Maktubu dɨnə Mãr̰ĩ duwa Matiyə 1

Maana dɨnə Jesu duwa dɨ

Matiyə

jangɨdɨ

Maktubu dɨ ka dwar̰ɨ

Matiyə i woni gɨrsə gwale gɨnə Jesu duwa gun day gɨ mɨn (9.9; 10.3). Dúndi dɨnə Mãr̰ĩ duwa nogɨ gɨndɨw ba jangɨna maana dɨnə Jesu mana gɨ maktubu lə. An̰ji jangɨ i dara kwandaw nare nə Juwib dara gɨləgɨ ba Dole gɨ Mãr̰ĩ biyəw gɨ Kris gɨ woni cɨmə Mãr̰ĩ bɨw jangɨ gwale duwa pii di ba i Jesu ꞌyang. Me Jesu di hára i dara nare nə Juwib mɨra bədə. Matiyə gɨlndɨ dara Jesu ba kɨjɨ woni gɨrsə gwale duwa ba hana waynagɨ nare nə gɨndəgɨ jiga jiga pad Nõ dɨ lade mana gɨ sɨn̰a gɨndɨdɨ lə pad (28.19-20).

Diyə gɨ maktubu dɨnə Matiyə duwa gɨndɨdɨ lə da, an̰ji way ba Jesu di gɨ yə̀w i man mo, gɨ àlɨw batem man me Sidan kan̰jɨ bɨrmə gɨrsɨw man me mo (ch. 1-4). Ɨr̰ɨ, an̰ji way dara mani nə Jesu àlgɨ me gɨlə duwa gɨ mani me (ch. 4-25).

Jesu way gwale nan̰ dara dwãr̰ĩ dɨnə Mãr̰ĩ duwa. Matiyə ꞌwogɨdɨ ba i «dwãr̰ĩ dɨ daa». «Dwãr̰ĩ dɨ daa», labaa «dwãr̰ĩ dɨnə Mãr̰ĩ duwa» da, i jiga jiga bədə. Matiyə day gɨlə gɨnə Jesu duwa di daa mana lə jii: Jesu way da, nare nə gandɨ ha ciri dɨ Mãr̰ĩ lam dwãr̰ĩ duwa lə da, ba ha dama i man mo (ch. 5-7). Jesu kɨjɨ paja duwa me gɨsɨgɨ cendi ba ha àla i man me ba ha waya dwãr̰ĩ dɨnə Mãr̰ĩ duwa gwale dɨra mo (ch. 10). An̰ji way gwale gɨ diri dara gɨləgɨ gɨ nare ba i man me Mãr̰ĩ ba lam gɨ dwãr̰ĩ duwa mo (ch. 13). Jesu way gwale dara kala gɨ dusi hɨlala gun dɨwə (ch. 18), me an̰ji gɨlndɨ dara ba də damnang gɨ dɨrəndɨ bɨ̀ra ɓyadɨnaw nɨm ba ha cwara hára lə dara agɨ nare sariya me Mãr̰ĩ ba ha lama dwãr̰ĩ duwa daa pɨden̰yə me ca (ch. 24-25).

Maktubu dɨnə Matiyə yan̰a dɨra lə da, an̰ji way gwale gɨnə Jesu day gɨ nə gechide nənə nare nə Juwib day, ba gɨ ɨlɨwe me, ba gɨ kal nare nə Rom ɓengɨw ɓabɨr̰ɨw daa habda gɨ dagɨla sɨwə me, an̰ji ba mar me, an̰ji ba dɨm daa munɨ lə me (ch. 26-28).

Jesu Kris mwágɨraw sumdəgɨ

(Luk 3.23-38)

1 Dwaynandɨ Jesu Kris mwágɨraw sumdəgɨ: Jesu i Dabid mwàw me Abɨraham mwàw me.

2 Abɨraham i Isak abəw.

Isak i Jakob abəw.

Jakob i nə Juda day gɨ nə chamraw abɨragɨ.

3 Juda i nə Peres day gɨ Jara abɨragɨ, me idəgɨ da, i Tamar.

Peres i Esɨrom abəw.

Esɨrom i Aram abəw.

4 Aram i Aminadab abəw.

Aminadab i Nason abəw.

Nason i Salmon abəw.

5 Salmon i Boos abəw. Boos iw da, i Rahab.

Boos i Obed abəw. Obed iw da, i Rut.

Obed i Jese abəw.

6 Jese i dole gɨ Dabid abəw.

Dabid i Salmõ abəw. Salmõ iw da, i aba mara gɨ Uri dyaməw.

7 Salmõ i Robowam abəw.

Robowam i Abiya abəw.

Abiya i Asa abəw.

8 Asa i Yosapat abəw.

Yosapat i Yoram abəw.

Yoram i Ojiyas abəw.

9 Ojiyas i Yotam abəw.

Yotam i Akas abəw.

Akas i Esekiyas abəw.

10 Esekiyas i Manase abəw.

Manase i Amon abəw.

Amon i Josiyas abəw.

11 Josiyas i Yekoniya day gɨ nə chamraw abɨragɨ. Mana gɨ ta lə da, gɨ lay nare nə Israyel cɨmgɨ daa, hára nɨm mana gɨ sɨn̰a dɨ Babilonnə.

12 Cɨmə day gɨ cendi cɨm ha mana gɨ Babilon di tarɨwə mwom da, Yekoniya gɨra ha yàa Salatiyel.

Salatiyel i Jorobabel abəw.

13 Jorobabel i Abiyud abəw.

Abiyud i Eliyakim abəw.

Eliyakim i Ajor abəw.

14 Ajor i Sadok abəw.

Sadok i Akim abəw.

Akim i Eliyud abəw.

15 Eliyud i Eliyajar abəw.

Eliyajar i Matan abəw.

Matan i Jakob abəw.

16 Jakob i Josep abəw. Josep i Mari tɨrədɨ. Me Mari i Jesu gɨ gɨ ꞌwogɨw Kris di iw. Kris gɨndɨw dɨ biyə da, iDole gɨ Mãr̰ĩ biyəw di.

17 Ta di mwom da, nare dayar daa pad da, i mage mwaj dii wodɨ so Abɨrahammə bɨraa hára Dabid lə. So mana gɨ Dabid lə bɨraa hára laya day gɨ gɨ layagɨ hára gandagɨ mana gɨ Babilon da, i mage mwaj dii wodɨ ɗang. So mana gɨ Babilon bɨraa hára Dole gɨ Mãr̰ĩ biyəw gɨ Kris di lə da, i mage mwaj dii wodɨ ɗang bi.

Yàa gɨnə Jesu Kris duwa

(Luk 2.1-7)

18 Dwaynandɨ Jesu Kris da, gɨ yə̀w i man mo? Mari dɨ i iw di, i Josep me àl mogɨni dɨra an̰ju, me pii gɨ cendi wor laya ciri sɨn̰ da, Mari i gɨ gudi. Tandi u gudi di i gɨ dwana dɨnə dúndi dɨnə Mãr̰ĩ duwa dɨra. 19 Aba àla mogɨni dɨra gɨ Josep da, i gun gɨ tɨba Mãr̰ĩ dɨrəwə me ùr ba a àsɨdɨ Mari jawe dɨdə nare dɨrəgɨ lə bədə. Mwom da, an̰ji ùr ba biy sɨw bam gɨ budə sɨway gɨn̰dɨ bam.

20 Mana gɨ ba ilə ɨrmə lə yande jang sɨn̰ da, paja gɨ daa gɨnə Aba ciri gɨ Mãr̰ĩ duwa dɨmə gɨra àsɨw chine mana gɨ nuniyə me wayɨw da: «Josep gɨnə dole gɨ Dabid mwàw, kal lán̰a dara ꞌwoo gɨ dyam dɨ Mari di ɗi. Dara dwe gɨ ilə nudədɨ lə ta di hára i gɨ dwana dɨnə dúndi dɨnə Mãr̰ĩ duwa dɨra. 21 Gorndɨdɨ gɨ tandi ha yàw di, mə ha ꞌwagaw sumɨw “Jesu”, gɨndɨw dɨ biyə da, iAba kɨdə nare daa. Dara i an̰ji me ha kɨdə nare duwa daa mana gɨ àcn̰a dayyə.»

22 Ta di me i mani nə tanga Aba ciri gɨ Mãr̰ĩ wayɨw aba cɨmə bɨw gwale day di me yala àlal kɨrab. 23 An̰ji waya ba da:

«Yarna, dwe dɨ more dɨ ꞌwocn̰ abe dii mɨn bədə sɨn̰

ha ꞌwoo gudi me ha yàa dwe gɨ abe.

Gɨ ha ꞌwagaw sumɨw Emanuwel»*,

gɨndɨw dɨ biyə da, i «Mãr̰ĩ ilə ganandɨ».

24 Me mana gɨ Josep ba a a daa nuniyə mwom da, an̰ji àl mani nə paja gɨ daa gɨnə Aba ciri gɨ Mãr̰ĩ duwa wayɨw gandagɨ di. An̰ji wàla dyaməw di hára nɨm ulay duwa lə, 25 me an̰ji ɓamar gandɨdɨ deme gɨ abe bədə, bɨraa tandi yə̀ nɨm gɨ dwe gɨ abe di dodə bá. Ɨr̰ɨ Josep ꞌwogɨw dwe di sumɨw Jesu.

*1:23 1.23 Esayi 7.14