Abadantaa, maa šerretaray se, lakkal daŋ ay wurroo se!

Haŋajer ay ŋaarayroo se kaŋ ra darga sii!

2 Ay ciitoo si hun kala ni do,

ni moɲey ma dii šerretaray!

3 Nʼnʼay binoo guna, nʼnʼa bere-bere cijin here,

nʼnʼay sii, mana dii haya kul.

Ay šenney mana fay nda ay miilewey.

4 Haya kaŋ ti adamizey teegoyey,

ni meešennoo albarkaa ra,

ay nʼay boŋ moorandi fondaa kaŋ boro futawey gʼa zaa.

5 Ay cewey na ni fondaa gana nda cimi,

ay cewey mana tanši.

6 Ay ga ni cee, zama nʼga tuuru ya ne, ay Koyoo.

Ni haŋaa gaaru ya ne, haŋajer ay šennoo se!

7 Ni borohennataraa cebe nda taka kayfante,

ni kaŋ ga ni kabe gumaa ka borey hallasi

kaŋ ga talfi ni ga ka hallasi ngi iberey ra.

8 Ay lakkal sanda ni mootondoo,

ay tugu ni fatawey biyoo cire,

9 ya hun boro futawey ra kaŋ gʼay halaci,

iberey kaŋ tun ya ne kaŋ gʼay kuubi kʼay bere ra.

10 Biney ga kogu,

i ga šelaŋ nda deenebeeray.

11 I goo ir fondaa ga, sohõ i nʼir kuubi ka ben,

i na moo bakam ir ga kʼir kaŋandi ganda.

12 Sanda ganjihayla kaŋ ga fatta ka koy hoo,

sanda ganjihayla soogo kaŋ ga fom.

13 Tun, Abadantaa, kay a se, a taabu ihinka!

Ni takubaa kʼay hundoo hallasi boro futu ra,

14 Abadantaa, ni kaboo kʼay hallasi adamizey ra,

aduɲɲa borey kabey ra!

Ngi bagaa ti aduɲɲa,

ngi gundey too nda woo kaŋ nʼnʼa jisi,

ngi izey ga kungu,

i ga kungu ka cindoo naŋ ngi zankey se.

15 Agay, ay ga dii ni ndumoo ni šerretaraa ra,

za ay tun jirboo ra, ay ga dii ni ka wasa.