18
Albarka ma bara Abadantaa se kaŋ gʼay kaa agay iberey ra
(Samiyel 2to 22.1–51)
1 Donkey boŋkoynoo ka woo don. Woo ti Irkoy tamoo Dawda dooni foo. Waatoo kaŋ Abadantaa na Dawda kaa nga iberey kul kabey ra, kʼa kaa Sawul kaboo ra, nga ra Dawda na baytoo woo kalimawey don ka Abadantaa saabu.
2 A nee: «Abadantaa, ay ga baa ni, ni ti agay albarkaa!
3 Abadantaa ti ay Tondoo, ay nongu gaabantaa, ay feerikaa.
Ay Koyoo, ay Tondoo, nga ga ay ga wakkal,
nga ti ay koraa, ay hallasikaw gaabantaa,
nongoo kaŋ ra ay ga tugu.
4 Ay ga kaati ka nee: ‹Albarka ma bara Abadantaa se!›
Ay hallasi agay iberey ra.
5 Karfey kaŋ ga wiiya nʼay haw,
ay hunbur sanda isa kaŋ futu ka boosu.
6 Alaahara karfey nʼay kuubi kʼay bere,
buuyan filijey goo ay jine.
7 Ay binemarayyanoo ra, ay na Abadantaa cee,
ay nʼay Koyoo cee a mʼay faaba.
A na haŋajer ya ne nga hugoo ra,
ay faaba ceeci kaatiroo kaŋ haŋawey ra.
8 Laboo hun dogoo ra, a jijiri,
tondi hondey asaasey jijiri,
i guzuguzandi, zama Abadantaa nka futu.
9 Dullu no ma hun niiney ra,
nuune kaŋ ga wiiya ga hun miɲoo ra,
denji cirayyaŋ ga hun a ra.
10 A na beenaa šiirandi ka zunbu
nda duula koma kaŋ goo cewey cire.
11 A mana kaaru kala almalayka boŋ kaŋ se i ga nee šerib ka deeši,
a ga talala hewoo bande.
12 A na kubaa tee nongoo kaŋ ra a ga tugu, a tee a se tende,
a nʼa tee hari kubayanteyaŋ nda duula komanteyaŋ.
13 Gaay ga dii a jine kaŋ ra duulayaŋ ga hun,
nda gari nda denji cirayyaŋ.
14 Abadantaa jiŋjiŋ beenaa ra,
Koy Jerantaa na nga jindoo jer,
gari nda denji cirayyaŋ bangay.
15 A na nga biraw-izey warra kʼi say,
a na meley boobandi ka lakkaley tunandi.
16 Abadantaa, ni burbusuyanoo ga,
ni futuyanoo hewoo ga,
teekoo ciroo hayey bangandi,
aduɲɲa asaasey fatawandi.
17 Irkoy goo beene, a ga nga kaboo šerre kʼay zaa,
kʼay kaa hari beerey ra.
18 A gʼay kaa agay iberi gaabantaa ra,
kʼay kaa borey ra kaŋ ga konna agay, kaŋyaŋ gaabey bisa ay wanoo.
19 Ay bonaa zaaroo hane iberey kay ay jine ngi mʼay tangam,
amma Abadantaa kay ya ne.
20 A nʼay kaa ifutu ra kʼay feeri,
a nʼay hallasi, zama ay ga kan a se.
21 Abadantaa nʼay šerretaraa guna ka goy ya ne,
a nʼay bana ka sawa nda ay kabe goyey henanyanoo,
22 zama ay na Abadantaa fondawey gana,
ya nʼay Koyoo tooɲe.
23 Nga hantumey kaŋ kayandi kul goo ay jine,
ya na nga hantumey moorandi agay.
24 Ay laadir a jine,
ay nʼay boŋ dii ifutu kul ga.
25 Woo se Abadantaa nʼay bana ka sawa nda ay šerretaraa,
nda ay kabey henanyanoo a jine.
26 Boro kaŋ ga laadir, nʼga goy a se nda laadirtaray,
boro kaŋ binoo ti affoo, nʼga goy a se nda bine foo.
27 Boro kaŋ ga henan, nʼga goy a se nda henanyan,
boro kaŋ ga šiiri, nʼga goy a se nda carmay.
28 Zama ni no ma boro yalaafantey hallasi,
nʼga hundi beerey moɲey yeeti ganda.
29 Abadantaa, ni no mʼay fitillaa diinandi,
ay Koyoo, gaay daŋ ay kubaa ra.
30 Ni bande ay ga sar ka gum wongu-ize jama ga,
ay Koyoo bande ay ga hin ka cete sar.
31 Irkoy fondaa tee ka timme,
Abadantaa šennoo ga henan,
koray no borey kul se kaŋ ga ngi boŋ talfi a ga.
32 Adiši may ti Irkoy nda manʼti Abadantaa?
May ti tondi kaŋ ga boro ga hin ka talfi nda manʼti ir Koyoo?
33 Irkoy na albarka tee ya ne gamahaw,
nga no mʼay fondaa hanse.
34 A gʼay cewey cahãndi sanda jeeri,
a gʼay kayandi hodaddawey boŋ.
35 A gʼay kabey waanandi wongu,
ay kabey ga alhan biraw taabu.
36 Nʼgʼay noo ni koraa kʼay hallasi,
ni kabe gumaa gʼay faaba,
ni borohennataraa gʼay tonton.
37 Nʼgʼay cee diraa fondaa hayandi,
ay cewey si cabu.
38 Ay ga agay iberey gaarandi, ay ga duu ey,
ay si willi kate nda ay manʼi tuusu kʼi benandi.
39 Ay gʼi halaci, i si hin ka tun,
i ga kaŋ ay cewey cire.
40 Nʼna albarka tee ya ne gamahaw wongoo se,
nʼga agay nkuwawey taabu ay cire.
41 Nʼga agay iberey zurandi ay jine,
ay ga borey kaŋ ga konna agay halaci.
42 I ga kaati ka faaba ceeci, amma hallasikaw sii no.
I ga Abadantaa cee, amma a si tuuru i se.
43 Ay gʼi musay sanda bolongu kaŋ hewoo nʼa zaa,
ay gʼi haabu sanda lolaa laboo.
44 Nʼgʼay kaa jama gurgay ra,
nʼgʼay daŋ gandawey jine,
jama kaŋ ay sʼa bay ga boŋdum ya ne.
45 Za ay šelaŋ, nga no i ga hayaa tee,
yawyaŋ gʼay zanzaŋ.
46 Yawey alfaydaa ben,
i ga fatta ngi tugudogey ra nda jijiriyan.
47 Abadantaa ga huna, albarka ma bara ay Tondoo se!
Irkoy kaŋ ti ay Hallasikaa ma jerandi.
48 Irkoy ga faasa ya ne,
ka gandayaŋ daŋ ay hinoo cire.
49 A gʼay kaa agay iberey ra.
Nʼgʼay fur agay nkuwawey boŋ,
nʼgʼay kaa boro futu ra.
50 Woo maaganda se, Abadantaa, ay ga albarka daŋ ma ne gandawey ra,
ka don ni maaɲoo se.
51 Abadantaa ga haya beeriyaŋ tee nga kokoyoo hallasiroo se.
A ga goy nda borohennataray nga suubantaa kaŋ yonandi se,
maanaa Dawda nda nga hayroo se hala abada.»