Ⅱ
Esegi igoro y’enchinse chia Bosongo
Ⅰ Ase omwaka o ikomi na gatano na gatato ase oborwoti bwaye, rituko riemerongo ebere na rimo boigo omotienyi omotang’ani, omorwoti Nebukadinesaro amo nabaseemia baye bagaetia goakana egesiomba ase ebisaku bionsi biangete komobwatesia ase esegi.
Ⅱ Akabaenekeria obobe boria emechie eyio yangete komobwatesia bamokorerete.
Ⅲ Bakaigwana ng’a onde bwensi okorete okomocha okwo goika aitwe.
Ⅳ Erio ekero abaenekeirie omoroberio oye, omorwoti Nebukadinesaro akarangeria omonene bwa abarwani baye okorokwa Horofene. Oyo nere orenge komobwatia omorwoti ase obonene ase oboteneneri bw’abarwani.
Ⅴ Omorwoti akarua ogochika gochi ase Horofone; ekeene buna inche inde omorwoti ase ense yonsi, nakoeire ribaga ochore abarwani banarete esegi buna ekobwatia: abarwani esegi bagotaara n’amagoro 120,000, na abarwani bakoriina chibarasi 12,000.
Ⅵ Oimoke ogeende ogwere chinsinyo chionsi chi’ense ya moocha baria bangete kombwatesia aseegi.
Ⅶ Obateebie buna tibari na rinde otatiga gotiringa esike ekigera nimbaorokere ase ekeririanda na gotuba ense yaabo na amagoro yabarwani baane na kobakora abasakore.
Ⅷ Goika ekero abanto baabo bare nechingoma amo na amaote baraare ase ebirubo biabo na kera orooche negetionko bichorwe nebitondo biabo.
Ⅸ Nimbaimokie abasakore baabo na kobang’anyia gochia ase chinsinyo chi’ense.
Ⅹ Korende aye Holofene nagochiikire gontang’anera gosakora chinsinyo echio chionsi inche omonyene ntaraika. Keraabe beruure asore, nigo aye orababwate goika inche omonyene inche kobaa egesusuro.
Ⅺ Keraabe bekong’irie ase okogochaaya, tobaisa kobatiga bare moyo. Obaite na gosakora ensemo yabo yonsi ase okobabeka ase oboteneneri bwao.
Ⅻ Inche natianire ase oborwoti n’obogima bwane ng’a ning’ikeranie onsi ayio nariire eira koyakora.
ⅩⅢ Ase igo nekogwenerete aye koigwera na gokorera ogochika kwane ase bwango ase oboikeranu.
Holoferne ogokora esegi
ⅩⅣ Ase obwango, Holoferne akaayerera na gosangereria abarai, abaroberia nabateneri baye bonsi b’esegi b’orogongo rwa Asuri.
ⅩⅤ Agaikerania ase ogokorera onsi aria omonene oye amochiigete. Agasangereria abarwani bagotaara n’amagoro 120,000 na baria bakorwanera chibaarasi 12,000.
ⅩⅥ Akabaroberia ase ebika na kobabeeka ang’e ase esegi.
ⅩⅦ Akabogoria omobaro omonge bwe chingamia, chitigere amo nechibarasi chitari koibora ase okobogoria emesigo. Akabogoria boigo ching’ondi, chiombe amo ne chimbori bichie koba endaagera.
ⅩⅧ Akamoa kera omorwani endagera eisane akoria amo n’ebinto ebinge bi’etaabu nechifeta korwa ase ebigachero bi’omorwoti.
ⅩⅨ Erio Holoferne agatang’anera omorwoti Nebukadinesaro, ere agasoka amo na abarwani baye bonsi. Okaba omoganda omonene bw’abarwani bariinete chigari chi’echibarasi na abagotaara na amagoro, goika bagatuba orogongo rwonsi rwa bosongo.
ⅩⅩ Amo na abarwani, mbagendete abatunyani abange batanyare kobareka; nigo barenge buna chingige gose amaroba. Rora Abag. 7:12; Yoel 2:2-11
ⅩⅪ Magega yorogendo rwa amatuko atato korwa ase omochie o Ninawi, bagaikera ebitii bie chinsinyo chi’omochie o Bekitilethi ang’e nebitunwa bire sugusu ya Kilikia. Bagatenena agwo.
ⅩⅫ Holoferne amo na abarwani baye bonsi baria bagotaara na amagoro, abariinete chibarasi amo nechigari chiechibaarasi bakageenda bosio ase ense yebitunwa.
ⅩⅩⅢ Agachisiria chinse chionsi chia Libya na Lidia. Agasakora Abarasisi na Abaishimaeli bamenyete ase ensinyo ye erooro Irianyi y’ense ya Abakeni.
ⅩⅩⅣ Holoferne akagenderera gosuka motwe akamboka orooche rwa Eyufurate erio agaeta gati ya Mesopotamia. Ere akaba okoyesiria emechie yaagachire chinsinyo chi’orooche rwa Aburoni goika ase enyaancha.
ⅩⅩⅤ Akayeira ensemo yonsi ya Kilikia na akaba kagoita onde bwensi orenge komotanga. Akagenderera motwe goika chimbebe chia sugusu ya Yafeti ang’e nense ya Arabia.
ⅩⅩⅥ Akabaumokera Abamidiani mosiabano erio agasaamba chinyomba chiabo na koira ching’ondi chiabo.
ⅩⅩⅦ Holoferne akagenda ase ense yomweya chibebekaine omochie o Damesiki na nigo biarenge ebiro biokogesa engaano. Agasaamba endagera yonsi ase emegondo yaabo naboigo agaita abamura baabo bonsi na gosakora obotenenku bwabo nobwechinse chionsi chibebekaine anseemo eyio.
ⅩⅩⅧ Abamenyi ba Mediterania bakabwatwa n’omoondoko omonene. Kera omonto omenyete ase omochie o Turo, Sidoni, Suru, Osina, Azoto na Asikeloni akabwatwa n’omoondoko omonene.