Xoiteupo Kuna Ep 2

Xoiteue kakati sini xumuweikiriai apimie Kristusu xeika ekisikioma purinuku

1 Tinie ekime xonuxonu xonuxonu xunu erari paie outikiati xumurounuku. 2 Pa yause xosa tinie mua ouropu kapia xoxi xosa texikiniai. Kakinuku mena xouro puroteneai xoxi yaniyani nikau tumupo kapia tinie taikiniai, paiya pa sokisoki yaniyanie Xoiteupo kuna sokau porourouneri xuiapimi nikau kamunikiro xemu saina tina. 3 Ekime siko xokupae pa apimi kini xeika purinuku, sikou xipiki xosikie xouweurouna xoxi kapia kireni sini taikiriai. Sini pa xipiki xosikie xouweurouna kapia kireni tainuku sikou nanunanue xouwewotai kapia taiwotoukiriai. Sini panumu kaki purikiriai yause xosa panumu xoxi kapia xokupa xuiapue kakeri Xoiteue xoxi yause tinikepure ireyetai sini tiku.

4-5 Suau, sikou xoxi kapiae sini ousikiati xumuweikiriai. Sini xiri xumuweteneai apimi sie purinuku. Pana Xoiteue sini xouwesikina xoukemu siketai kapiae xiri koxetai. Nukoe kakati sini Kristusu xeika ekisikioma purinuku. Iyo, Xoiteue sini xouwesikina xoukemu siketai kapia kirenie tini xiyeri titiketai. 6 Nue Kristusu Yesusu xeika siko saisikeretai. Nue mena xouro nukou kokemu sai xosa Kristusu xeika miseisikeretai. 7 Kristusu Yesusupo saina paie kakati nue mua asinaku kapia siko xosa kaketai, pa amure, xurise xokupa yause xosa xokupa apimi nukoe xiri xouwenikina xoukemu tiniketai kapia atarinikepurexina. 8 Tinie Kristusure xotikisuxari, Xoiteue tini xouwetikina xoukemu tiketai kapia kirenie, Xoiteue tini xiyeri titiketai. Paiya tini takieni kakikiriai sapixe. Xuwe. Xoiteue tini aini tiketai. 9 Paiya tini saina tinuku xe tikiriai sie xuwe. Pa xati kire apue nukou wenumuni xourorepuwatixe. 10 Kristusu Yesusue kakati Xoiteue sini oma xuimiapimi saisikeretai, paiya siko asinaku kapiapu imerei texepure ekimeni Xoiteue ireiyerisikeyai ime.

Kristusue xiwai kapia xuweiyati aimore kinie kireni tutuxineri

11 Tini sipa, Yuta apimie apimi nikau mupuniki ipisa kakirounerie, tini ipaki kakikirouneri, “Nini mupuniki ipisa katiwopu xuweu apimi,” xirouneri. Paiya apimie nikou mupuniki masaureni mamarikaurounerire kunawotai. Paina tini atinari nanuwa, ekime tini xetau xeteneai xuiapu purinuku, 12 pa yause xosa Kristusu nutiemu puropu xuwe. Tini Israili kini xeika puropu xuwena kisau purikiniai. Xoiteue Israili xeika sokisoki kuna kunarina nini xeika kuna ouna xoniki tumareyaina tini paiya nini xeika purarixe. Tini mua ouro purinuku, sewai kire asinaku sapi purotai putawopina tini yakuwarixe. Pa xeika tini Xoiteu sipa xuwe. 13 Ekime tini xetauroni kutu purikiniai. Pana muaiya Kristusupo yawie sotiki koati, Xoiteu nuko nutiemuni kutu purinuku. 14 Kristusu nukoini kakirouwati sini xosikikururei xirini ati misinuku. Ekime Yuta kinie xetau xeteneai apimi xeika xiwaixirouneri, kakeri pa xiwai kapia paie sepuri sie Yuta kini xeika xetau xeteneai apimi kini xeika purotai. Pana Kristusu nukou mupoini pa sepuri kereuweina pa xiwai kapia xuweiyeina, pa aimore kini kunununikerina kireni kini nikeretai. 15 Nue Mosesipo tuxotapa xeika xokupa kuna masa xeika nupo kireu xetau tuxotapa xeika xesauwetai. Nue aimore kini kunununikerina, kireni apu sieinikerepure pa kapia kaketai. Nue pa kapia kaketai xati sini xosiki tumaxi purinuku. 16 Kireni mupoe pa aimore kinie Xoiteu xeika xoniki tumaxi puropinerire na nikitoto xosa xumotai. Kakina ekime puroyai xiwai kapia na nikitoto xosa xumuwetai. 17 Nue kouna asinaku kuna ipaki uteina, “Tini ximine xotikikemu kirenini pura,” xetai. Nue mua asinaku kuna tini xetauro wese purixanaukiriai apimi kini xosa uteiwotowotai, tomuroni puroteneai xuiapu xosa rania uteiwotai. 18 Xoiteue wesikitati nukou xosa xouwopure, Kristusue panumu kakati Xoiteupo Youyae sini aimore tutuni tianisiketai.

Sini Yesusu taikiriai sini Xoiteupo atani kutu

19 Muaia tini ou xuweu kamariorio puroteneai apimi siexe. Xuwe. Tini Xoiteupo xuiapu tuku kireni kinipu purinuku. Tini Xoiteupo xuiapuni kutu purinuku. 20 Tini Xoiteue xuwotai ata sie. Mua atapu xai sie nue sini Yesusupo tianutianuwopi xeika kunatureture xeika waisikereyai. Yesusu Kristusu nuko paiya akereki xaini kutu. 21 Mua atapu xokupa arawae Kristusu xosa wawaiwoki, kakineri xokupani atineri wawaiwoteneai. Xoiteue pani pa ata xuwati, Xoiteu nukou atani puropinaure pa ata xiri kokaipa xepurexina. 22 Tini rania Kristusu xosa wawaiwari, Xoiteue nukou kireu xuiapu xeika kununuwati, tini Xoiteupo atani kutu xatia, nuko xeika Xoiteupo Supo Youya xekae pa atoro puropineri.

2:1 2.1 Ep 4.18;Kl 1.21

2:1 2.1-5 Kl 2.13

2:2 2.2 Yo 12.31;Ep 5.6; 6.12;Kl 1.21; 3.6-7;Ta 3.3

2:3 2.3 Ro 5.12;Ka 5.16;Kl 3.6;Ta 3.3;1 Pi 4.3

2:4-5 2.4-5 Lu 15.24; 15.32;YT 15.11;Ro 5.6-10; 6.4-5; 6.13; 10.12;Ep 1.7; 2.1; 2.7;Kl 2.12-13

2:6 2.6 Ep 1.20;Kl 2.12

2:7 2.7 Ep 1.7

2:8 2.8 Yo 4.10;Ro 4.16; 10.14-17;Pl 1.29;2 Ti 1.9;Ip 6.4

2:9 2.9 Ro 3.20; 3.27; 4.2;1 Ko 1.29-31;2 Ti 1.9

2:10 2.10 1 Ko 3.9;2 Ko 5.5; 5.17;Ep 4.24;Ta 2.14

2:11 2.11 Ro 2.28-29;1 Ko 12.2;Ep 5.8;Kl 1.21

2:12 2.12 Ro 9.4; 9.8;Ka 4.8;Ep 4.18;Kl 1.21;1 Ts 4.5; 4.13

2:13 2.13 Ka 3.28;Ep 2.17;Kl 1.20

2:14 2.14 Ais 9.6;Mai 5.5;Yo 16.33;YT 10.36;1 Ko 12.13;Kl 1.20; 2.14

2:15 2.15 2 Ko 5.17;Ka 6.15;Ep 4.24;Kl 1.20-22; 2.14; 2.20

2:16 2.16 Sek 9.10;Ro 6.6; 8.3;Kl 1.20; 2.14

2:17 2.17 Ais 57.19;Sek 9.10;YT 2.39;Ro 5.1

2:18 2.18 Ro 5.2;1 Ko 12.13;Ep 3.12;Ip 4.16;1 Pi 3.18

2:19 2.19 Ka 6.10;Ep 3.6;Pl 3.20;Ip 12.22-23

2:20 2.20 Mt 16.18;1 Ko 3.9-11;Ka 2.9;XKY 21.14

2:21 2.21 1 Ko 3.16-17;2 Ko 6.16;Ep 4.15-16;Kl 2.19

2:22 2.22 1 Pi 2.5