15
Hoìla łǫ̀hdı̨ agode ha
1 K'achı̨ yak'e enıìyah deè nàhòwo wègoèht'į̀: yak'eet'ı̨į̀ łǫ̀hdı̨ hoìla łǫ̀hdı̨ wet'à nǫǫde dǫ dagı̨ı̨ɂaà agedle ha sìı dagıale. Eyı wet'à Nǫ̀htsı̨ dǫ nàgoehkwa ghǫ nǫǫt'e ha t'à nǫǫde hǫt'e.
2 Tıdeè lanıı, eja wek'e saı̨de xè weta kǫ̀ dèk'ǫ̀ǫ lanıı wègoèht'į̀. Amìı eyı tıts'aàdìı nechàa “ek'ètaekw'eènǫ-daats'ǫ̀-ek'ètaènǫ-daats'ǫ̀-ek'ètaı” (666) wìyeh eyıts'ǫ kwe wek'ę̀ę̀ wègaat'ı̨ı̨ ghǫgeèhnǫǫ sìı eyı tıdeè lanıı gà nàgeèhza, Nǫ̀htsı̨ tł'ık'eetı̨ı̨ goghàyı̨ı̨laa sìı dagıale.
3 Nǫ̀htsı̨ wecheekeè Moses eyıts'ǫ Sahzǫ̀ą gıts'ǫ shı̨ t'à gejı̨, hagedı,
“Gots'ǫ̀ K'àowo t'asìı negha dìì-le anet'e,
t'asìı hazǫǫ̀ ghàlaneedàa sìı gogha enıìyah nechàa hǫt'e.
Kèhǫǫ̀wo gots'ǫ, welǫ whìle ts'ǫ̀ t'aats'ǫǫ̀ K'àowocho anet'e,
eyıts'ǫ nenàowoò sìı ehkw'ı zǫ hǫt'e.
4 Gots'ǫ̀ K'àowo, dǫ hazǫǫ̀ nek'èagı̨ı̨t'e ha hǫt'e eyıts'ǫ neghàsǫgeedı ha.
Nı̨ zǫ degaı anet'e.
Ehkw'ı eghàlaı̨dàa sìı wek'èhoedzǫǫ̀ adlà ne t'à,
dǫ hazǫǫ̀ xàɂaa nets'ǫ̀ aget'ı̨ xè neghàsǫgeedı ha hǫt'e,” hagedıì gejı̨.
5 K'achı̨ yak'e ts'ǫ̀ k'eeht'į̀ ekò Nǫ̀htsı̨kǫ̀-gocho enìxànı̨ı̨tǫ wègoèht'į̀. Eyı kǫ̀-gocho sìı “Nǫ̀htsı̨ nàowoò gha nı̨hbàa nàı̨ɂa” hǫt'e.
6 Yak'eet'ı̨į̀ łǫ̀hdı̨ hoìla łǫ̀hdı̨ wet'à dǫ dagı̨ı̨ɂa ha dagıalee sìı Nǫ̀htsı̨kǫ̀-gocho gots'ǫ xàgeède. ʔeh nedèe degoo wek'e saı̨dee yìı geèhkw'e eyıts'ǫ ɂehtł'ı̨ sǫǫ̀mbaekwo lanıı gıdzıìwı te nawhet'ı.
7 T'asìı dı̨ godìı gots'ǫ ı̨łè sǫǫ̀mbaekwo kw'àyį̀ą łǫ̀hdı̨ yak'eet'ı̨į̀ łǫ̀hdı̨ goghàyı̨ı̨wa. Nǫ̀htsı̨ welǫ whìle ts'ǫ̀ edaa sìı eyı kw'àyį̀ą łǫ̀hdı̨ weyìı dǫ ts'ǫ̀ wek'èch'a dagoòɂǫ whetł'ı.
8 Nǫ̀htsı̨ enıìyah t'à nàtsoo wehòhɂǫ gots'ǫ wekǫ̀ gocho ło dagoòɂǫ ajà. Hoìla łǫ̀hdı̨ dıı nèk'e dǫ hazǫǫ̀ k'e ajà gots'ǫ̀, dǫ wı̨ı̨zìı Nǫ̀htsı̨kǫ̀-gocho goyaetła ha dìì.