1 Yesu Keliso Yaubada natuna wasana namwanamwana ye hetubu doha teina: 2 Yaubada yona hedehedede wa Aisaiya peloweta yona buka unai, ye wane:

4 Unai Yowane ye laoma. Balabala unai ye miyamiya na ye hebahebabatiso. Ye laulauguguya bena tamowai se nuwabui na babatiso se hai, yodi yababa nuwatugabaedi hesabana. 5 Teha Yudeya yo Yelusalema magaina udiyedi taumiya maudoidi se lau iya unai. Yodi yababa se hededehemasalahadi na Yolidani sagasagana unai ye hebabatisoidi.

6 Yowane kana kwama kamela wiyana unai se ginauli na kana dagilolo meta suisui dahina. Na kana kai meta mwadimwadi yo kamwakamwa. 7 Ye hededehemasalaha ye wane, “Tamowai hesau kabo ye mulitama. Iya ye saekalili na kabo yau. Na nige gonowagu taba ya dunedobi iya kana sendolo mainadi ya yailidi.** Sendolo mainadi ya yailidi: Teina meta heyayai tauhaidi dobidobidi yodi paisowa. 8 Yau waila unai ya hebabatisoigomiu, na iya kabo Yaluwa Tabuna unai ye hebabatisoigomiu.”

9 Tem huyana ne unai Yesu teha Galili magaina hesau hesana Nasaleta unai ye laoma ede Yowane ye hebabatisoi Yolidani sagasagana unai. 10 Waila wa unai ye gayo ye sae na ye kitasae ede galewa ye kita ye taigali, na Yaluwa Tabuna kana kao doha bunebune ye dobima iya kewana ne unai. 11 Na kalina hesau galewa ne unai ye laoma na ye wane, “Kowa natugu! Ya gadosisikaliliyeigo, yo nuwagu ku henamwakaliliyei!”

12 Mahanana ne unai Yaluwa Tabuna Yesu ye hetamali ye lau balabala unai. 13 Mayadai 40 balabala unai suisui kaikaikalasidi kalidiwai ye miya. Na Satani Yesu ye laukita, na kabo anelu iya se kitahetete.

14 Huya hesau Heloda wasawasa Yowane ye gudui numatutugudu unai. Kabotaki Yesu ye lau Galili Yaubada wasana namwanamwana ye lauguguyaei, 15 ye wane, “Huyana ye lagemako, Yaubada yona basileiya ye hanahanaumako. Nuwamiu kwa buidi yo wasa namwanamwana ta kwa kawamamohoiyei.”

16 Huya hesau Yesu Galili Gabwana** ↑Galili Gabwana meta waila lakilakina teha Galili unai, kana kao doha gabwa. dedekana wa unai ye yona ye laulau ede tauyamayama labui ye kitadi, Simona ma kana kaha Andeleya yodi hinaya unai se yamayama. 17 Na kabo ye yoganedi ye wane, “Kwa saema kwa hemuliwatanigau, na kabo ya hekatagomiu tamowai tauyamayamaidi.” 18 Na mahanana ne unai yodi hinaya wa se laugabaedi na Yesu se hemuliwatani.

19 Yesu ye taulau na kabo Sebedaiyo natunao labui Yowane yo Yamesi ye kitadi yodi waga unai yodi hinaya se polapolaidi. 20 Na ye yogalau yodi labui wa udiyedi na waga wa se pesagabaei, na tamadi Sebedaiyo ma kana hewahewaliyo se laugabaedi na Yesu se hemuliwatani.

21 Kabo Yesu yona hekahekatao maiyanao se lau se lage Kapelenauma unai, na kabo Sabati** Sabati kaniyona ku hasili Hedehedede Lakilakidi Kabahemasalahadi unai, ↑Sabati unai. unai ye mwalaesae sunago** Sunago hededehemasalahana Hedehedede Lakilakidi Kabahemasalahadi unai, ↑Sunago unai ku hasili. unai, na ye hetubu ye lauhekata. 22 Yona lauhekata wa se nokoei, matawuwuna ye hededehasahasaidi ma gigibwalina, nige doha laugagayo taulauhekataena tamowaidi.

23 Sunago wa kalonawai tamowai hesau yaluwa bikibikina iya ye luwui na ye yogayoga 24 ye wane, “Saha ku henuwa kalimaiyena, Yesu Nasaleta tamowaina? Ku laoma bena ku heyababagai? Kabim ya kata kowa kaiteya: Kowa Tabuna Yaubada unai ku laoma.” 25 Na Yesu ye hededebayao iya unai ye wane, “Ku mwanou na tamowai me ku pesagabaei!” 26 Yaluwa bikibikidi wa tamowai wa ye nukui na ye yogahi yo ye pesagabaei.

27 Siya maudoidi se noko na se henahenamaiꞌuyoidi se wane, “Teina ta saha? Teina ta meta lauhekata hauhauna yo ma gigibwalina! Ye hededelau yaluwa bikibikidi udiyedi, na se kawakabiyei!” 28 Nige bayaona iya wasana ye lau Galili maudoina ye hetakikili.

29 Sunago wa unai se pesa se lau Simona ma kana kaha Andeleya yodi numa unai se mwalae, Yamesi yo Yowane maiyadiyao. 30 Simona bwasiyana sinebada tauna se gwagwama yo ye kasiyebwakalili na ye kenokeno, na wasana se hededelau Yesu unai. 31 Ede ye laoma na ye kabilau nimana ne unai na ye kabihetolo. Na sinebada wa ye namwanamwa, ede ye tolo na ye haitalaidi.

32 Mahana wa ye dui kabo taukasikasiyebwa gwaudi yo hinage tamowai yaluwa yabayababadi siya se luwuidi wa se woyaidima Yesu unai. 33 Magai tamowaidiyao bodalakilaki se lagegogoi numa kawamatana wa unai. 34 Tamowai kadi kasiyebwa udoiꞌudoi ye henamwanamwadi. Yo yaluwa yabayababadi gwaudi ye hededehepesadi na ye hededehekaiyawasidi tabu se hedehedede, matawuwuna ede iya kabina se katako.

35 Malatomtom gagilina huyana sola ma masigilina na Yesu numa wa ye laugabaei na ye lau balabala hesau unai ye tapwalolo. 36 Na Simona ma kana kahao se lau iya se wasenei. 37 Yesu se lobai ede se hededelau unai se wane, “Tamowai maudoidi se wasewaseneigo!” 38 Na ye hededelau udiyedi ye wane, “Taba ta lau magai hekadiyo udiyedi hinage ya lauguguya, matawuwuna teina hesabana ede ya laoma ta.” 39 Galili se tauhetakikili na Yesu ye lauguguya sunago udiyedi, yo hinage yaluwa yabayababadi ye hededehepesadi.

40 Na temenai tamowai hesau kana kasiyebwa meta lepela. Ye laoma Yesu unai ye tulibono na ye kaibwadakatekamkamna ye wane, “Ena ku henuwa, kabo gonowana ku heꞌaꞌagau.” 41 Yesu tamowai wa ye katekamkamnaei na nimana ye helelelaei ye kabilau unai, na ye hededelau unai ye wane, “Ya henuwa, ku aꞌa.” ** Ku aꞌa: Kasiyebwa lepela meta Dius kalidiwai iya kabahebikidi (Lewitikasi 13:1-3). Unai henamwanamwa nuwanuwatuna se hedede ede heꞌaꞌa (↑lepela). 42 Na mahanana ne unai kasiyebwa lepela wa ye ulugehe na tamowai wa ye namwanamwa. 43 Kabo Yesu ye hededebayao iya unai ye wane, 44 “Tabu tamowai hesau yona ku hedehedede. Na ku lau taukaitalasam unai ku hemasalahago na ye kitasipwaigo. Na kabo heꞌaꞌa kaitalasamdi Mose ye hedede wa** Lewitikasi 14:2-4 ku ginaulidi, na kabo tamowai se kitalobai meta ku namwanamwako.” 45 Na tamowai wa ye pesa ede ye lau wasana wa ye hededehemasalaha yo ye helaki. Unai Yesu nige gonowana ye taumasalaha magai udiyedi, na balabalagaibu udiyedi ye miya. Na teha maudoina tamowaidi se laoma iya unai.