28
Ashiriya, na kamanchintspa yuwaa Dapiyarini Gadapsha tsap taarangu anootsi
Ashiriya, anpursha zar Filistewshuch sundar ichingarusin Israelchicheem pachamaam shaniyaranganaya. Akissha kurak Dapiyaa kamachtarangiya. Zuwaa, pzaa, nuwapa ipuneeruni, tputsiriptatamtish ashpari ipuneenlluni, nuwapa sundaruri washunand tapazip naayani, tárangiya. Dapiysha: Zuraktishcha ichee. Pzaa. Ashiri amb sheeni. Anush uru shiy nuwaa kapung natstatsha, yuwaa nuw waratkachi anootsiya. Nuwaptana xapoomaam wanindaja, tárangiya. Ashirucha, Akissha, Zuraktishcha, tárangu, waamaa ksutamaam sundaroom urkar ínarangiya.
Ashiriya, na kamaneena yuwaa Dapiyarini Gadapsha tsap taarangu anootsi.
Ashiriya, na kamanchintspa yuwaa Endorash kung kiz tuwachimapan taaru, anungaz Saul naatarangu anootsi
Ashiriya, Samuelarini tsiparamchu, Israelchich tputs ichingarusin kapung tanuksin taaranganaya. Anshat ashirangsin, tsiparee watsapunishtam Ramash mapuranganaya.
Anumun iwaz, Saul yuwaa kiz tsiparpa wan kanizpa tsiyatamaam yasarangu, anoo natsarangu, minupsha tsap zanganirangiya.
Anshat ashiramchu, anumun Filistewshuchshitisin sundar ichingarusin Israelchicheem pachamaam káyashinusin, Sunemash yakat shaniyaramchusin, tambtaranganaya. Saulsha tiptsiree ichingaru Israelchichee ituyaranlltam annungitam Guilbowanung shaniyaranganaya, Filistewshuchpa waratamaama. Itaru, Saulsha Filistewshuchee wazapanee parangu, kapung punirangiya. Chínashee kanacharangu, ndushat chinamaam waritarangu, punirsari tatat ashirangiya. Ashiriya, Apanlleetssha masharangu, xapoorangiya. Pamasamaamtiyam nda pamasarangiya. Urimashsha yachaku, xapoorangitamta. Apanllee kuk kamanipanee xapoorangitamta. Izuuru pinasarangiya. Ashirucha, Saul xapoorangu, wasundurureetssha kamachtarangiya. Na siy sundaruris nachungashinints. ¿Nda nish kiz tsiparpat wan tsiyatamaam yasaru taar? Nuwshat anoo kiz, Nuwaatssha yasanganda, tápi aturi, táshina, tárangiya. Sundarshitisin, Yasaktanicha. Endorash kung kiz tsiparpa tsiyatku an, taartanda, táranganaya.
Saulshat, Ashiri pzaya. Amb pangani, tárangu, Kiz nuwaa natstarundama, átu, kurakaa wamar tusheeru, nllitaritsha kamartarangiya. Sheeru, wipunasheemsha tsimbun wasundururee machirangiya. Psaanari káyaranllu, naatarangiya. Anshat kizash kuseeramchu, kizaatssha, Nuwcha shiyaa, izaree, mashkashina. Ashiri shiyshat nuwaam tsiparpat wan yasangandama. Mishat, tsipareetstam wan yámandangandama. Yuwari nuw tputsee mashki anoom atina, nuwapa tsiyatamaama, tárangiya. Itaru, kizshat, Shiy yasaktamsha, yuwaa Saul iyaa kizaatsini tuwachimapaneetsini kapung tsiyantarangu, ningeemsha iyaa zanganirangu anootsi. ¿Ndusha nuwaa tamapingamaam kusarangish? Apaz amb ashkachuri, sundarsha nuwaa pachakchu, tárangiya. 10 Itaru, Saulsha, Izaree, an mangishish chinarinllpa. Zurampatari Apanllimun sur siyaa táchinllpa. Amb ashkachush, ¿antaati sundar shiyaa pachacheeja? nduni. Nda yutaritshish shitungchiya, tárangiya. 11 Ashiriya, kizshat, ¿Tamampat tsipar tsiyatamaam zandaksha? ¿Tamama wan yushindachina? tárangiya. Saulshat, Ashiri Samuelarini kuruzungi. Nuwshat tsiyatchima, tárangiya. 12 Kizshat Samuelarinee wan parangu, kapung punirangu, Ay, tárangu, ¿Mayaamsha shiy nuwaa ngutish tamapingarangsha? ¡Shiy Saulmandsha! Napangi. Samuelpat tsiyatamaam zandkish, tárangiya. 13 Itaru, kuraksha Saul, Nduni izaree, nuwaa punirinllpa. ¿Mayaa parangsha? tárangu, kizshat, Minum tsipar wan tsapumand shitungeeru, yuwar kárkachu parangina, tárangiya. 14 Saulsha masharangu, ¿Izaree, tamaru parangasha? tárangu, kizsha, Tputs kizpur wachin parangina. Wamar tuwapimash kamartaru, tárangiya. Saulsha, Ashiri Samuelpari, mangush tárangu, much tsapush timuchta ashirangiya. 15 Ashiriya, ashkachu anush Samuelarinsha wan Saulaa tsiyatarangiya. ¿Mayaamsha shiy nuwangaz tsiyatamaam zandkush, nuwaa kapung tamundaksha? tárangu, Saulsha, Nuwaam kapungcha xarashish taaku, nuwsha kapung mangi mantsaki. Watam na iyaa Filistewshuch pachamaam kapung zandkanawa. Mishat, Apanll nuwaa nduntam chinarangu, izuuru nuwaa kapeeteenlliya. Apanllpa masharanguri, nuwaa kuki pakchiyam nda mazinarangiya. ¡Maya! Izuuru xapoorangina. Ashirucha, anoom shiyaa kuruzurangi. Anoo ¿tamacheezini? Shiysha nuwaa kamaningandama yuwaa ashtachi anootsi, tápi, táranguri, anoom kuruzurangi, tárangiya.
16 Samuelsha wan kaniz, ¿Mayaamsha shiysha nuwaa mashaksha? ¿Watam Apanll shiyaa izuuru kapeetaranguwa? Na Apanll shiyaa kundartakshita. 17 Yuwaa Apanll shiyaa tárangu anoo na tatsamoorangiya. Na shiyaa izuurusha kapeetarangu, tputsireetstamtish itutsirangiya. Itaru, ashirangu, na ngusirshitish Dapiy Israelchichee tputs ksutchiya. 18 Yuwamand shiy Apanllee kamachtamarini nda tatsamoorangush, Amalekshuchee ashpari nda chingarangsha. Anumandtanda na shiyaa Apanll amb sheenllu. 19 Sheeru, arang Israelchicheetstam Filistewshucheem tupchayaru kasachiya. Mishat, Filistewshuch shiyaatstam pachachiya. Amb ashkachu, pupari zar siy iparpatartis tsipakchus, kanis nuwash kusartatssa. Mishat, Filistewshuchshitisin siyashchee chingayaru kasachiya, tárangiya. 20 Saulsha anoo mazinaranllu, Ay, tárangu, itsiparanllu, tsapush tum táramchu, wazuran pshiyraru, tamuramach ashirangiya. Yasamaam zandku, nda katungamaam zandarangiya. Ichingaru zar psaanpatari nda katungarangiya. Ashirucha, itsiparangiya. 21 Kizsha Saulaa parangu, mang' tsipampaz ashiru parangiya. Ashirucha, kizsha, Napa nuw shiyaa istarangi. Tsipamaam waritarangitaati, nda ngatarangi. Natu, shiyshat nuwaa kuki mazinangcha. 22 Ashiri nuwshat martakchuri, shiysha anumun kizpurtakchush, ndushat tsipatsha. Ashiri shiyshat arang nuwaa chinangandama. Neewa. Katungats pakich panachinllpa. Ashtaa kizpurtayarush ktungangi. Papcha, tsiparush. Nimun kizpurtayarush, waptam kanaputsha, 23 tárangitaa, itaru Saulsha katungamaam nda zandarangiya. Ashirucha, wasundururshitisin, mishat kizatam, Natu ashtaa ktungangi, átarusin, pakich tuwizpurtarangusin, Ayu, tárangu, katungarangiya. Sheeru, pakich anumun kizpurtarangu, chiyzayaru, maashimun kuxinarangiya. 24 Kizshat anuritam pangush chinoo wakar karupana wanuts kapung putayaru, pacharangiya. Sheeru, tirikpa wasipur wayungunshari taxaptarangiya. 25 Shimbayaranllu, wanasir patateeranllu, Saulaamsha panarangiya, mishat wasundurureemtamta. Uwshtisin katungamaam yuwatspayarandsin, anuritam psaanari yusur waptam naataranganaya.
Ashiriya, na kamaneena yuwaa Saul kizap tuwachimapanip naatarangu anootsi.