2
Luuti cɑlǝsʋɣʋ kɛ kumkum
1 Noyomii pɑɑlʋ yʋlʋ nɔɣɔlʋ ɩ kɑ wɛnnɑ. Apɑlʋ ɩnɩ ɩ sʋʋ toŋ kɛ́ nɑ ɩ́ wɛnɑ nyʋɣʋ. Pɑ yɑɑkɑɣɑ-ɩ sɩ: Poosi nɑ ɩ kɛ́ Ilimɛlɛkɩ lʋlʋɣʋ tʋ.
2 Ḿpʋ́ɣʋ́ kʋyɑkʋ nɑkʋlɩ Luuti tɔmɑ Noyomii sɩ: Mɑɑ kpɑ tɑɑlɛ nɑ mɑ́ cɑlǝsɩ kumkum kɛ́ kʋpɑŋ nɔɣɔlʋ ɩ hɑlǝm tɑɑ. Ntɛnɑ ɩ́ cɔ-ɩ sɩ: Polo, mɑ pɛɛlɔ.
3 Ɩlɛnɑ Luuti kpɑ tɑɑlɛ nɑtǝlɩ tǝ tɑɑ nɑ ɩ́ tǝŋǝɣɩ kʋntɑɑ nɑ ɩ́ cɑlǝsǝɣɩ. Sɛsɛ ɩlɛ Poosi tɑɑlɛ ntɛ́.
4 Ḿpʋ́ɣʋ́ kʋyɑkʋ ŋkʋ Poosi kpɑ tɑɑlɛ kɛ kʋntɑɑ cɔlɔ nɑ ɩ́ sɛɛ-wɛ sɩ: Tɑcɑɑ ɩ́ wɛɛ mǝ wɑɑlɩ. Nɑ pɛlɛ pɑ́ tisi sɩ: Ɩsɔ ɩ́ kooli-ŋ kʋpɑntʋ.
5 Mpʋɣʋlɛ Poosi pɔɔsɑ tǝmlɛ tʋ wei ɩ feŋiɣi kʋntɑɑ tɔɔ tɔ sɩ: Le tʋ kɛ ɑsɑɑlʋ ɩnɛ?
6 Kɛlɛnɑ tǝmlɛ tʋ cɔ-ɩ sɩ: Mowɑpʋ tʋ kɛ́, ɩ́ nɑ Noyomii pɑ kɔmnɑ.
7 Ɩ sǝlǝmɑ-tʋɣʋ sɩ ɩ tǝŋǝɣɩ kʋntɑɑ nɑ ɩ́ cɑlǝsɩ nɑ ɩ́ tɔɔsǝɣɩ lɔɔtʋ nti nti pǝ sɔɔwɑ tɔ. Hɑtoo tɑnɑŋ tɛɛ ɩ kɔm nɑ ɩ́ luŋ tɔ nɔɔnɔɔ tike ntɛ́ ɩ hɛɛsɑ tɔm kʋlʋm.
8 Ɩlɛnɑ Poosi tɑsɑ Luuti kɛ lɑɣɑtʋ sɩ: Tɑɑ kʋlɩ sɩ ń puki nɔɣɔlʋ tɑɑlɛ tɑɑ kɛ cɑlǝsʋɣʋ. Cɑɣɑ mɑ tǝmlɛ nyǝ́mɑ ɑlʋnyǝmɑ kiŋ cǝnɛ.
9 Nyǝnǝɣɩ timpi pɑ kʋŋ tɔ nɑ ń tǝŋ pɑ wɑɑlɩ. Mɑ heelɑ mɑ tǝmlɛ nyǝ́mɑ ɑpɑlʋnyǝmɑ sɩ pɑ́ tɑɑ kɑɣɑtɩ-ŋ. Ye lʋkɔtʋ ɩ́ kpɑ-ŋ n polo hǝyɑɣɑ tɑɑ nɑ ń nyɔɔ lʋm mpi pɑ́ luwɑ tɔ.
10 Tǝnɑɣɑlɛ Luuti hǝntɑ Poosi kɛ ɑtɛ nɑ ɩ́ tɔ sɩ: Ɩsǝnɑɣɑ pǝ lɑpɑ nɑ ń pɑɑsǝɣǝnɑ-m nɑ ń lɑkɩ-m kʋpɑntʋ, ɑnɩ mɑɣɑ mʋʋlʋ?
11 Kɛlɛnɑ Poosi cɔ-ɩ sɩ: Pɑ kɛɛsɑ-m pǝ tǝnɑ mpi n lɑpɑ nyɑ́ pɑŋ kɛ́ nyɑ́ pɑɑlʋ sǝm wɑɑlɩ tɔ. Nɑ ɩsǝnɑ n yelɑ nyɑ́ cɑɑ nɑ nyɑ́ too nɑ nyɑ́ tɛtʋ nti tǝ tɑɑ pɑ lʋlɑ-ŋ tɔ, nɑ ń polo yǝlɑɑ mpɑ n tɑɑ nyɩ tɔ pɑ tɛ tɔ.
12 Ɩsɛɣɛlɩ Ɩsɔ Tɑcɑɑ wei n kɔmɑ sɩ n tʋɣɩ kpʋlʋɣʋ tɔ ɩ́ lɛɛtɩ-ŋ mpi n lɑpɑ tɔ tǝcɩʋcɩʋ.
13 Ɩlɛnɑ Luuti cɔ sɩ: Hɑɩ, mɑ cɛ n pɑɑsǝnɑ-m teu kɛ́. Mpi tɔ, nyɑ́ hɛɛsǝnɑ mɑ lɑŋlɛ nɑ ń yɔɣɔtǝnɑ-m ɩsɩɩ n kɑ nyǝmɑ-m. Pɑɑ nɑ mpʋ tɔ, mɑ tɑ hɑŋnɑ nyɑ́ tǝmlɛ tʋ nɔɣɔlʋ.
14 Pǝ kɔmɑ nɑ pǝ́ tɑlɑ tɔɣɔʋ ɩlɛnɑ Poosi tɔ Luuti sɩ: Kɔɔ tǝ tɔɣɔ. Cosiɣi tɔɣɔnɑɣɑ nɑ ń liiki tuusi tɑɑ.
Ɩlɛnɑ Luuti cɑɣɑ kʋntɑɑ cɔlɔ, nɑ pɑ́ cosi-ɩ pee wenɑ pɑ toŋɑɑ tɔ nɑ ɩ́ tɔɣɔ nɑ ɩ́ hɑɣɑ nɑ pǝ́ kɑɑsɩ nɑ ɩ́ sɩɩ.
15 Ɩlɛnɑ ɩ́ kʋlɩ cɑlǝsʋɣʋ, nɑ Poosi heeli ɩ tǝmlɛ nyǝ́mɑ sɩ: Ɩ́ yele nɑ Luuti cɑlǝsɩ cɑmnɑɑ kilɑ tɔtɔ, ɩ́ tɑɑ tɑŋɩ-ɩ.
16 Ɩ́ yeki lɔɔtʋ lɛntɩ nɑ ɩ́ tɔɔsǝɣɩ, ɩ́ tɑɑ kɑlǝnɑ-ɩ.
17 Ḿpʋ́ɣʋ́ Luuti cɑlǝsɑ tɑɑlɛ ńtɛ́ tǝ tɑɑ hɑlǝnɑ tɑɑnɑɣɑ. Ɩlɛnɑ ɩ́ mɑ́ nɑ pee mɑɣɑnɑ ɩsɩɩ kiloonɑɑ hiu nɑ nɑɑnʋwɑ.
18 Nɑ ɩ́ kpɑɣɑ nɑ ɩ́ kpeenɑ nɑ ɩ́ hʋlɩ ɩ pɑŋ. Ɩlɛnɑ ɩ́ lǝsɩ tɔɣɔnɑɣɑ ŋkɑ kɑɑ kɑɑsɑɑ tɔ nɑ ɩ́ cɛlɛ-ɩ tɔtɔ.
19 Ḿpʋ́ɣʋ́ Noyomii pɔɔsɑ-ɩ sɩ: Leɣe n cɑlǝsɑ sɑŋɑ? Awe tɑɑlɛ kɛ n kpɑwɑ? Ɩsɔ ɩ́ kooli kʋpɑntʋ kɛ wei ɩnɩ ɩ pɑɑsǝnɑ-ŋ tɔ.
Ɩlɛnɑ Luuti sɩ: Pɑ yɑɑ-ɩ sɩ Poosi.
20 Ḿpʋ́ɣʋ́ Noyomii tɔmɑ sɩ: Mɑ nyǝ́mɑ sɩ Tɑcɑɑ lɑpɑ weesiŋ nyǝ́mɑ tɑɣɑ kʋpɑntʋ nɑ tɑ sǝtɑɑ tɔtɔ. Ɩsɔ ɩ́ kooli ɑpɑlʋ ɩnǝɣɩ kʋpɑntʋ.
Apɑlʋ ɩnɩ ɩ kɛ́ tɑ́ lʋlʋɣʋ nyǝ́mɑ tɑɑ lɛlʋ wei ɩ pǝsǝɣɩ nɑ ɩ́ pɑɑsǝnɑ-tʋ tɔɣɔ.
21 Kɛlɛnɑ Luuti sɩ: Hɑlɩ ɑpɑlʋ ɩnɩ ɩ heelɑ-m kɛ́ sɩ mɑ́ tǝŋǝɣɩ ɩ tǝmlɛ nyǝ́mɑ nɑ mɑ́ cɑlǝsǝɣɩ, hɑlǝnɑ ɩ kʋmtʋ nɑ tǝ tɛm.
22 Ntɛnɑ Noyomii sɩ: Pǝ wɛ teu mɑ pɛɛlɔ, tǝŋ mpɛ. Ye nɔɣɔlʋ tɑɑlɛ tɑɑ pɑ tɔɣɔnǝɣɩ-ŋ kɛ́.
23 Ḿpʋ́ɣʋ́ Luuti sɑɑlɑ Poosi tǝmlɛ nyǝ́mɑ kiŋ kɛ mpʋ nɑ ɩ́ cɑlǝsǝɣɩ, hɑlǝnɑ kʋmtʋ tɛ́. Nɑ ɩ́ nɑ ɩ pɑŋ pɑ́ wɛ mpʋ.