2 Beenaa ga Irkoy daržaa bayrandi,

beenaa farroo kul ga nga teegoyey har.

3 Zaari foo kul ga filla zaari tana se,

cijinoo ga deede cijin tana se.

4 Manʼti deedeyan no, manʼti šenniyaŋ no,

boro si maa jindey.

5 Ngi alhabaroo goo laboo kul ga,

ngi jindey ga koy hala aduɲɲa kaydogey ga,

no din ra a na hukkum cin waynaa se.

6 A ga hima nda aru hiiji taaga kaŋ ga fatta nga hugoo ra,

a ga ɲaali, sanda wongaari a ga nga fondaa zaa.

7 A ga tun beenaa kaydogey ga,

a ga nga zuraa benandi boŋ faa ga,

nga konnoo si haya kul naŋ.

8 Abadantaa ašariyaa ga timme, a ga albarkaa daŋ boro ra.

Abadantaa seedetaraa ti cimi, a ga boŋbii noo lakkal.

9 Abadantaa fondawey ga šerre, i ga bine ɲaalandi,

Abadantaa yaamarey ga henan, i ga moo feeri.

10 Abadantaa hunburaa, žiibi sii a ra, a ga bara hala abada,

Abadantaa hantumey kaŋ kayandi ti cimi, i kul ga šerre.

11 Ngi alkadaroo bisa wura, ba wura alhakiika,

i ga kan nda yuu, ba yuwoo kaŋ ga doo ka hun ayu tejoo ra.

12 Agay hunday, ni tamoo, nʼgʼay cawandi nda ey,

boro kaŋ gʼi dii, nga nafaa ga boobo.

13 May no ma nga boŋ firkawey bay?

Mʼay dii henanante hayey kaŋ ga tugu ya ne se!

14 Koyne mo, agay, ni tamoo gagay ya si muray ka zunubu tee,

i masi hin agay,

woo ra taali si diyandi ay ga, ay ga henan laybu beeri here.

15 Abadantaa, yala ay miɲoo šenney

nda ay binoo miilewey ma kan ma ne,

ni kaŋ ti ay Tondoo nda ay Hallasikaa!