉara,*Nab 21:21-35
meke sari na popoa pa vari likohaena sa popoa tadirini.
Va kilasia rini sa popoa Hesiboni, vasina baṉara se Sihoni,
meke sa popoa Basani, vasina baṉara se Oqo.
23 Ele poni va soku ni koburu Goi si arini, saripu soku gua tugo rina pinopino pa maṉauru,*Zen 15:5, 22:17; Zos 3:14-17
saripu ele va malumi meke va kilasi rini,
meke koa koasa popoa, sapu ele va tatara nia Goi pude vala nia koari na tiatamadia.
24 Vagi va karovia rini sa popoa Kenani;*Zos 11:23
ba Agoi va kilasi sari na tie pu koadi vasina.
Poni nia Goi sa ṉiniraṉira koari na Mua tie,
pude tavetia sapu gua qetu nia rina tinoni meke sari na baṉara pa Kenani.
25 Meke zau vagi rina Mua tie varipera sari na vasileana ṉiṉiradi, na pepeso masurudi,*Diut 6:10-11
na vetu saripu siṉi na tinagotago, na berukehe pu ele ta gelidi, na huda olive, vua huda, meke sari na inuma vaeni.
Meke henai rini sari doduru gua pu hiva ni rini,
meke noboko, na qetu ni rini sari doduru tiṉitoṉa leadi saripu poni ni Goi koa rini.
26 Ba lopu hiva va avoso meke korodia va tabe Igo rina Mua tie si Goi,*Zaz 2:11-16
meke kilu pani rini sari na Mua tinarae.
Va matei rini sari Mua poropita pu va balaui,
pu tozini pude kekere pule atu koa Goi.
Meke zama ṉoṉovala Igo rini ninae totoso,
27 ke va malumi Goi sari na dia kana, pude va kilasi na baṉara ni si arini.
Pa korapa dia tinasuna si tepa tinokae si arini koa Goi,
meke olaṉa gore mae guni Goi pa Maṉauru si arini.
Pa korapa Mua tataru variva taleosae lavata si garunu lani Goi sari na koimata,
pude harupu pule ni si arini koari na dia kana.
28 Sipu pule mae koa rini sa binule, si tavete va sea pule tugo si arini,
meke va malumu pulei Goi sari na dia kana pude va kilasi si arini.
Ba sipu kekere pule meke tepa Igo rini si Agoi pude harupi si arini,
si avosi Goi pa Maṉauru ninae totoso,
meke harupi Goi si arini pa korapa Mua tataru variva taleosae lavata.
29 Va balaui Goi si arini pude va tabei sari na Mua vina tumatumae,*Liv 18:5
ba koari na dia vinahesi pule si kilui rini sari na Mua tinarae,
ba sa kinopuna sa tinarae te Tamasa si la gua koasa siraṉa tinoa.
Ba korodia va nabu, luli dia hiniva, meke lopu hiva va tabe si arini.
30 Ninae vuaheni si va balau va ṉoṉo ni Goi si arini.*2 Baṉ 17:13-18; 2 Koron 36:15-16
Meke poni Goi sa Mua ṉiniraṉira koari na Mua poropita pude zamai,
ba nuli sari na Mua tinoni,
ke va malumi mo Goi pude tava kilasa si arini koari votiki butubutu tie.
31 Ba sina sa Mua tataru variva taleosae si noma hola,
ke lopu veko pani na va matei Goi pude tava kilasa si arini koari votiki butubutu tie.
32 Ke Tamasa, mami Tamasa, marilaemu hola si Goi!*2 Baṉ 15:19,29, 17:3-6; Ezr 4:2, 10
Variva holoqorumu hola na ṉiṉira hola si Goi!
Kopu zoṉazoṉa ni Goi sari na Mua vina tatara tava egodi,
koari na totoso sipu ṉoṉovala gami rina baṉara pa Asiria si gami,
meke kamoa tugo kamahire, si ta ṉovala ni tugo gami si arini!
Sari na mami baṉara, na mami koimata, na mami hiama, meke sari na mami poropita,
na tiatamamami, meke sari doduru mami tie, si tasuna hola dia.
Mu balabala pulea sa tina sigiti lavata sapu ta evaṉa koa gami!
33 Toṉoto hola sa Mua tinavete sapu va kilasa gami;
meke lopu sekea Goi sa Mua vina tatara, sipu tavete va sea si gami.
34 Sari na tiatamamami, na mami baṉara, mami koimata, meke sari na hiama,
si lopu kopu nia sa Mua Tinarae.
Lopu hite va avoso atui rini sari na Mua Tinarae meke sari na Mua vina balau.
35 Koasa Mua minana, si totoli ni rina baṉara sari na Mua tinoni,
sipu koa si arini koasa popoa lavata meke masuruna sapu poni nia Goi koa rini;
ba korodia kekere pule meke luara pani sari na dia sinea meke nabulu nigo si Agoi.
36 Meke ponini gami ginani Goi si gami koasa pepeso masuruna hie.
Ba kamahire si na pinausu mo si gami koasa popoa sapu ponini gami Goi.
37 Sari na ginani sapu paketi gami koasa pepeso,
si ta vala mo koari na baṉara saripu baṉarani gami,
sina ele tavete va sea si gami.
Tavete mae nia rini, meke koari na mami rovana bulumakao sapu gua qetu nia rini koa gami,
meke kamahire si koa pa tinasuna nomana hola si gami.”
Kuberi ri na Tie sari na Pozadi koa sa Vinariva Egoi.
38 Ura koa gua koa ri doduru ginugua pu ta evaṉa, gami na tinoni pa popoa Izireli si tavetia si keke kinubere vinariva egoi nabuna pude lulia sa Tinarae te Tamasa. Sari na mami koimata, mami tie Livaeti, meke sari na mami hiama, si kuberi sari pozadi koasa vinariva egoi asa.
*9:10 Ekd 7:8 kamo hinia 12:32
*9:13 Ekd 19:18 kamo hinia 23:33
*9:15 Ekd 16:4-15, 17:1-7; Diut 1:21
*9:16 Nab 14:1-4; Diut 1:26-33
*9:23 Zen 15:5, 22:17; Zos 3:14-17
*9:30 2 Baṉ 17:13-18; 2 Koron 36:15-16
*9:32 2 Baṉ 15:19,29, 17:3-6; Ezr 4:2, 10