2
Sa Baṉara Ta Vizatana koe Zihova
1 Na vegua ke hiva veko pania rina butubutu huporodi sa binaṉara te Zihova?* TTA 4:25-26
Meke vegua ke balabala vekoa rini si pude luara pania sa Nana tinolitolie?
2 Sari na baṉara pa popoa pepeso si ele varigara,
meke va namanama pude varipera la koasa Tamasa meke sa Nana Baṉara sapu vizatia Sa.
3 Meke zama guahe si arini, “Aria mada va kari gedi sari na dia tinarae,
mada vata rupaha puleni gita koari na dia vinaturu pu pusi gita,” gua.
4 Ba sa Baṉara Lavata sapu koa pa Maṉauru,
si hegere ni na va sisire ni si arini.
5 Beto asa si zama va bubugorae la i Sa si arini,
meke va tarazuzu i Sa pa Nana ginegese sapu guahe:
6 “Ba Arau, si ele va turua sa Qua Baṉara,
pa Qua toqere hope sapu pa Zaione.”
7 Zama sa Baṉara, “Kaqu tozi vura nia rau
gua sapu zama nia e Zihova,* TTA 13:33; Hib 1:5, 5:5 sapu guahe:
‘Na Tuqu soti si Agoi,
ṉinoroi si ta evaṉae
na Tamamu Goi si Arau.
8 Mu tepa mae koa Arau,
meke kaqu ponigo Rau sa ṉiniraṉira,
pude totolini sari na butubutu,
meke doduruna sa kasia popoa
si pude koa pa Mua kinopu, na Mua vinagi Goi!
9 Kaqu tagoa Goi sa ṉiniraṉira lavata pude va kilasi,
meke kaqu huara va ineti Goi si arini.’ ”* Rev 2:26-27, 12:5, 19:15
10 Ego, mi koa gilae kamahire ba gamu na baṉara,
mi koa tava balau gamu na tie totoli pa pepeso.
11 Mi nabulu nia se Zihova pa korapa mia pinamaṉana Sa,
mamu qetu na pamaṉa nia.
12 Mi todoṉo pa kenuna sa Baṉara, pude mi lopu ta bugorae koa Sa,
meke tava mate palae si gamu,
ura lopu sana kaqu huruṉu sa Nana binugoro.
Ba tamanae zoṉazoṉa tugo sari doduru
pu aqorae koa Sa.* 2 Samuela 15:13 kamo hinia 17:22