32
Tudau etsegtumaka tsagkugnamu
David kantamamu
1 Tudauji ashí tsagkujamua duka
shiig aneastinai.
2 Aents pegkegchau takatan
anentaimtus wekaetuchuk shiig aneastinai.
Tuja tudauji ashí tsagkujamushkam shiig aneastinai.
3 Wika mina tudaujun etsegtumachkunuk,
wake besemag pujau asan ayatak jamaijai.
4 Nuadui ame dekapjau asamin,
tsawaish tuja kashish
senchi waitmaijai.
Yagkug etsa sukuam kagama
numamtuk dekapmamkun,
kakaumainchau dekapmaijai.
5 Nuniakun mina pegkegchaugnak,
makichkish uutsuk etsegtumaktajai
tusan amina ashí ujakmaijame,
nuadui ame mina tudaujuk
ashí tsagkugtugmayume.
6 Nuadui amina umigtamin aidauk,
waituinakush amina segapainawai.
Nuadui nujag dujajak
nugka punag weakush,
ditanak amaigkashtinai.
7 Ametme mina ejamataigmek,
ishamainnumash ame kuitamjame;
nuadui ame agkanmitkajuamun anentaimtusan
shiig aneakun, kantamjagme.
8 Apajuí chichaak:
“Wi aminak diyakjame,
nuadui amina unuinagtasan jintintuattagme,
tuja wiki jintan inaktusan kuitamkattagme.
9 Nuadui caballo, burrojai anentaimchau
asamtai, jagken jijui jinka emetua
mai japia, mai japia,
awajam wegama numamtinuk, amek aipa”,
tujamui Apajuí.
10 Aents pegkegchaun takau aina duka
kuashat waituinawai.
Untsu ima Tuke Pujuuwaig
kajinas anentaimaina nunak,
niina anenke múunta duwi
tuke ijik kuitamui.
11 Aents pegkeg,
tuja takatjish pegkeg aidautigmek,
Tuke Pujuuwai shiig dakujustajum,
¡Nuniakjum nii emematkujum shiig aneasjum senchi kantamjuatajum!