1 Hâyisha Natani enyuma lya Samweli, alêba oku ngoma ya Daudi.

2 Kula bananûla amashushi oku cimasha c’enterekêro y’okuvuga omunkwa, kwo Daudi acîshozirwe ekarhî ka bene-Israheli. 3 Ashâsa empangaza kula bashâsa omwâna-hene, eciryanyi kula bajira omwâna-buzi. 4 K’arhabâga aciri murhò ayîrha n’entwâli, akûla ecihugo nshonyi: ahè­ba ehibuye oku muzâreti, ahibanda hyanakoza, atwa Goliyati ifêka? 5 Aho erhi amâshenga Nyamuzinda w’Enyanya, naye Nyamuzinda amuhà emisî y’okuyîrha omulwî mukulu, n’okuzûsa ihembe lya Israheli*47, 5 Israheli: lolà 1 Sam 17. . 6 Okwo kwarhuma bamuhà irenge lya bihumbi ikumi†47, 6 Bihumbi ikumi, lolà 1 Sam 18, 7., bàmukuza omu mugisho gwa Nyamuzinda, bàmuyambika akashala k’irenge. 7 Ashâbira abashombanyi bali eburhambi, aherêrekeza abashombanyi b’e Filisteya, àbalambika burhazûka. 8 Omu mikolo yâge yoshi, akuza Omwimâna w’Enyanya n’ebinwa by’irenge‡47, 8 Binwa by’irenge: Nnanga za Daudi, lolà 2 Sam 23, 1.; acîtakîraye n’omurhima gwoshi, ayêrekana oku azigira Lulema. 9 Ahira ennanga aha luhêro, omulya gwâzo gwakazirhuma izùu ly’abazihi lyayinjiha okurhalusire. 10 Ayinjihya ensiku nkulu, zalangashana okulushîne, Obwimâna bw’Izîno lya Nyamuzinda bwakuzibwa, ecirhînyiro§47, 10 Cirhînyiro: hantu harhînywa, ha lukengwa, aha luhêrero. ca Nyamuzinda cakazidumûka kurhenga sêzi. 11 Nyamuzinda àmubabalira ebyâha byâge*47, 11 Ebyâha byâge: lolà 2 Sam 12, 13.24, ensiku n’amango, amujirira endagâno y’obwâmi, amuhà entebe y’irenge omu Israheli., àlengereza obuhashe bwâge ensiku zoshi, amuhà endagâno y’obwami, entebe y’irenge omu Israheli.

12 Salomoni, mwene Daudi, muntu mwîrhonzi, ayîma omu by’îshe; n’oku burhabâle bw’îshe alama omu iragi. 13 Salomoni arhegeka ecihugo omu mango g’omurhûla, Nyamuzinda àmuhira omurhûla eburhambi n’obundi, mpu ly’ayûbakira Izîno lyâge enyumpa, anarheganye ecirhînyiro c’ensiku n’amango. 14 Nêci, wali murhimanya omu busole bwâwe, wali wa bukengêre bunji nka mîshi! 15 Obukengêre bwâwe bwahundikire igulu, waliyunjuza migani mizibu. 16 Irenge lyâwe lyahika emahanga, wazigirwa omu murhûla gwâwe. 17 Ennanga, emigani, obulenga omu binwa n’amashuzo gâwe byasômeza igulu. 18 Oku izîno lya Nyakasane Nyamuzinda, ye Nyamuzinda rhuderha w’Israheli, walundika amasholo nka byûma, n’ensaranga zakulugira nka mabuye†47, 18 Nka mabuye: obugale bwa Salomoni bwàli bunji bwenêne: lolà 1 Sam 10, 11…; Mat 6, 29. 47, 19: Mujà w’amagene gâwe: lolà 1 Bâm 11, 1-13.. 19 Ci aye! mubiri gwâwe wagurhega abakazi, wacîjira mujà w’amagene gâwe. 20 Ntyo wadôkôza irenge lyâwe, wahira ihanja oku bûko bwâwe, wa­rhuma obukunizi bwacîhonda oku bâna bâwe n’omutula oku iburha lyâwe: 21 amâmimâmi gazûka, Efrayimu azûkamwo obugoma. 22 Ci kwône Nyamuzinda arhayibagiraga obwonjo bwâge, arhatwâga omu kanwa kâge, arhayimaga omwîshogwa wâge iburha, arhaherêrekezagya obûko bw’owalimuzigîre. Ntyo àlekera Yakôbo hikasigwa, na Daudi omuzî gwa kuli ye.

23 Salomoni ajirhamûka haguma na bîshe, asiga ow’oku mulala gwâge, musirhe bwenêne ekarhî k’olubaga, muntu orhagwêrhi bukengêre buci: ye Roboami, ye wasunikaga ecihugo omu bugoma.

24 Yerobwâmi mwene Nebati naye, ajirîsa Israheli ecâha, ayigîriza Efrayimu enjira y’amabî. Kurhenga ago mango, ebyâha byâbo byalugîrira, byarhuma balulizibwa kulî n’ecihugo câbo. 25 Bali bacihêsire omu bibî bya ngasi lubero, byarhuma bahâbwa obuhane.