1 Ke gua asa, si mada rizu nono latu koari na vina tumatumae pu boka va kamo gita pa tinoa komihana. Mada lopu zama pilipule ni sari na vina tumatumae pu ele avosi mo gita tatasana. Mada lopu va turu sinokirae lamo koasa vina tumatumae tana kinekere pule koari na tinavete sapu la pa minate meke na vina hinokara koe Tamasa; 2 gua tugo sari na vina tumatumaedi rina pinapitaiso, na vina opo lima pude va madi saripu va hinokara, na tinuru pule pa minate, meke sa vinaripitui pa rane mumudi. 3 Ba gua tu he si kaqu tavetia gita, mada rizu hola latu, be gua asa sa hiniva te Tamasa.

4 Ura vegua meke kote boka va kekere pule maei gita saripu ele kilua sa vina hinokara koe Karisito? Tasuna hola pude evaṉia sapu gua asa. Sina ele tagoa tu rini sa kalalasa te Tamasa, ele va gilagila ia tu rini sa vinariponi maena pa maṉauru, meke ele somana tagoa tu rini sa Maqomaqo Hope. 5 Ele gilania tu rini sa lineanana gua sa zinama te Tamasa, meke ele va gilagila ia tu rini sa ṉiniraṉira tanisa Binaṉara te Tamasa sapu korapa nono mae, 6 ba luara pania rini sa vina hinokara koe Karisito. Ke tasuna hola pude va kekere pule maei si arini, sina guana va mate pulea rini sa Tuna Tamasa, meke va kurekurea rini si Asa pa kenudi rina tinoni.

7 Sa pepeso sapu ponia ruku sa Tamasa pude va bobosia, meke toa valeana sari na linetelete, si variva qetu koasa tie pu tavetavete koasa pepeso asa. Tamanaena sa pepeso sana. 8 Ba be siṉia mo na huda rakihi, na hiqohiqo kaleadi si asa, si namu loke nana vinari tokae si asa koasa tie pu tagona sa, ke tata mae mo sa totoso sapu kote leve nia Tamasa, meke ta sulu pa nika si asa.*Zen 3:17-18

9 Kasa qua baere, zama ni rau si gua hire, ba korapa raṉe gamu rau si gamu sapu kote lulia gamu sa siraṉa sapu kamo la pa tinaharupu. 10 Vilavilasa va toṉoto sa Tamasa, meke lopu kote muliṉi nia Sa sa mia tinavete na tataru sapu vata dogoro nia gamu pa mia tinokae koari Nana tie meke sapu korapa tokani gamu si arini. 11 Sa qua ṉati inokoro si pude hopeke gamu si kaqu va podepodekae sisigiti pa mua ṉinaliṉali pude mi boka vagi sari doduru gua pu okoro vagi gamu, osolae kamoa sa vina betona mua tinoa. 12 Mi lopu koa hakohako. Hivani gamu rau pude mi keha luli gamu si arini pu va hinokaria sa Tamasa, meke vagi va ṉoṉoa gua sapu gua va tatara ni sa Tamasa.

13 Totoso tavetia Tamasa sa Nana vina tatara koe Ebarahami, si tokotokoro nia Sa si asa pa pozana soti Telena, sina loke pozapoza pule si koa sapu noma hola nia sa pozana Sa. 14 Zama guahe si Asa koasa Nana tinokotokoro:*Zen 22:16-17 “Kaqu mana nigo Rau meke kaqu poni va soku nigo Rau sari tutimu,” gua si Asa. 15 Ke mudina sapu aqa va ṉoṉo se Ebarahami ke vagia tugo sa sapu gua va tatara nia Tamasa koasa. 16 Pana tokotokoro si keke tie si kote poza ia sa sa pozana keke tie sapu noma hola nia si asa, ke gua asa si kote beto mo sa vinaritokei. 17 Koa rini pu kote vagina sa Nana vina tatara, si hiva va bakala valeana ni Tamasa sapu lopu kaqu hobea Sa sa Nana hiniva, gua asa ke tomo la nia Sa sa tinokotokoro koasa Nana vina tatara. 18 Koa ri karua tiṉitoṉa sapu lopu boka ta hobe, sa vina tatara meke sa tinokotokoro, si lopu boka kokoha sa Tamasa. Gua asa, ke gita pu raṉea sa Tamasa pude kopuni gita si mada raṉeraṉe pude soto va nabu koasa vina tatara pu ta poni nia gita. 19 Sa vina tatara hie si raṉe va nabua gita sapu guana nada sigoto pa tinoa, na vinasare hinokara si asa, sapu va kamo la gita pa Lose Hopena pa Hopena pa mudina sa poko goba pa kokorapana sa Zelepade pa Maṉauru.*Liv 16:2 20 Zisu si ele nuquru va kenue la vasina pude tokani gita, meke ta evaṉae na Ṉati Hiama Kenukenue si Asa, pa kinehana e Melekizadeki.*Sam 110:4