3
Geme pahede Timoté lé céiikewé
+Caa time geme uce ucéihi, geme niimihi pie wâé heme gemu te pimu cehi éni Atène, +ke gemu* ne lé pa béému Timoté, pa eabwé te Padué, ke pa béému ko penem, ko a bwo patemehi na a Pwooti Wâé te Iésu Kériso, beme e paûmiêhi, ke pamwoiukewé ne he ni céihi tewé, +beme te tice paceli me pihauli nang ne he ni tacebwén jenaa.
Be geé te temehi pie é lang he na nime Padué me nye â die lang. É he geme mwo mu pelewé, ke geme pii tewé ânebun pie, genye bo mu he ce picani celi ubwo; ke anaa, ke e caa tehenebé, geé teko temehi.
E pii me wâé gewé
É mu ko anaa, ke é caa ne lé Timoté, be time uce nimung me é tee uca, kehe nimung me é alihi ace bwo engen dewé ne ha a céihi. Be mwotiéo pie pa atacebwénikenye, ke e caa tacebwénikewé, ke wieli geme penem me te ju piticenaado ne kon.
+Kehe wo Timoté, ke e mwo ju tehenebé mu pelewé, ke e ne teme ni jepule wâé mu ko a céihi tewé, ke a pwonimewé ne ko Padué. E pii teme pie, geé teko pipaniimikeme, ke nimewé me geé alikeme mwo, pwohewii ne kome mwo. 7-8 +É mu ko anaa, ke wogewé ni bééme, é ne ha awieme ni tacebwén, me ni picani, ke te junihe pamwoiukeme a céihi tewé, be geé teko cumang ne he Padaame. Ade ace bépipwo-olé celi me geme ne te Padué, é ne kowé, mu ko a bwo piwâénimeme kowé ne ânebuhe Padué? 10 Bwén ke pwang, geme ileeng ne he ni ju pwonimeme, beme e ne teme beme geme alikewé mwo, ke me geme ne behi nina tieden he ni céihi tewé, beme jéhin.
É pwoiitihi me dewé
11 +Ke me weeng Padué Caa tenye, ke Padaame henye Iésu Kériso, ke me lu tehi ace pwaaden die pelewé! 12 Ke wo Padaame, ke me e pwo me ubwo a bwo eânimen dewé me de ni bééwé, ke me de mwo ati ni apulie, pwohewii a bwo eânimeme tewé. 13 Ke me e pwo me mang ni pwonimewé, ke me te tice celi me pipé ne kon, é ne ha a bwo pipaciitikewé, ne ânebuhe Padué Caa tenye, heme e bo âbé wo Padaame henye Iésu me ati ni apulie iitihi ten.
+ 3:1 3.1 Apostolo 17.15 + 3:2 3.2 Apostolo 16.1−3 * 3:2 3.2 Gemu—Paulo me Silas. + 3:3 3.3 2 Timoté 3.12 + 3:6 3.6 Apostolo 18.5 + 3:7-8 3.7 2 Tésalonik 1.4 + 3:11 3.11 2 Tésalonik 2.16