VI. RIRUUBE RIA YEREMIA
Ⅵ
Eri nario riruube erio Yeremia atomerete Abaisraeli nyuma batarairwa obosomba aria Babiloni n’omorwoti o Babiloni. Riruube eri nigo ribwate amang’ana ayio Nyasae achigete Yeremia abararerie.
Ⅰ Ase engencho y’ebibe mwakorire ase Nyasae, bono omorwoti Nebukadinesaro nkobaira are obosomba aria Babiloni.
Ⅱ Nyuma komwaikire oo, mobere oo ase emiaka emenge, mobee oo ase ebigori bitano na bibere. Korende nyuma yayio Nyasae nabairanie gocha inka seino ase omorembe.
Ⅲ Agwo Babiloni ase omosomba inwe ina mwerorere chinyasae chirosirie korwa ase emete, chifeta boigo n’echitaabu-chinyasae echio abanto bakoimokia ase amareko abo erio kwoboyia abanto abwo batamomanyeti Nyasae.
Ⅳ Mwerende inwe timobaisa kwegia abanto abwo b’ebisaku. Chinyasae echio tichiboboyia ekero morarore abanto bagochisasiima ase okorobekana kwabo.
Ⅴ Korende inwe eteebie ase emioyo yaino: “Naye bweka Omonene, naye intwe toganeirie gosasiima!”
Ⅵ Omomalaika o Nyasae nabe nainwe; ere nabarende.
Ⅶ Chinyasae echio nigo chibwate emenwa, korende nigo chibachire n’abaroisia, ekeene nigo chichabeire chitaabu, korende tichiri chinyasae chi’ekeene ekiagera tichigokwana.
Ⅷ Abanto abwo nigo bakoroisia chigutwa chi’echitaabu erio babekera chinyasae echio ase emetwe yabo, buna korengana bakobekera omoiseke bwanchete gwechabera.
Ⅸ Chingaki chinde abakuani nigo bakoiba chitaabu korwa ase chinyasae echio, bakorera emeremo yabo abanyene;
Ⅹ naende baa chitaabu n’echifeta chinde abatayayi b’ekalu. Abanto nigo bakoira chinyasae echi chi’emete, chifeta, boigo n’echitaabu bachibekera chianga orakagere buna n’abanto.
Ⅺ Korende nonya chinyasae echio chiboirie chianga buna abarwoti, korende chirochio tichikonyara gwetanga koriegwa n’amage.
Ⅻ Ekero ebuse ekorwa ase hekalu egochigwera ase obosio bwabo, omonto goika achitinyie.
ⅩⅢ Chinyasae echio nigo chibwate chinyimbo chi’oborwoti ase amaboko abo, korende tichibwati nguru chinde chiokoa onde bwensi orachikorere bobe egesusuro.
ⅩⅣ Chingaki chinde nigo chikoimokia omoyio obirende n’egesire koboko kwabo, korende chirochio tichikonyara gwetanga korwa gosarigwa ase esegi gose korwa koirwa n’abaibi.
ⅩⅤ Ebio bionsi nigo bigotoorokia buna chirochio tichiri chinyasae ase igo timochisasiima.
ⅩⅥ Chinyasae echio chikaransete ase chikaru chiabo nigo chire bosa buna enyongo yategete. Amaiso abo nigo aichire ebuse eyio abanto bagwetinyia amagoro ekero bagosoa hekalu ime.
ⅩⅦ Abakuani nigo bagosieka ebiita boigo n’echinyasi n’echichuma erio gotanga abaibi. Chinyasae echio nigo chisiekeire buna omosibwa ore ange gochia goitwa ase okomochera omorwoti.
ⅩⅧ Chinyasae echio nigo chigotongerigwa chitaaya chinyinge goetania nonya buna abakuani abwo baganetie korende chirochio tichikorora kende.
ⅩⅨ Chinyasae echio nigo chikoriegwa korwa ime n’amage, buna emetobwa y’emete y’ekalu, n’echianga chiabo nigo chigosarigwa korende chirochio tichikomanya.
ⅩⅩ Amasio abo abaire amamwamu kobwatekana n’erioki rikorwa ase hekalu.
ⅩⅪ Ebitabaramato, n’ebiongo boigo n’echinyoni chinde nigo chikoiruruka igoro y’echinyasae echio, nonya n’ebimoni nigo bigochinkaransera.
ⅩⅫ Ayio onsi nigo agotworokia buna chirochio tichiri chinyasae timochisasiima.
ⅩⅩⅢ Chinyasae echio nigo chichabeire chitaabu erio gochikora chirorekane buya, korende tichikororekana buya otatiga omonto eyeigosire ekero chiare kobachwa chirochio tichiaigwete kende.
ⅩⅩⅣ Tari mang’ana igori ring’ana ng’aki chirabekerwe; chirochio tichiri koeyana.
ⅩⅩⅤ Nigo chikobogorigwa n’abanto ase amareko ase engencho tichikonyara gotara ase amagoro abo ayio nigo akworokia abanto maiso marore buna chirochio tichibwati kobua konde.
ⅩⅩⅥ Nonya nabwo bagochikorera nigo bagochirorera obosoku ekero chikogwa inse, ekiagera nigo akobetererigwa gochimokia naende.
ⅩⅩⅦ Abakuani nigo bakoonia biria bikorugwa ebingwanso ase chinyasae echio baira chitaabu. N’abakungu b’abakuani nigo bakogacha biria bikorugwa ebingwanso ase okobibeka omonyo tibisareka ribaga bagosanga n’abataka na baria batari kwenyara.
ⅩⅩⅧ Nonya n’abakungu baria bare ase chingaki chiabo na baria bagonkirie nigo bagwancherwa gokuna ebingwanso. Ayio onsi nigo agotworokia buna chinyasae echio tichiri echi’ekeene-timochisasiima.
ⅩⅩⅨ Inaki chirarokwe chinyasae, ekero abakungu bagwancherwa korwa ebingwanso ase ebinto ebio biroisirie korwa ase emete, chifeta n’echitaabu?
ⅩⅩⅩ Nonya n’abakuani nigo bagoinsaransa ase chikalu chingaki chi’okorera beboyetie chianga chitandogete n’emetwe egingeire etatubiri.
ⅩⅩⅪ Abakuani abwo nigo bakorera ase chinyasae chiabo orakage buna na chirochio nao chiare ase ebirero.
ⅩⅩⅫ Nigo bakorusia chianga chi’echinyasae chiabo baa abakungu babo boigo n’abana babo.
ⅩⅩⅩⅢ Gokorera chinyasae echio amabe gose amaya tari mang’ana; ekiagera ero enyene tekonyara goakana egesiomba. Tichikonyara kobeka omorwoti gose komorusia,
ⅩⅩⅩⅣ tichigokora omonto omonda gose chimoe chitaabu. Onye omonto orire eira ase chire korende tayeikerania, tichikomokora aakane.
ⅩⅩⅩⅤ Tichigotoria omonto korwa amakweri gose gokonya omonto otari na nguru korwa ase oria ore n’echinguru.
ⅩⅩⅩⅥ Tichikonyara gokora omouko arore naende, gose chitorie omonto korwa ase emechando.
ⅩⅩⅩⅦ Tichikororera ababoraka gose chintakana amabera.
ⅩⅩⅩⅧ Ebinto ebi bibachire korwa ase emete na gochaberwa chifeta n’echitaabu tibiri na nguru chinde, nigo binga buna rigena riarusigwe korwa ase egetunwa; na baria bakobisasiima mbabekwe ase obosoku.
ⅩⅩⅩⅨ Inaki eranyarekane omonto akagere buna birobwo n’echinyasae gose abiroke chinyasae?
ⅩⅬ Ekero omonto are rimama nigo bakomoimokia bamoira ase hekalu baboria Bel amoe chinguru chi’ogokwana, orakage buna Bel naigwete kende.
ⅩⅬⅠ Nonya nekero abanto bamanyete buna chinyasae chiabo tichikobakonya, barabwo nigo bagendererete koba abariri ase ogochisasiima.
ⅩⅬⅡ Tari ayio oka, abakungu nigo bagwesiba chinkini na goisaransa ase chinchera bagosamba ubani na gokora obotayayi bwabo. Oyomo obo ekero airirwe n’omosacha na korara nere, nigo akoirana na gosekerera oria onde otigara buna ere tari kieni nakio gekogera atairwa.
ⅩⅬⅢ Kera egento igoro y’echinyasae echio n’oborimo; ngaki rende eranyarekane korengereria gose gochiroka chinyasae?
ⅩⅬⅣ Chinyasae echio nigo chiroisirie n’ababachi be chibao na baria b’echichuma, ase igo chirochio tichikoba kende gionsi otatiga keria ababachi batagete kebe.
ⅩⅬⅤ Nonya nabaroisia babo tibari komenya ngaki ’ntambe! Inaki rende eranyarekane barabwo korosia chinyasae?
ⅩⅬⅥ Abanto abwo nigo bagotiga oborimo n’obosoku ase oroiboro rwabo.
ⅩⅬⅦ Ekero chiseegi gose emechando yachire, abakuani nigo bakoroberia ase bakwebisa n’echinyasae chiabo.
ⅩⅬⅧ Chinyasae echio tichibwati nguru ase esegi gose emechando. Inki gekogera abanto batari komanya buna emegwekano eye teri chinyasae?
ⅩⅬⅨ Emegwekano eye teri kende, eye n’emete ebachire egachaberwa chifeta n’echitaabu; rituko erimo nemanyekane buna ekeene echi tichiri chinyasae.
Ⅼ Chinse chionsi n’abarwoti mbache komanya buna emegwekano tari kende otatiga emeremo ya mwanyabaanto. Ero tebwati chinguru chi’echinyasae;
ⅬⅠ n’onde bwensi naganeirie komanya buna emegwekano eye teri nyasae.
ⅬⅡ Chinyasae echi tichigokora onde bwensi koba omorwoti gose tichikoreta mbura.
ⅬⅢ Tichikonyara konacha kina igoro y’amang’ana abo gose gokonya omonto oyio okoriananigwa; chirochio tichigokora kende; nigo chinga ebigonkoru bikoiruruka ase embeo.
ⅬⅣ Ekero hekalu yabwatirwe omorero, abakuani nigo bagotama erio gwetoria, batiga chinyasae echio chichongire korwa ase emete na gochaberwa chifeta n’echitaabu chikoyia buna obonyansi.
ⅬⅤ Tichikorwania barwoti gose kogenda esegi ase ababisa. Inaki omonto aregene buna echio n’echinyasae?
ⅬⅥ Chinyasae echi chi’emete echabeire chifeta n’echitaabu, tichikonyara gwetanga korwa ase abaibi gose abauri,
ⅬⅦ abwo bakoira chifeta n’echitaabu boigo n’echianga chi’echinyasae erio bagenda nabirobio bionsi. Chinyasae tichigokora kende erio gokania abaibi nabauri.
ⅬⅧ Chinyasae echio nigo chire bosa tichikoreng’anigwa omorwoti ore n’echinguru gose ekengese ki’enyongo ekio kebwenerete omonyene. Chinyasae echio chi’oborimo tichikorenganigwa nonya n’omorangwa bw’enyomba oyio ogosikwa orenda ebinto nyoma. Nonya n’esiro eyemo ase enyomba y’omorwoti nigo ere buya goetania chinyasae echio chi’oborimo.
ⅬⅨ Nyasae akarwa omobaso, omotienyi boigo n’eching’enang’eni birwe oborabu nabirobio bikamoigwera.
ⅬⅩ Boigo chinkoba nembeo. Enkoba nabo ekororekana are na agare, n’embeo nabo ekogusa ande onsi.
ⅬⅪ Ekero Nyasae agochika amare arande igoro ase ense yonsi aro nigo akomoigwera.
ⅬⅫ Ekero Nyasae agotoma omorero korwa igoro osambe ebitunwa n’echinsana, oro nigo ogokora keria otebigwa. Emegwekano tegokora binto ebi ero tegokora nonya eki kegocherera.
ⅬⅩⅢ Inaki rende ero erarokwe chinyasae onye tekonyara gotokonya gose gotomochera ase nchera ende yonsi?
ⅬⅩⅣ Imomanyete buna ero teri nyasae timoyesasiima.
ⅬⅩⅤ Chinyasae echi tichibwati nguru igoro ase abarwoti; tichikonyara koragereria gose gosesenia.
ⅬⅩⅥ Tichikonyara gokorera chinse kemanyererio kende gionsi igoro ase amare; tichikonyara kobara buna risase gose omotienyi.
ⅬⅩⅦ Nonya n’eching’iti chi’orosana nigo chire buya goetania emegwekano eye; chirochio nabo chigotama korwa ase amakueri erio gwetoria.
ⅬⅩⅧ Ase igo nabo emanyekanete buna chirochio tichiri chinyasae timochisasiima.
ⅬⅩⅨ Chinyasae echio chiabo chiroisirie korwa ase emete na gochaberwa chifeta n’echitaabu, nigo chinga omoeto biogosereria chinyoni ase omogondo tichikonyara korenda monto onde bwensi.
ⅬⅩⅩ Chinyasae echio nigo chinga buna orosana rwa magwa ase omogondo, ribaga rogotanga chinyoni tichicha ase omogondo, rororwo nigo rokoa chinyoni ase chigoikaransa. Chinyasae echio nigo chinga omobere otugutire ase omosunte.
ⅬⅩⅪ Chianga chiaye chia monyinga echio chibekeire nigo chikogota, ase igo twamanyire buna chirochio tichiri chinyasae. Omoerio nigo chikoriegwa n’amage na onde taiyo oratware kende agochikorera.
ⅬⅩⅫ Omonto omochenu otabwati emegwekano nigo are buya goetania abande; ere tamanyeti nyasae ende, na onde taiyo oramochaye.