8
Yesuea udia dolö dausini biyidiagali molö ï
(Madiu 15.32-39)
1 Segeyo amo gala udia dolö yafie bu gegedoi amoli molö molö made gabugi, Yesuea ïe bëgëla aulo amoli mofiamolahilä ilima sähalea,
2 Udia dolö gegedoi gowe ili nebalä segeyo ohodoa nelo amea hä molö molö maade gabugi asigisebemelë.
3 Na ili sïdëa baagoi amola wäla hili mosöa mosalaseda, ili idiafa si dädäbëlela digamolö gabumelë. Odoada sege wagadi madela mofiai gabula säi.
4 Ïe bëgëla aulo amolia ema nabahalea, Nilï sege nafadeia neebe ameada, udia dolö nefolalebewe ili muäia, nilïa molö abidi nea awäla nimolödula nabi.
5 Amala nabasebegi, Yesuea ilima nabahalea, Dilia Beledi aboläia galebela nabi. Ilia ema säla obëgësalea, Nilïa gifalädalïa galebela säi.
6 Amala säsebegi, Yesuea udia dolö nefolalo amoli nagadaia fifigimalola säi. Amala sälahilä ea beledi gifalädalïa amo gaula nea, Godema nesegelahilä, dagabodasila ïe bëgëla aulo amolima sogomäia ïasebegi, ilia udia dolö sefolalo amoligali neala sogoi.
7 Ilia seme nelësa naabo safo ägüi amoge, ea nesegelahilä udia dolö iligali sogomäia ï.
8 Udia dolö sefolalo amoli sulubadela dofea naala, bolesalea fea digai amo ilia adu gifalädalïa salala nobai.
9 Udia dolö amolida dausini biyidia gadoi nelo.
10 Yesuea udia dolö amoli hä afiamalola sälahilä, ïe bëgëla aulola ilida fodolofalï ödä dudaia fila Dalamanuda segeamadi asi.
Ilia Yesuma dolöea hamomolöi made gadoi hamomola säi
(Madiu 16.1-4)
11 Felesi dolö odoa Yesu neebea maalahilä ebalä gëgësalea. Dolöea hamomolöi made gadoi nofe elöi afädë selesaia mosöala misi dia hamomola säi. Ilia e amala fedogola beasebegi,
12 Yesuïe iso asigigi yöla hame hëia fedalahilä sähalea, Udia dolö walio nefolalebe welia dolöea hamomolöi made gadoi nofe elöi hamosebe amo bimolöïe hogosa nebegoïe mida edo! Na dilima dofä gelola sähago. Udia dolö walio nefolalebe welima, dolöea hamomolöi made, nofe elöi afädë dofä made hamomolömelëla säi.
13 Amala sälahilä, ili ami dïgïla e dudaia bu fila, oeabo edefade amo näiado alömodi amogi asi.
Ado besula Heledo Felesilele yidila säi
(Madiu 16.5-12)
14 Ïe bëgëla aulo amolia beledi ägüla made elabola asi. Dudaia amida, ilile beledi afädëfalïmu dilo.
15 Yesuea ilima gelola sähalea. Felesi dolöïege Heledoïege beledi edelo yidi dibe amo helësëlahilä, hedabola idihë namialola säi.
16 Amala säi amo nabalahilä ilia hilidomu sähalea, Ea säse egoweda, nilïa beledi ägüla made misi amoïe säsebemelëla säha dilo.
17 Ilia säi amo ea helësëlahilä ilima sähalea, Nilïa beledi made ägüi amoïe säsebegola säha dibegoda edoïe! Dilia fädäla helësëla made nelo amomu nea, dawa made neale! Ma, dilile iso asigi gai, aso, neagole!
18 Dilile si galea gaso, dilia made beasebele. Gëhe galea gaso, dilia made nabahale. Dilia elaboile!
19 Amo gala beledi bia ameamu dolö dausini biaea muäia, dagabodasi amo nalahilä, fea digai amo dilia neala, adu aboläia nobala salila nabi. Amala nabasebegi ilia ema säla obëgësalea, Adu Giwilasila säi.
20 Ilia amala säsebegi ea ilima sähalea, Udia dolö dausini biyidiaea muäia beledi gifalädalïa dagabodasi amo nalahilä, fea digai amo adu aboläia nobala salila nabi. Ilia ema säla obëgësalea, Gifalädalïala säi.
21 Amala säsebegi, ea ilima sähalea, Dilia fädäla made helësëla nelo amomu aso neagolela säi.
Yesuea ïe bëgëla aulo amoli olelesa nelo
(Maga 8.22-10.52)
Bedesaida dolö afädë si golai wahi
22 Yesula ïe bëgëla aulolali afiala Bedesaida segea besela galai. Dolö odoaea dolö afädë si golai nelo amo e neebea sigi maalahilä ema sähalea, Dolö gowe dia naaboea diigimäiamelëla säi.
23 Amala säsebegi, Yesuea dolö si golai amo naaboea gaula mosö dibea amila segea sigi awälahilä, Ea dolö si golai amoïe sihidoa gofedela galala ïe naaboea diigilahilä dolö amoma nabahalea, Nelebo beasebelela nabi.
24 Amala nabasebegi, dolö amea busa fädägägïa adogola bealahilä sähalea, Dolö nawese dibe beaha gaso, i gadoi nawese beasebemelëla säi.
25 Amala säsebegi, Yesuea dolö amoïe siigi bu elö diigisebegi, dolö amea si gadaea gala beasebegi ïe si wahilahilä nelebo sulubadela beaha maadei.
26 Amala hamolahilä Yesuea dolö amoma sähalea, Mosö yafie dibeadi amogida mosabio. Dihï mosöa mosalola säi.
Fidaea afädë Memelei amo dofä dimelëla säi
(Madiu 16.13-20, Ulugu 9.18-21)
27 Yesula ïe bëgëla aulolali Sisalia Filibai gaamumadi sege odoa dibeadi amogi afiai. Idiafa awäha difolalea ea ïe bëgëla aulo amolima nabahalea, Udia dolö nefolalebe amoliada neda nowë neala säha difolalebela nabi.
28 Amala nabasebegi, ilia ema säla obëgësalea, Udia dolö odoaeada, ödägi gelo Yone neala säla digi, odoaeada, Elaia neala säla digi, odoaeada, bea sälo dolö afädë neala säla digisa neamelëla säla ï.
29 Amala säla ïasebegi, ea ilima nabahalea, Diliada ne nowë neala säha neala nabi. Fidaea ema säla obëgësalea, Afädë Memelei amoda dofä dimelëla säi.
30 Amala säsebegi, Yesuea ilima gelola sähalea, Neda amomelë, odoama säla ïmabiola säi.
Yesu e baagola nowemolömelëla säi
(Madiu 16.21-28, Ulugu 9.22-27)
31 Yesuea ïe bëgëla aulo amolima mi gäwila säla olelesalea, Dolöïe Malö amoda së edefade molömelë. Dolö asigi gäwi dafidilo neebe amoliage, gobela ïlo busa neebe amoliage, mala dawadigi neebe amoliage, ema habobalahilä ilia e baagomäia nufulömelë. Segeyo osodagi hï bu nowela galamolömelëla säla ï.
32 Ea ilima ado amo mogola säla ï gaso, Fidaea Yesu sigi aliga galahilä, amala made sämalola nemoi.
33 Amala säsebegi, Yesu besula, ïe bëgëla aulo amolima siila nea, Fidama nemosalea, Saidani, ne neebeawi namolö made. Mosö! Diada Godea helësëlo amo gadola made, dolöfäea helësëlo amo gadola helësësebela säi.
34 Amala sälahilä, ea udia dolö nefolalo amolige, ïe bëgëla aulo amolige mofiamolahilä ilima sähalea, Afädëa ne bëgëla moholö helësëseda, hï hamea hamela helësëlo amo fisila, hïle i fügäi gaula, ne bëgëla moholö dialea.
35 Afädëa hïle namolö amo gaula fëdöla aligiseda, ïe namolö amo hogosa helemolömelë. Amai gaso, afädëa nege, nïe Ado Mala Hedabige helësëla hïle namolö amo fisiseda, eada ïe namolö amo gaula namolömelë.
36 Afädëa nagadaia nelebo dibe amoli sulubadela gaula neëgi hï e baagoseda, nagadaia nelebo amea, hï e abeahäla ugila negemolödu.
37 Afädëa bidi edo ïalahilä, hïle namolö amo hï bu nea obëgëmolödu.
38 Udia dolö Godeïe mala made nabelo nefolalebe amolige nafade hamolo nefolalebe amolige bealahilä, afädëa nemage, nïe ado malamage hewaseda, Dolöïe Malö amo Eedoïe yo digalo hïdo elöibalä, selesaia fii hedabifalï amolibalä obëgësolo amo gala, eage dolö amobalä hewamolömelëla säla ï.