Ⅰ Chinkuma chigaikera abanto b’ebisaku buna Holoferne, omoteneneri bwa abarwani amo Nebukadinesaro omorwoti bwa Abaasuri abikorerete ebisaku ase okobisiria na gosaria kegima ebisasimero ne chie Hekalu chiabo chionsi; Ⅱ Bakabwatwa nekeondoko amo n’obwoba obonge ase engencho ye’Hekalu y’Omonene Nyasae obo n’omochie o Yerusalemu. Ⅲ Ebiro ebio konya nario bairanire ase enka yaabo Yuda korwa ase basakoretwe gochia Babiloni. Erio nario konya baruure ase omosangererekano bwogochena Hekalu, amadabahu amo nebibekerero biaye bionsi ebio biabegetwe ase ogotacheneka. Ⅳ Bakaira ogokuurera ase chinsemo chia Samaria, emechie y’Ekona, Esora, amo nerikura ria Salemu. Ⅴ Bakayebwata ase obwango chinsinyo chi’ebitunwa, bakaagacha oborendi ase ebitunwa ebio erio kobeeka ebigancha biabo aaroro na kwearigania ase esegi. Bakaba nebisio ebiya ase engencho erio nario konya baruure ase okogesa chindagera chiabo. Ⅵ Omokuani omonene Yohakimu oyoreenge ase omochie omonene o Yerusalemu ase chingaki echio, akabariikera abanto bamenyete ase emechie ya Bethulia na Betomesthaimu, ang’e ne Esdreloni ase ense omweya ere ang’e nomochie o Dothaimu. Ⅶ Akabachiika baete ase enchera egotiira gochia ase ense ye ebitunwa. Enchera eyio nero yare gosoa ase omochie o Yuda naende nengote ase ogoeta abanto goetania oyomo. Igo nabo yareenge aorooro gotanga onde bwensi otaganeiri ase oboeto obwo. Ⅷ Abaisraeli bagaikerania onsi aya bachiigetwe n’Omokuani Omonene Yoakimu amo nabagaaka abwo baumeranete abwo Yerusalemu. Ⅸ Abasacha bonsi ba Israeli bakamoreera Omonene Nyasae obo ase ogwekeia nokweng’ata. Ⅹ Ase obomo, barabwo, abakungu, abana baabo, chitugo chiabo, kera omoeti ase egati yaabo, abanto b’eng’eria nabasomba abagore bonsi bakabeeka chianga chichigunia. 4:10-12 rora Yona 3:7-8; Esteri 4:1-3 Ⅺ Abasacha bonsi bamenyete ase omochie o Yerusalemu, abakungu bonsi amo na abana, bakaumama ase obosio bwe Hekalu beagete riibu ase emetwe yaabo na kwara chianga chiabo chichigunia ase obosio Omonene. Ⅻ Ase okobeeka chigunia boigo nagotuba egesasiimero chigunia, bagaetanana egesaasimero na komosaba Omonene bwa Abaisraeli ase ogwetigana gwonsi ere tanchera abana baabo gose abakungu baabo booswe gose emechie yaabo gosarigwa. Bakamoreera Omonene tabanchera abanto b’ebisaku goikerania okogania kwabo kwogosaria Hekalu yaabo ase okoyerentera ogotacheneka. ⅩⅢ Omonene akaigwa ogosaba kwabo na korora emechaando yaabo. Nigo akorete igo ase engencho abanto ba Yuda na Yerusalemu bagendererete kweng’ata bare ase obosio bwekalu y’Omonene ase engaki entambe. 4:13 rora Esteri 4:16 ⅩⅣ Omokuani omonene Yoakimu, abakuani bande amo na abakoreri bonsi be Hekalu y’Omonene nigo besibete emesibi y’echigunia ase ebinema biabo, bakarua ebingw’anso bi’ogosambwa ase kera rituko, okoruugwa kwogwancha kwa abanto na ebingw’anso biarenge korentwa na abanto ase ogokora okobwatana. 4:14 rora Yoel 2:17 ⅩⅤ Bakeyaka riibu ase chianga chiabo komoreera Omonene ayerorere amaabera ense engima ya Israeli.