1 Kamo mae koa rau sa zinama te Zihova: 2 “Tuna na tie, zama la i sari turaṉamu, mamu zama guahe koa rini: ‘Pana turaṉa mae nia Rau sa vedara koasa popoa meke vizatia sa tiena sa popoa si keke tie koa rini pude na dia tie kopu, 3 meke dogoria sa tie kopu sa vedara sapu mae gua koasa popoa meke ivu ia sa sa buki pude va balau i sari tie, 4 meke pana avosia keke tie sa buki ba lopu va balau si asa meke kamo sa vedara meke vagia sa sa nana tinoa, si telena kote ta zutu nia sa nana minate sa tie asa. 5 Sina avosia nana sa kabona sa buki ba lopu va balau si asa, ke telena kote ta zutu nia sa nana minate. Be luli ia sa sa vina balau si kote harupu pule nia si asa. 6 Ba, be dogoria mo sa tie kopu sa maena sa vedara ba lopu ivu ia sa sa buki pude va balau i sari tie meke kamo sa vedara meke sekea sa si keke tie koa rini, si sa tie asa si kote mate pa nana sinea, ba kote zutu ia Rau sa tie kopu koasa eharana sa.’

7 Tuna na tie, veko igo Arau si agoi pude na tie kopu koasa butubutu Izireli; ke mamu avosi sari zinama sapu zamani Rau mamu poni vina balau si arini. 8 Be zama guahe si Arau koasa keke tie kaleana, ‘Kei, agoi tie kaleamu, na kote hinokara mate si agoi,’ gua, meke lopu hite ososo nia goi si asa pude hobei sa sari nana hahanana, si kote mate sa tie asa koari nana sinea, ba kote zutu igo Arau si agoi koasa eharana sa. 9 Ba be guana va balau ia goi si asa pude kekere si asa koari nana hahanana kaleadi meke lopu luli igo sa, si kote mate si asa koari nana sinea, ba agoi si kote ta harupu mua.”

10 “Tuna na tie, zama la guahe koasa butubutu Izireli, ‘Gua hie si zama nia gamu: “Sari mami tinavete sea meke sinea si ta goreni gami, meke koa gua koa rini si mate tatasa si gami. Kote vea gua meke toa si gami?” ’ 11 Mu zama guahe koa rini, ‘Hinokara gua sapu toaqu si Arau, zama vura gua si Arau Zihova sa Baṉara, Arau lopu qetu nia sapu pude mate sari tie kaleadi, ba leana si be kekere si arini pa dia hahanana pude madi toa. Mi kekere! Kekere koasa mia siraṉa kaleanana! Na vea ke kaqu mate tu si gamu, kei gamu na butubutu Izireli?’

12 Gua ke, tuna na tie, mu zama la guahe koari turaṉamu, ‘Sa tinoṉoto tanisa tie toṉoto si lopu kaqu harupia si asa pana seke tinarae si asa, sa kinaleana tanisa tie kaleana si lopu kote tava kilasani sa pana kekere koa rini si asa. Pana tavete va sea sa tie toṉoto, si lopu kote tava malumu pude toani sa sari nana tinavete toṉoto koadi.’ 13 Pana tozi nia Rau si keke tie toṉoto sapu hinokara kote toa si asa, beto si raṉea sa sa nana tinoṉoto meke podalae tavete va kaleana, si lopu kote ta balabala sari tinoṉoto sapu ele taveti sa; kote mateni sa sari kinaleana sapu taveti sa. 14 Meke be zama si Rau koasa tie kaleana, ‘Hinokara kote mate si agoi,’ gua, beto si kekere tu si asa koari nana sinea meke taveti sa sapu toṉoto meke ṉoṉo, 15 meke be va pulei sa sari tiṉitoṉa tadi tie sapu tuqei sa totoso va malumu ni lipulipu sa, va pulei sa sapu hikoi sa, luli sa sari vina turu sapu variva toa, meke lopu taveti sa sapu kaleadi, si hinokara kote toa si asa; lopu kote mate si asa. 16 Lopu keke rina sinea sapu taveti sa si kote ta balabala pule la koa sa. Ele taveti sa sapu ṉoṉo meke toṉoto; ke hinokara kote toa nana si asa.

17 Gua ba zama guahe sari turaṉamu, ‘Sa siraṉa te Tamasa si lopu toṉoto,’ gua. Ba na dia siraṉa tu si lopu toṉoto. 18 Pana kekere sa tie toṉoto koari nana tinoṉoto meke tavete va kaleana, si kote mate nia sa si asa.

19 Meke be sa tie kaleana si kekere koari nana kinaleana meke taveti sa sapu ṉoṉo meke toṉoto, si asa si kote toa nia sa. 20 Kei gamu na butubutu Izireli, gua ba zama gua tu hie si gamu, ‘Sa siraṉa te Zihova si lopu toṉoto,’ gua. Ba na kote hopeke pitu gamu Rau si gamu koari mia hopeke hahanana.”

21 Pa vina manege rua vuahenina sa tinaraovo mami, pa vina manege puta sidara, koasa vina lima rane, si kamo mae koa rau si keke tie sapu govete mae guana pa Zerusalema, meke zama, “Sa vasileana lavata si ele hoqa!” gua.*2 Baṉ 25:3-10; Zer 39:2-8, 52:4-14 22 Pana veluvelu koasa rane sipu lopu ele mae sa tie, si hake mae koa rau sa Limana e Zihova. Pana munumunu pa koivugona gua meke kamo mae sa tie si tukelia Sa sa ṉuzuqu, ke boka zama pule si rau.

23 Meke kamo mae koa rau sa zinama te Zihova: 24 “Tuna na tie, saripu korapa koa koasa popoa ta huarana pa Izireli si zama gua he, ‘Se Ebarahami si keke tie mo, ba asa mo tagoa sa popoa. Ba gita si soku hola, na hinokara ta poni nia gita sa popoa hie pude na nada tinago.’ 25 Gua ke mu zama la guahe koa rini, ‘Hiera gua si zama nia e Zihova sa Baṉara: Hena ia gamu sa masa sapu koa ia ehara, meke vahesi gamu sari mia beku, meke va zoloro ehara si gamu, si vegua balabala ia gamu sapu garo mia pude tago ia sa popoa gua? 26 Raṉei gamu sari mia vedara ke kaleadi sari tinavete sapu taveti gamu, meke hopeke gamu si eko turaṉia sa barikaleqe tanisa turaṉamia. Vea, garo mia pude tagoa tugo sa popoa?’

27 Mu zama la guahe koa rini: ‘Hiera gua si zama nia e Zihova sa Baṉara: Hinokara gua sapu toaqu si Arau, arini sapu koa hola koasa popoa ta huarana si kote mate pa vedara, arini pu vura la pa soloso si kote poni lani Rau koari na kurukuru pinomo pude hena i, meke arini pa popoa ta gobadi meke pa bae si kote mate pa oza. 28 Kote la Arau meke huara va kaleana pania sa popoa, meke sa ṉiniraṉira sapu vahesia sa si kote kokoi, meke sari toqere pa Izireli si kote pinomo ke loke tie kote hiva karovi. 29 Meke kote tumae nia rini sapu Arau tugo se Zihova, pana ele huara pania Rau sa popoa koa gua koari doduru kinaleana sapu taveti rini.’ ”

30 “Sapu agoi, tuna na tie, si korapa zamazama nigo ari turaṉamu kapae koari na gobagoba na sasada vetu, vari zamai guahe si arini, ‘Mae mada la avosia sa zinama sapu mae guana koe Zihova,’ gua. 31 Sari Qua tinoni si atu koa goi, gua mo sapu hoke tavetia rini, atu habotu pa kenumu pude avosi sari mua zinama, ba lopu tavete luli rini. Pa ṉuzu dia si guana okoro va tabe si arini, ba pa bulo dia si puhi poata hinikodi. 32 Na guana tie kera kinera babaere mo si agoi koa rini, sapu avoso lea mamalaiṉina meke tumaena mikemike. Avoso lea mamalaiṉina, sina avosi rini sari mua zinama ba lopu tavete luli rini.

33 Pana gorevura sari doduru hire, si tiqe kote tumae nia rini sapu keke poropita si koa turaṉia rini, meke hinokara kote gorevura sari.”