8
INGKARTel antyetyerr-rnem thweneyel Egypt-ampeny-warl
1 Ikwer-penh INGKARTel Moses ilek, “Iley-alha Pharaoh ikwer angka atyenh.” Kel Moses alhek Pharaoh-warl iletyek, “Alakenh INGKART ngkweng ilem, ‘Atyenh-rnem arlpaw-warl alhetyek, atyeng tnakemel inkwerelhetyek. Arrngert angkey-angenh, tyarlewa renh-rnem!
2 Nga arrngert angkentyan, atha antyetyerr-rnem thwenem Egypt-ampeny-warl, apmer ingkerr arrngeletyek.
3 Antyetyerrel-rnem kwaty lher Nile-itwek arrngeletyek. Rernem kwaty-they warl arrpanenh-warl aylpetyek. Ampererrey-alhetyek warl ngkwenh-warl, warl-rnem warrkenh-rnem-kenh-warl, warl-rnem Egypt-areny-rnem-kenh ingkerrenh-warl. Pantyel atnarnpey-alhetyek. Rernem atnarnpey-alhetyek amern amperney-angker-itwek-then arlengarr amernek-arelh-itwek-then ingkerrenh-itwek-antey.
4 Antyetyerr-rnem atnarnpem ngkweng-itwek, warrkenh-rnem-itwek-then, ingkerrenh-itwek Egypt-itwek.’ ” Alakenh Moses-el Pharaoh renh ilek.
5 Ikwer-penh INGKARTel Moses ilek, “Aaron ila, ‘Irretetyel alhel-aretyek kwaty lher-rnem ingkerrenh-warl, kwaty alay-rnem-warl-then kwaty ingkerrenh-warl-antey.’ Ra alhel-arentyel, antyetyerr-rnem kwaty ingkerrenh-they tyerrelhem Egypt-itwek.”
6 Kel Aaron-el irrertetyel alhel-arek kwaty lher-rnem, alay-rnem-then ingkerrenh Egypt-itwek. Antyetyerr akngerr-anem tyerrelhek kwaty-they. Rernem atnarnpey-alhek Egypt-itwek apmer ingkerrenhel.
7 Ngangker-akert-rnem Egypt-areny-rnem rernem irrkaty mpwarek arrpemarl, antyetyerr-rnem ingwer-rnem tyerrelhek kwaty-they arrpemarl. Antyetyerr akngerr innga-anem Egypt-itwek anenh!
8 Ikwer-penh Pharaoh warrkenh anyent ilek, Moses-then Aaron-then ingwerl-alpetyek. Ra renh-atherr ilek, “INGKART ayerna, antyetyerr ingkerrenh iwetyek atyengety, ingkerrenh-kety. Ra iwentyel, atha arrenhantherr tyarlewetyek, arrantherr arlpaw-warl alhetyek, aker tyenkerr INGKARTek arrtyemel anthetyek.”
9 Moses-el Pharaoh ayernek, “Ilenger ayeng angkem INGKARTek ngkweng, ngkwenh-rnemek-then? Atha apek ayernenty INGKART, ikwer-penh antyetyerr-rnem ingkerr warl ngkwenh-they warl-rnem warrkenh ngkwenh-rnem-kenh-they tyerrelhemel rernem alpem. Rernem alpem kwaty lher Nile-warl, irrkaty ikwer-warl.”
10-11 Pharaoh angkek Moses-warl, “Ingwelarreng INGKART ayerna.”
Moses angkek, “Ya! Ayeng angkem INGKARTek ingwelarreng. Antyetyerr-rnem ingkerrenh alpetyek ngkweng-they, warrkenh Egypt-areny-rnem ingkerrenh-they. Rernem warl-rnem-they tyerrelhem, kwaty lher Nile-warl ingkerrenh alpem. Ikwer-penh ntwa iterl-arem INGKART ra innga anyent-antey, Akngey anwekantherrenh, ingwer-rnem-apeny-weny.”
12 Ikwer-penh Moses Aaron-then Pharaoh iwerl-alhek. Ingwepenh Moses INGKARTek arlkek, “Antyetyerr ingkerrenh aknga Egypt-they!”
13 INGKARTel Moses awek, rap alakenh mpwarek. Antyetyerr-rnem ilwek, apmer arrpanenhel, warl ingkerrenhel-then, akethel-then.
14 Egypt-arenyel-rnem antyetyerr-rnem ingkerrenh ipmernem rernem akwetyeynenh. Antyetyerr-rnem rernem ingkerrenh intengerrek.
15 Pharaoh ra antyetyerr ipmernem arekel, ra awerr arrpemarl irrek. Moses-ek Aaron-ek-atherr awelhey-angenh arrpemarl ra irrek. Alakenh INGKART arrwekel angkek, Pharaoh ra awerr arrpemarl irrem.
INGKARTel aheny-rnem thweneyel Egypt-ampeny-warl
16 Ikwer-penh INGKARTel Moses ilek, “Aaron ila, ‘Irretetyel ahern atwetyek.’ Ra ahern atwentyel, aheny akngerr-anem ahern-they tyerrelhem, Egypt-ampeny-itwek apmer arrpanenhel arrngeletyek.”
17 Kel Aaron-el irrertety inemel ahern atwek-anem, Moses-elarl ilek-angkwarr. Aheny-rnem tyerrelhek ahern-they anamerl-antey, Egypt-itwek apmer arrpanenhel. Aheny-rnem alkerel aparnperrek, artwernem-then arelh-rnem-then ingkerrenh artek, atnwenth ingkerrenh-then artek rernem.
18 Ikwer-penh ngangker-akert-rnem arrkernelhenh, aheny-rnem ahern-they tyerretyek-arrpantey, ikwer-rnem-kenh-angkwarr. Ywarn-antey arrkernelhenh, arrangkw. Aheny-rnem artwernem-itwek atnwenth-rnem-itwek anenh-antey.
19 Ngangker-akert-rnem angkek-anem Pharaoh-ek, “Arrangkw nthakenh aheny-rnem mpwarey-angenh anwantherr, akwerrp anwantherr. Arawerrng rlterrk Akngey-kenhantel Aaron-el ahern-they aheny-rnem mpwarey-angker.” Pharaoh ran awerr-antey, awelhey-angenh arrangkw. Alakenh INGKART arrwekel angkek Moses-ek, Pharaoh ra awerr anerl-ayntem.
INGKARTel ameng-rnem thweneyel Egypt-warl
20 INGKARTel Moses ilek, “Ingwepenh akwenta, kwaty lher-warl alha. Nga mpwelha Pharaoh ikwer. Ra apetyenty, angka atyenh ikwer ila.” Kel Moses alakenh Pharaoh-ek mpwelhek. Pharaoh apetyek lher-warl. Moses-el Pharaoh ilek, “Alakenh INGKARTel ngkweng ilem, ‘Atyenh-rnem arlpaw-warl alhetyek, atyeng tnakemel inkwerelhetyek. Tyarlewa, arrngert angkey-angenh!
21 Nga arrngert angkenty, atha ameng-rnem arrekantherr-warl thwenetyek, arrenhantherr arwengkeletyek. Amengel-rnem ngenh ampereletyek, warrkenh-rnem ngkwenh-then, Egypt-areny-rnem ingkerrenh-antey. Ameng-rnem akngerrerreyenh warl ikwer-rnem-itwek ingkerrenh Egypt-itwek, ahern ingkerrenhel rernem aparnperreyenh.
22 Atha ameng-rnem thweney-angenh apmer Goshen-ampeny-warl, Israel-kenh-rnem anew-aneyel-warlan, arrangkw. Ameng-rnem nthakenh anperirrey-angenh apmer Goshen-ampeny-warl. Ntwa ameng-rnem arenty Egypt-areny-rnem-itwekant, ntwa ayenh iterl-aretyek, ayengan INGKART inngarl anem Egypt-ampeny-itwek.
23 Arraty, ingwelarreng arawerrng rlterrkel atha ameng-rnem thwenem Egypt-areny-rnem-warl. Ameng-rnem alheyenh arrekantherr-warl, atha atyenh-rnemant arntarnt-arem ameng-kety. Ameng-rnem alhey-angenh atyenh-rnem-warl.’ ”
24 Kel alakenh ayntek. INGKARTel ameng-rnem akngerr thwenek ikwer-rnem-warl. Rernem aylpenhek warl Pharaoh-kenh-warl, warl-rnem warrkenh-rnem-kenh-warl-then. Ameng akngerr inngel-anem artey-alhek Egypt-itwek.
25 Pharaoh-el thwenek warrkenh anyent Moses Aaron-then ikngwerl-alpetyek. Pharaoh angkek ikwer-atherr, “Ya! Apmer nhek-antey arrantherr aker tyenkerr arrtyemel antherl-ayntetyek Akngey arrekantherrenhek!”
26 Moses-el tyernek renh, “Nthakenharl alakenhan? Anwernantherr pwelek-rnem atwemel, ampernenty, INGKARTek anthenty, Egypt-areny-rnem, ahelerrekerr anwernekantherr. Rernem iltenty apek, ‘Ilekek arrantherr pwelek-rnem atweyel? Impen anwernekantherr! Anwernantherr kwenerrem ikwerek altyerr-rnem!’ Ikwer-penharl rernem apwertel anwernenhantherr wekerr, ipmek atwekerr.
27 Alakenh anwernantherr apmer nhek-antey aker tyenkerr arrtyey-angenh-antey INGKARTek. Anwernantherr arlpaw-warl alhey-areny itwern irrpetyek-atwety. Arlpaw-itwekant anwernantherr aker tyenkerr arrtyemel anthetyek INGKARTek Akngey anwernekantherrenhek. Alakenh INGKARTel ilek.”
28 Pharaoh-el ilek Moses-ek, “Ya, arrantherr alhenherr-arey arlpaw-warl Egypt-they. Arleng alhey-angenh. Angath-antey alhenherr-arey, aker tyenkerr arrtyemel anthetyek INGKARTek Akngey arrekantherrenhek. Alhey-alentyel, ayerna INGKART, ameng-rnem irrentetyek anwernekantherr-they.”
29 Moses angkek ikwer, “Ya. Ayeng alpem, ayeng angkey-alpem INGKARTek. Ingwelarreng ameng-rnem ngkweng-they alpem, warrkenh ngkwenh-rnem-they-then Egypt-areny-rnem-they-then. Atyeng awelha! Irrtywerremel iley-angenh! Arrngert angkey-angenh, anwernantherr arlpaw-warl alhetyek, aker tyenkerr arrtyemel anthetyek INGKARTek.”
30 Ikwer-penh Moses-el iwerl-alhek Pharaoh, INGKART-warl angkek-anem.
31 INGKARTel Moses awek. Ingwepenh INGKARTel ameng-rnem irrentek Pharaoh ikwer-they, warrkenh-rnem-then-they, Egypt-areny-rnem-then-they. Ameng-rnem ingkerr ilwenherrek-anem.
32 Pharaoh ra awerrirrek arrpemarl, awelhey-angenh. Arrwekel-antey ra ilek, ra Israel-kenh-rnem tyarlewetyek Egypt-they. Ra arrngert angkek arrpemarl, renh-rnem tyarlewey-angenh, rernem Egypt-they arlpaw-warl alhey-angenh.