86
Kpányĩ wɛ́kɛna Ludaa
Dauda lɛ̀ɛ.
1 Dikiri, ǹ sã kpá ma yãi ǹ wema,
zaakũ takaside wɛ̃ndaden ma ũ.
2 Ǹ ma wɛ̃̀ndi dãkpã,
zaakũ má a zĩda kpàmma.
Ǹ makũ n zↄ̀bleri sura ba,
zaakũ matɛni n náani kɛ,
mↄkↄ̃mmɛ ma Luda ũ.
3 Ǹ sùru kɛ kũmao, Dikiri,
zaakũ madìgↄ̃ n sísi kↄnkↄ kũ ↄkↄsio.
4 Ǹ makũ n zↄ̀bleri pↄ kɛ nna,
zaakũ ma laakarii tà n kĩnaa, Dikiri.
5 Ń mana akũsↄ̃ ń sùru vĩ, Dikiri,
n gbɛ̃kɛ zↄ̃kↄ̃ n sìsirinↄnɛ.
6 Dikiri, ǹ sã kpá ma wɛ́kɛnaai,
ǹ laakari dↄ ma wɛ̃nda wikia.
7 Mani n sísi ma warikɛgↄrↄ zĩ,
zaakũ ndì wema.
8 Tãna ke ni sí lɛkↄ̃a kũnworo, Dikiri,
gbɛ̃ke dì fↄ̃ à n kɛna kɛro.
9 Buri kũ n kɛ̀nↄ ni su ò kútɛnnɛ,
ò n tↄ́ bo ń pínki.
10 Zaakũ ń zↄ̃kↄ̃ akũsↄ̃ ndì daboyãnↄ kɛ,
mↄkↄ̃mmɛ Luda ũ ndo.
11 Ǹ n zɛ́ mↄmɛnɛ, Dikiri, manigↄ̃ táa o n yãpura gũn,
ǹ ma laasun kɛmɛnɛ do, de màgↄ̃ n vĩna vĩ.
12 Mani n sáabu kpá kũ nɛ̀sɛdoo,
Dikiri ma Luda, manigↄ̃ n tↄ́ bo gↄrↄ sĩnda pínki.
13 Zaakũ gbɛ̃kɛ kũ n kɛ̀mɛnɛ zↄ̃kↄ̃,
n ma wɛ̃̀ndii sì gyãwãn lↄ̀n.
14 Luda, karambaanidenↄ tɛn futɛmai,
gbɛ̃ pãsĩnↄ tɛni ma wɛ, òdi n yã daro.
15 Mↄkↄ̃n Dikiri, Luda wɛ̃ndadↄ̃nnɛrimɛ n ũ,
ń sùru vĩ akũsↄ̃ n pↄ dì fɛ̃ likalikaro,
n gbɛ̃kɛ kũ n náanio zↄ̃kↄ̃.
16 Ǹ arɛ dↄma ǹ ma wɛ̃nda gwa,
ǹ n zↄ̀bleri gba gbãna,
ǹ makũ n zↄ̀nↄkpare nɛ́ sura ba.
17 Ǹ yãmanakɛna sèeda kɛmɛnɛ
de ma zãngurinↄ e, wé'i ń kũ,
zaakũ Dikiri, n kpamai,
n ma laakarii kpàtɛmɛnɛ.