1 Se Melekizadeki hie si na baṉara si asa pa popoa Salema pukerane, meke na hiama si asa tanisa Tamasa Ululuna Hola. Totoso pulena pa vinaripera se Ebarahami, sipu va kilasi sa sari ka made baṉara, si tutuvia Melekizadeki si asa, meke mana nia sa.*Zen 14:17-20 2 Pa totoso asa si ponia e Ebarahami koa sa si keke pa manege koari doduru tiṉitoṉa pu vagi sa pa vinaripera. Melekizadeki ginuana si na “Baṉara tana tinoṉoto”. Ba sina koa baṉara pa popoa Salema si asa, ke poza nia Baṉara Salema rini si asa. Salema ginuana si na “binule.” 3 Lopu ta tumae sapu ari sei sari na tiatamana e Melekizadeki. Lopu ta tozi tugo vasina tututi gore mae si asa, meke lopu ta tozi tugo sa nana pinodo, na minate. Gua asa ke na hiama si asa ninae rane ka rane, kekeṉoṉo sa Tuna Tamasa.

4 Ke dogoria gamu? Arilaena hola se Melekizadeki, ke se Ebarahami sapu sa tamada nomana, ba ponia sa koa sa si keke pa manege koari doduru tiṉitoṉa pu vagi sa pa vinaripera. 5 Sari na hiama pa tutina e Livae si tava malumu si arini pa Tinarae te Mosese, pude kote vagia rini koari na tie si keke pa manege. Ba sari kasa tie Izireli arini sina tutina tugo mo e Ebarahami.*Nab 18:21 6 Melekizadeki si lopu na tutina e Livae ba vagia sa sa keke pa manege koe Ebarahami meke mana nia sa se Ebarahami sapu vagidi sari na vina tatara te Tamasa. 7 Gilana valeania gita sapu asa pu ponia sa minana koa keke tie, si arilaena hola nia sa si asa pu vagina sa minana. 8 Sari na hiama pa tutina e Livae saripu hoke vagia sa keke pa manege, si lopu toa hola si arini. Ba se Melekizadeki hie sapu vagina sa keke pa manege koe Ebarahami si toana gua sa Kinubekubere Hope. 9 Ke boka zama gua tugo he si gita sapu se Livae ba ele ponia tugo koe Melekizadeki sa keke pa manege somanae koe Ebarahami, sapu sa tamana nomana pukerane. 10 Hinokara sapu lopu ele podo se Livae totoso toa nana se Ebarahami, ba ele koa nana mo si asa pa eharana Ebarahami totoso tutuvia Ebarahami se Melekizadeki.

11 Koa gua koasa tinavete hiama tadi na butubutu Livae si ta poni nia rina butubutu Izireli sa Tinarae te Mosese. Ego, be ele gotogoto mo sa tinavete hiama pukerane, si lopu kaqu ta hivae si keke hiama vaqura pule pude mae, sapu pa kinehana e Melekizadeki ba lopu pa tutina e Eroni. 12 Ura be ele ta hobe sa tinavete hiama, si kote ta hivae tugo pude ta hobe sa Tinarae te Mosese. 13 Ura sa hiama sapu korapa ta vivinei tani si maena tu pa keke votiki kali butubutu Izireli, lopu gorena mae pa tututi hiama koe Livae. Meke loke tie tugo koasa kali butubutu pu gore mae ia Sa si ele ta evaṉae na hiama. 14 Ba sapu ta gilana valeana si ta podona mae tu pa butubutu Ziuda se Zisu sa nada Baṉara. Ba totoso vivinei ni Mosese sari na hiama, si lopu hite poza hokaria tu sa sa butubutu Ziuda.

15 Bakala mo koa gita kamahire sapu ele mae si keke hiama vaqura sapu gugua e Melekizadeki. 16 Lopu ta evaṉae hiama si asa pa tinarae na vinaturu tana tie, ba pa korapa ṉiniraṉirana sa tinoa sapu loke kokoina. 17 Sina ele tava sosode pa Kinubekubere Hope sapu guahe:*Sam 110:4

18 Sa Tinarae koana te Mosese si ele ta veko palae, sina malohoro si asa, meke loke nana vinaritokae pa tie. 19 Ura sa Tinarae te Mosese si lopu boka va evaṉae nia tie toṉoto si keke tie pa dinoṉo te Tamasa. Ba keke siraṉa leanana hola si ele ta poni nia gita sapu boka va tata la gita koe Tamasa.

20 Meke keke pule si hie, sapu sa tinokotokoro te Tamasa si lopu ele hite ta evaṉa totoso tava turu pude na hiama si keke koa rini pa tutina e Livae. 21 Ba e Zisu si ta evaṉae na hiama koa sa tinokotokoro te Tamasa sapu zama guahe:*Sam 110:4

23 Meke hie pule si keke vinotikaena, totoso mate si keke rina ṉati hiama kenukenue pa tutina e Livae, si lopu boka hoda la sari nana tinavete. 24 Ba e Zisu si lopu gua asa. Toa hola ninae rane si Asa, ke sa Nana tinavete hiama si lopu tava karovo la pa keke tie, ba hoda la ia mo Sa telena. 25 Gua asa ke boka si Asa kamahire meke ninae rane pude harupi saripu mae koa Sa meke kamo la koe Tamasa, sina toana si Asa ninae rane ka rane, pude varavara toka ni sari Nana tie.

26 Gua asa, ke Asa sa Ṉati Hiama Kenukenue sapu tokani gita, meke madina si asa pa dinoṉo te Tamasa. Loke Nana sinea, meke loke tiṉitoṉa boka va kaleania si Asa. Paqaha vagi vata kalea Tamasa si Asa koari na tie kaleadi, meke va lavatia Sa si Asa pa Maṉauru. 27 Se Zisu si lopu gugua rina ṉati hiama kenukenue pa butubutu Livae. Lopu kilu tavete vina vukivukihi doduru rane si Asa pude va vulasa sinea gugua arini. Lopu tavetia Sa sa vinukivukihi Tanisa, meke mumudi koari na sinea tadi na tie, sina loke Nana sinea si Asa. Keke totoso mo va vukivukihi nia Sa sa Nana tinoa soti pude na vinulasa tadi doduru tie.*Liv 9:7 28 Koa sa Tinarae te Mosese, si ari na tie pu malohorodi si ta vizata pude na ṉati hiama kenukenue. Ba koasa vina tatara vaqura pu koa ia na tinokotokoro pa mudina sa Tinarae te Mosese, si vizatia Tamasa sa Tuna soti pude na Ṉati Hiama Kenukenue sapu tava gotogotona ninae rane ka rane.