Maktubu dɨnə Mãr̰ĩ duwa 1 Tesalonik 1

Maktubu dɨ dii mɨn dɨ Pol jangɨgɨ nare nə Tesalonik

Maktubu dɨ ka dwar̰ɨ

Tesalonik i ciri mɨn dɨ geche dɨ mana gɨ wama gɨ Maseduwannə sumdɨ. Nare nə dam Tesalonik da, nan̰ i nare nə Gɨrek, me Juwib kaw ilə me ca. Paja gɨnə Jesu duwa gɨ Pol day gɨ nə woni hára gandɨw nə Silas day gɨ Timote waygɨ nare Nõ dɨ lade dɨnə Jesu Kris duwa lə pii me, nare nan̰ kal dusɨrəgɨ Jesu dɨwə. Nare nan̰ dwar̰agɨ lə da, i nare nə gɨndəgɨ i Juwib bədə. Me nare nə Juwib nə gɨn̰ dwaya gɨ gɨlə gɨnə Pol duwa bam ilə me ca. Cendi so gandɨw gɨ gwale mwom da, nə Pol di sogɨ hargɨ kal Tesalonik di bam.

Àl aliya sɨr mwom da, Pol giy Timote ba hana dwaynaw gwale gɨnə kretiye nə Tesalonik day (ch 3). Cwara duwa lə da, an̰ji wayɨw Pol da, cendi ba ɗɨbɨ ilə dusi day dɨ kala Mãr̰ĩyə di jang sɨn̰ me, an̰ji cɨmɨw gwale day gɨ cendi ùrɨw di daa me ca. I dara ta di me Pol jangɨ gɨ maktubu dɨ ta di. An̰ji àlɨw Mãr̰ĩ dóche dara dusi dɨ kala dɨnnə nare nə Tesalonik day me dwani day dɨ cendi àl me ca (ch 1-3). An̰ji gɨsɨgɨ me, waygɨ dara cwara gɨnə Jesu Kris duwa di, ba ha ꞌya i man mo, me nare woni kala dusɨrəgɨ dɨwə nə mare me nə dam bɨ̀ra me da, an̰ji ba ha àlagɨ̀ i man mo. Yande da, Pol waygɨ gwale gaba hɨlalagɨ dusɨrəgɨ, ba gɨ ha hára pad dama gɨ Aba ciri gɨ Jesu Kris alə daa mɨn (ch 4-5).

Labiya dɨnə Pol day

1 Ɨndi gɨ Pol me, Silas me, Timote me, nə jangangnin maktubu dɨ ta di, ꞌyeni nare nənə Mãr̰ĩ duwa nə dayar daa mana gɨ ciri dɨ Tesalonik. Anə ɓamar daa gɨ Abɨrandɨ gɨ Mãr̰ĩ mɨn me, gɨ Aba ciri gɨ Jesu Kris mɨn me ca. Kal Mãr̰ĩ piynə bɨw dɨdəngə me, ꞌyànang hɨlala jwam me ca.

Pol àlɨw Mãr̰ĩ dóche dara nare nə Tesalonik

2 Nə àlɨ́wnin Mãr̰ĩ dóche dɨban bwaa gɨ gwayni dara darang pad, me mana gɨ amsa ninnə kaw, nə nɨməngnin bam bədə me ca. 3 Abɨrandɨ gɨ Mãr̰ĩ dɨrəwə da, dusɨrənin gunin daa daa dusi dan dɨ kala dɨ anə àl gandɨdɨ giyə di dɨdə me, dwani dan dɨ anə àl gɨ kwandang di me, ùrə dan gɨ anə ùrgɨ me, anə yɨ gɨ sɨdəng woy kal gɨ ɨrmə dan mɨn Aba ciri ɨnda gɨ Jesu Kris cwara duwa dɨwə me ca. 4 Chamran, nə ꞌwocn̰ɨnin com dara Mãr̰ĩ ùrəng nan̰e me piyəng nɨm dara anə banə ina nare duwa me ca. 5 Nə way yande dara wála gɨ nə gɨranin dannə me nə wayangnin Nõ dɨ ladedɨnə Jesu Kris duwa me da, anə kal gɨ dusɨrəng Jesu dɨwə. Me dusi dan dɨ kala Jesu dɨwə di, i dara gwale gɨ bɨdənin mɨra bədə, me i gɨ dwana dɨnə Mãr̰ĩ duwa me, Dúndi wàa dɨra gɨ wangə me. Nenin kaw, nə ꞌwocn̰ɨnin dara gwale gɨ ba nə wayɨwnin di ba i gwale sɨw me ca. Me mani nə nə àlgɨnin dwar̰angə dara darang da, anə ꞌwocn̰ com.

6 Me ꞌyeni da, anə u i mani nin nə àla me nənə Aba ciri duwa me. Mana gɨ gɨlə gɨ dɨrɨn̰ gɨ nan̰ dalawə kaw, anə yɨ gwale gɨnə Mãr̰ĩ duwa gɨ sii ꞌywala gɨ Dúndi ꞌyàng gandɨw. 7 I yande me caga da, ꞌyeni kaw, anə kɨdɨ nare nə gɨ yər mani nə lade sɨdəngə me, nare woni kala dusɨrəgɨ Jesu Kris dɨwə nə sɨn̰a dɨ Maseduwannə me dɨ Akayyə me ugɨ àl gɨ giyə. 8 I dara ꞌyeni ɗanĩ me, nare nə dam wama gɨ Maseduwannə me nə dam wama gɨ Akayyə me, doy gɨ gwale gɨnə Aba ciri gɨ Jesu Kris duwa. I mana gɨ ciri dɨ ta lə di mɨra me nare doy gɨ gwale di lə bədə, me dusi dan dɨ kala da, nare way gwale dɨra sɨn̰a lə pad, ùr dara ba nə waynanin nenin bá bədə. 9 Gɨ way gwale nin dara yəə gɨ anə yɨnin sɨdəngə wála gɨ nə ꞌwònin dannə me, anə gɨn̰ domde dan bam me, anə co dɨrəng àlɨw Mãr̰ĩ gɨ ɓag gaba dama gɨ dɨrəw giyə an̰ju. 10 Anə dam ɓedɨ Jesu gɨ i Mãr̰ĩ gorndɨw di swaa daa cwara hára lə. I an̰ji me Mãr̰ĩ dɨməw daa munɨ lə an̰ju. I an̰ji me ha kɨdəndɨ daa sariya dɨ hára lə targɨn̰ ib di lə an̰ju.