6
Dǫ łǫ̀hdı̨ weghǫ shèts'ezhee dǫ tàgele gha gį̀į̀hchìı
Ekìıyeè k'e dǫ łǫ Nǫ̀htsı̨ wecheekeè gı̨ı̨lı̨į̀ agejà. Hanìkò Israel got'ı̨į̀ Greek k'ę̀ę̀ gogedee sìı Israel got'ı̨į̀ Aramaıc k'ę̀ę̀ gogede ghǫ sǫagedı. Dzę taàt'eè weghǫ shèts'ezhee dǫ tàgele, hanìkò gıta ts'ǫ ts'èko gıgà dǫzhìı whìle sìı gıghàɂaadì nıìle, gedı. Eyıt'à Zezì wecheekeèdeè, Nǫ̀htsı̨ wecheekeè hazǫǫ̀ gokàgehɂà, hagògedı, “Bò dǫ tàts'ele nı̨dè Nǫ̀htsı̨ weyatıì dǫ hoghàgıts'eehtǫ gha dek'aɂį̀ ade ha. Eyı ehkw'ı ha nıìle. Sèot'ı̨ı̨, amìı Yedàyeh Nezı̨ı̨ gıts'ǫ̀-èlı̨ı̨ sìı eyıts'ǫ gogı̨ı̨zǫǫ sìı naxıta gots'ǫ dǫ łǫ̀hdı̨ ààhchı. Eyı la gıtł'aà wheɂǫǫ̀ aahłe. Hanì-ı̨dè goxı̨ yats'ehtı eyıts'ǫ Nǫ̀htsı̨ weyatıì dǫ hoghàgıts'eehtǫ ha, eyı zǫ ghàlats'eeda ha,” gògedı.
Hagògedıı sìı hazǫǫ̀ gıgha nezı̨. Stephen, eyı dǫ Nǫ̀htsı̨ ghǫ wınì nàtsoo xè Yedàyeh Nezı̨ı̨ wets'ǫ̀-èlı̨ı̨ sìı gį̀hchì. Eyıts'ǫ Phılıp, Procopus, Nıcanor, Tımon, Parmenas, eyıts'ǫ Nıcolas, dǫ haàtłǫǫ gį̀hchì. Nıcolas wìyeh sìı kǫ̀ta Antıoch nàdè ekò Israel got'ı̨į̀ goxèht'eè wegha yatıì ajà ı̨lè. Eyı dǫ haàtłǫǫ sìı Zezì wecheekeèdeè gà nègogį̀ı̨wa eyıts'ǫ gokwìt'a dageèhdì gà gok'eèyagı̨ı̨htı.
Eyıt'à dǫ łǫ Nǫ̀htsı̨ yatıì ghǫ gıìkw'o. Kǫ̀ta Jerusalem Nǫ̀htsı̨ wecheekeè łǫ ajà, eyıts'ǫ gıta yahtıı łǫ gıgha ehkw'ı-ahodıì agejà.
Stephen dagıachì
Stephen Nǫ̀htsı̨ wesǫnıwǫ eyıts'ǫ t'asìı nàtsoo wets'ǫ̀-èlı̨ t'à dǫnı enıìyah deè hòèhtsı̨. 9-10 Hanìkò Israel got'ı̨į̀ ı̨łè xàɂaa “edets'ǫ̀ k'agedèe dǫò” gìyeh sìı Stephen k'èch'a gogede. Cyrene nèk'e, kǫ̀ta Alexandrıa, Cılıcıa nèk'e eyıts'ǫ Asıa nèk'e gots'ǫ dǫ agı̨ı̨t'e. Stephen wekwì gǫǫzǫ xè Yedàyeh Nezı̨ı̨ dahxà gots'ǫ̀ gode t'à gıdàgode ha dìì agejà.
11 Dǫ naàhtǫ dǫ mǫ̀hdaa ts'ǫ̀ gogede, gıts'ǫ̀ hadı, “Stephen ghǫ dıı haahdı: Eyı dǫ, Moses eyıts'ǫ Nǫ̀htsı̨ k'èch'a xàyaı̨htı wets'ıìkw'o, haahdı,” gògedı.
12 Eyıt'à dǫ hazǫǫ̀, ǫhdah gı̨ı̨lı̨ı̨ eyıts'ǫ Nǫ̀htsı̨-yatıì-k'ègedìı-dǫǫ̀ xè nàdahoowo hogèhtsı̨. Stephen dagıachì gà Israel got'ı̨į̀ gha k'aodèe ełegeèhdìı sìı ts'ǫ̀ geèhchì. 13 Dǫ hogets'ì t'à yek'e nìdahogeeɂàa sìı eyı nègogį̀ı̨wa, hagedı, “Dıı dǫ t'aats'ǫǫ̀ Nǫ̀htsı̨kǫ̀-gocho degaı eyıts'ǫ Moses wenàowoò k'èch'a gode. 14 Dıı hadı wets'ıìhkw'o, ‘Nazareth got'ı̨į̀ Zezì wìyeh sìı Nǫ̀htsı̨kǫ̀-gocho yedıhohtsı̨ ha, eyıts'ǫ Moses nàowoò goghàı̨ɂǫǫ sìı ładı̨į̀ ayele ha,’ hadı, wets'ıìkw'o ı̨lè,” gedı.
15 K'aodèe eyı geèhkw'ee sìı hotıì Stephen ghàgeeda, wınì yak'eet'ı̨į̀ wınì lanì gıgha wègoèht'į̀.