28
1 Atu ayi nkuchimbira dzagbwe taazoreswa,
ela enye haki ni jasiri dza simba.
2 Taifa ra fujo nkuzula vilongozi anji,
ela mutu wa achili na marifwa nkuhenda tsi ikakala na amani.
3 Mchiya achionera mnyonje,
ni dza mvula kulu ibanangayo mimea.
4 Atu avundzao shariya nkulika ayi,
ela atu alungao shariya anapingana na uyi.
5 Atu ayi taaelewa haki,
ela atu amuogophao Mwenyezi Mlungu anaielewa chikamilifu.
6 Baha mchiya alungaye haki
kuriko tajiri alungaye njira mbii.
7 Mwana agbwiraye shariya ana achili,
ela alunganaye na atu aroho anaifya ise.
8 Mutu aenjerezaye utajiriwe kpwa kuhala riba kulu na fwaida kulu
anamkusanyira mutu ndiyeonera mbazi achiya.
9 Mutu akahalaye kusikira shariya
hata mavoyoge ganatsukiza Mlungu.
10 Mutu achengaye-chengaye atu a haki kuhenda dambi
andagbwa mwenye mwakpwe dibwani,
ela atu asio na ila andarisi manono.
11 Mutu tajiri nkudziona wa achili mwakpwe moyoni,
ela mutu mchiya ariye na achili andammanya.
12 Enye haki achishinda atu nkuhererwa,
ela atu ayi achitawala atu nkuchimbirira mafwitsoni.
13 Mutu afwitsaye dambize kandaongokerwa,
ela mutu akubaliye makosage na kugaricha andaonerwa mbazi.
14 Baha mutu amuogophaye Mlungu siku zosi,
ela mutu wa likakado andapata tabu.
15 Viratu simba angurumavyo au dubu ashambuliyavyo,
ndivyo ahendavyo mutu mui anaphotawala achiya.
16 Mtawala asiye na ufahamu nkuonera atu sana,
ela atsukirirwaye zuluma na hongo andaenjereza sikuze.
17 Mutu asikiraye kuhukumika na kosa ra kuolaga,
andakala mchimbizi hadi kufwakpwe, usimterye mriche!
18 Mutu mkamilifu andativywa ni Mlungu,
ela mutu wa handzo andabanangbwa.
19 Mutu arimaye mundawe andakala na chakurya chinji,
ela alungaye mambo ga upuzi andakala mchiya.
20 Mutu muaminifu andaphaha baraka nyinji;
ela azoreraye utajiri wa mairo-mairo kandakosa kutiywa adabu.
21 Kubaguwa atu sio vinono tse;
ela atu nkuhenda mai kpwa ajili ya chipande cha mkpwahe.
22 Mutu mchoyo nkuzorera mali
wala kafikiri kukala uchiya undamphaha.
23 Mutu aonyaye ayae mwishowe andamendzwa
kuriko mutu adzipendekezaye na maneno manono.
24 Mutu aiyiraye ise au nine alafu aambe: “Siro kosa,”
mwana hiye a kundi ra atu anaobananga.
25 Mutu mchoyo nkusunganya atu ahehe,
ela mutu akuluphiraye Mwenyezi Mlungu andaongokerwa.
26 Mutu anayekuluphira achilize mwenye ni mzuzu,
ela mutu aishiye kpwa ikima andakala salama.
27 Mutu alavyaye kpwa achiya kandaphungukirwa,
ela mutu aremaye kulavya andalaniwa vyenye.
28 Atu ayi achitawala atu nkuchimbira achadzifwitsa,
ela achiuka mamlakani, enye haki nkuenjerezeka.