Ⅰ Ase omwaka o 160, Alekisanda Epifane, mosinto bwa Antioko o kane agaika Tolemai na koyoira omochie oyio. Abanto bakamoarigania nere akaba omorwoti obo. Ⅱ Ekero omorwoti Demeturio anyorete amang’ana ayio, ere agasangereria abarwani esegi abange, agasooka kogenda korwana na Alekisanda Epifane. Ⅲ Ase engaki eyio Demeturio akamoirera Yonathani riruube riobosaani ribwate amang’ana amange yokoebereria, Ⅳ ere nigo asemeretie amonyoore na boigo koroisia omoroberio bw’omorembe amo na Abayahudi erio Alekisanda ataraika koroisia okobwatana nabwo mamincha yaye. Ⅴ Demeturio akarengereria buna Yonathani nkoinyora areenge amabe onsi aria amokorerete ere na bamura bamwabo na ase egesaku ekegima kia Abayahudi. Ⅵ Igo Demeturio akamoroisia Yonathani koba omobwatani nere ase esegi, akamoa okobua gwokoroisia ekeombe kia abarwani be esegi na kobaa ebirwanero. Boigo agachiika buna Yonathani aegwe abasibwa abwo basiekeire ime yeburi ya Yerusalemu. Ⅶ Yonathani akageenda Yerusalemu gosooma riruube erio ase obosio bwa abanto abwo barenge ime y’eburi. Ⅷ Abanto abwo bakairoka mono ekero baigwete buna omorwoti omoeire Yonathani okobua gwokoroisia ekeombe kia abarwani be esegi. Ⅸ Bakamoa Yonathani abasibwa nere akabairania gochia ase abaibori baabo. Ⅹ Yonathani akaroisia obomenyo bwaye obonene ase omochie o Yerusalemu. Ere agachaaka koyoagaacha boyia na koyobareera. Ⅺ Akabachiika abaagachi koagaachera amagena agosungoka ase chinyasi chi’omochie na enyasi egoetanana egetunwa gia Sayoni. Ayio agakoreka boigo. Ⅻ Abamenyi abwo barenge ase chiburi chiaagachetwe na Bakide bagatama; ⅩⅢ kera omonto agatiga emeremo yaye na koirana gochia sobo. ⅩⅣ Korende Abayahudi baria konye batigire gotunyana amachiiko bakagenderera komenya Beth-zuri; ekiagera omochie oyio noro orenge obotamero bwabo bwo omoerio. ⅩⅤ Omorwoti Alekisanda akanyoora amang’ana igoro ye chiira chionsi Demeturio amoete Yonathani, igoro ya Yonathani omonyene, chiseegi konye arwanire, amakora aye yoboremu, na obokong’u konye ere anyoorire amo na abamura bamwabo. ⅩⅥ Akamanya ekeene buna ere takomonyora omonto onde onga buna Yonathani. Ekaba omorwoti Alekisanda akagania amokore Yonathani koba omobwatani oye. ⅩⅦ Eri nario riruube ere amoriikerete Yonathani: ⅩⅧ “Omorwoti Alekisanda ase omosaani oye Yonathani, amakwania ayio! ⅩⅨ Naigure buna aye nomonto omoremu. Ase igo aye nore noboronge bw’okoba omosaani bw’omorwoti. ⅩⅩ Ase rituko eri ria reero inche nagochoorire koba Omokuani omonene ase egesaku kiao, na nigo orarokwe Omosaani bw’Omorwoti. Aye noobe omobwatani oito oratoe ogokoonya.” Amo neriruube erio, omorwoti akamotomera Yonathani eyanga emonyiinga amo negutwa yetaabu. ⅩⅪ Ase omotienyi o gatano na kabere omwaka o 160, ase rituko rinene riebigutu, Yonathani akeboyia emiambaro eyio yo Omokuani omonene. Akaroisia ekeombe kia abarwani be esegi na kobaa ebirwanero ebinge. ⅩⅫ Ekero Demeturio aigwete ayio, akegosa ase omoyo oye erio agateeba: ⅩⅩⅢ “Ninki togokora bono? Twamotigire Alekisanda gototang’anera na gokong’a ase okoroisia obosaani na Abayahudi! ⅩⅩⅣ Bona nainche nigo nkobariikera Abayahudi riruube riobosani. Nimbariere chiira chiokobaa oborai ao ao, erio barabwo bang’e ogokoonya ebiro binde bionsi erabetererie.” ⅩⅩⅤ Erio akariika: Omorwoti Demeturio, ase egesaku kia Abayahudi, Amakwania ayio! ⅩⅩⅥ Intwe ntore nomogooko koigwa buna mwatunyanire okobwatana gwaito. Inwe mwatigaire koba abegenwa ase tore nabo buna inwe timorabwatana na ababisa baito. ⅩⅩⅦ Ekero eraabe buna inwe mwagendereire koba abegenwa ase tore, intwe ntobae ekeegwa ekenene. ⅩⅩⅧ Intwe intobaruuserie ebango enyinge na kobaa ogwanchererigwa ase ebinto ao ao. ⅩⅩⅨ Ase riruube eri, natugutire ebango yomotwe, n’eyomonyo nechibaango chinde chiechingeencho chinde. ⅩⅩⅩ Boigo, gochaakera ase rituko eri ria reero, inche nabaruuseirie okong’akana gw’enseemo eyemo ya isato yokogesa kwaino gwechintetere na ekeng’ese ase okwama kwa amatunda. Gochakera rituko eri kogenderera, inche tingotura ogoakana okwo korwa Yudea nechinsemo isato chiria chiabwatanetigwe na Yudea korwa Samaria amo na Galili. ⅩⅩⅪ Yerusalemu amo ne ebichie biaye bionsi inabimanyekane buna omochie omochenu na oro tokoganerigwa korua ebaango ende yonsi. ⅩⅩⅫ Korwa reero inche tindi nokobua ase eburi ya Yerusalemu; nayobeekire inse yoborai bw’Omokuani omonene, oyio boigo oraabe nokobua gwokomochoora onde bwensi ere omonyene araanche koba omorendi aroro agwo. ⅩⅩⅩⅢ Inche nabaigoreire abasibwa bonsi be esegi bare ande onsi ase oborwoti bwane. Abwo bonsi babeirwe korwa ase chibaango nonya nebaango ase chitugo chiabo. ⅩⅩⅩⅣ Tari Omoyahudi nonya n’oyomo ande onsi ase agotooka oraruusigwe ebaango ase rituko ri’Esabato, ase amatuko amanene y’omotienyi, oboyia bw’omotienyi na ase amatuko ande amanene. Boigo, ebaango tegosangererigwa ase amatuko atato magega na motwe ya amatuko ayio amanene. ⅩⅩⅩⅤ Ase amatuko ayio onde tagwancherwa kobatura ase amaakano gose kobachaanda ase enchera ende yonsi. ⅩⅩⅩⅥ Abayahudi goika 30,000 mbancheire kweriika ase ekeombe gieseegi kiomorwoti nabarabwo mbaakanwe buna abasikari bande b’omorwoti. ⅩⅩⅩⅦ Ase egati yaabo nabo baranyare kobeekwa ase chiburi chinene chi’omorwoti na abande koegwa obonene ao ase eserekari. Abarai na abanene baabo inababe Abayahudi bamwabo nabo barabwo inabaancherwe gotunyana amenaria na amachiiko abo buna omorwoti boigo ancherete abanto ba Yudea. ⅩⅩⅩⅧ Chinsemo chiria isato chi’ense ya Samaria chibwatanetigwe na Yudea, inachibarwe koba ensemo ya Yudea na kobekwa inse yobobui bw’Omokuani omonene. ⅩⅩⅩⅨ Ebitoki bi’omochie Tolemai ne endemero yaye inabikore emeremo yokogendereria Hekalu ya Yerusalemu. ⅩⅬ Boigo nariire eira yokorua ebiegwa 15,000 bi’efeta kera omwaka korwa kera ensemo ebwatekanete yekegancha kiomorwoti. ⅩⅬⅠ Omobaro bwonsi bwogokoonya bwefeta korwa ase eserekari, eyio inwe totanyaarete korwa ase emiaka ya magega, neakanwe kegima korwa bono na kogenderera erio ekoonye emeremo ye Hekalu. ⅩⅬⅡ Komenta nayio, titori gochia gotura ebing’ese biria 5,000 bi’efeta korwa ase okonyoora gwe Hekalu. Efeta eyio nigo ebatungetie abakuani baria bagokorera Hekalu. ⅩⅬⅢ Onde bwensi oriete kende gionsi agoturwa nomorwoti gose obwate ogoturwa egento kende gionsi, ekero araabe otameire Hekalu ya Yerusalemu gose ase ensemo eyemo ende yonsi ye Hekalu eyio, goika ere aberwe na koegwa enibo yaye ere ande onsi ase oborwoti bwane. ⅩⅬⅣ “Rigori riokoagaacha Hekalu ase oboyia inariakanerwe korwa ase ekegancha kiomorwoti. ⅩⅬⅤ Boigo, oboagaachi oboyia na okobareera ase chinyasi chia Yerusalemu na ase emechie emechoore ime ya Yudea, nigo biraabe bigoakanerwa korwa ase ekegancha kiomorwoti.” ⅩⅬⅥ Ekero Yonathani amo na abanto baye baigwete ebirengererio ebio bi’omorwoti Demeturio, bagasinywa kobiegena gose kobiitaba ase engencho bainyorete buna ere abakorerete bobe na kobatiringera inse goetania ekerengo. ⅩⅬⅦ Barabwo bakabwatana na Alekisanda, ekiagera ere abeete oyo bw’eritang’ani korwa ebirengererio bi’okobwatana na barabwo ase omorembe; bagatigara koba ababwatani nere goika ekero ere akwete. ⅩⅬⅧ Omorwoti Alekisanda akaroisia ekeombe ekenene na kweroberia korwana na Demeturio. ⅩⅬⅨ Korende ekero abarwani esegi ba abarwoti abwo babere baumeranete ase esegi, abarwani esegi ba Alekisanda bagekiora bagataama. Erio Demeturio akabamonyokia na akabua esegi. Ⅼ Nonya nabo, Alekisanda akarwana ogokwa nokoba goika risase rikarimera na Demeturio agaitwa ase rituko erio. ⅬⅠ Erio Alekisanda agatoma amang’ana gochia ase Tolemai o gatano narimo omoruot o Misiri agoteeba iga: ⅬⅡ “Inche nairanire ase borwoti bwane na goikaransera ekerogo kiobonene giechisokoro chiane. Namobuire Demeturio na goonchora eserekari na bono ense nigo ere ase amaboko ane. ⅬⅢ Ee inche nigo namorwanetie goika nkamobua ere amo na abarwani baye be esegi, erio inche ngaikaransera ekerogo kiobonene kioborwoti bwaye. ⅬⅣ Bono inche ninde nokogania gokora okobwatana kwobosaani naye; ing’a omoiseke oo inche imonywome, nainche ninkoe aye amo nomoiseke oo ekeegwa kebaisaine inwe mwensi.” ⅬⅤ Omorwoti Tolemai akamoiraneria: “Erio nigo riabeete rituko riomogooko, ekero kwairanete ase ense yao na kogeikaransera ekerogo kiobonene giechisokoro chiao! ⅬⅥ Inche nancheranire nokoboria kwao, korende tiga ritang’ani tororane inche amo naye ase omochie o Tolemai, agwo inatoigwane nainche ninkonywomerie omoiseke one.” ⅬⅦ Igo ase omwaka 162, Tolemai nomoiseke oye, Kileopatura bagasooka korwa Misiri na goika Tolemai. ⅬⅧ Omorwoti Alekisanda akaumerana nabarabwo, nere Tolemai akamonywomeria Alekisanda omoiseke oye Kileopatura. Enyangi egachengerwa agwo Tolemai ase omogooko kobwatekana nobonene amo nechingeencho chia abarwoti. ⅬⅨ Erio omorwoti Alekisanda akamoriikera Yonathani riruube achiche barorane amo nere. ⅬⅩ Yonathani akageenda Tolemai nesiko na koumerana na abarwoti abwo babere. ⅬⅪ Ase ebiro ebio ekeombe ekemo kia Abayahudi bamwangete Yonathani kegataka komorentera Yonathani esegi. Gekamorentera amasoero nokwemurungania ase are korende omorwoti Alekisanda akaanga kogetegerera. ⅬⅫ Ere Alekisanda agachiika Yonathani aaborigwe chianga chiaye na koboyigwa chianga chi’oborwoti chiimonyinga. Ayio agakoreka boigo. ⅬⅩⅢ Naboigo omorwoti akamoikaransia Yonathani ensemo yesiko ang’e nere. Erio akabateebi abanene baye, “Mobogorie Yonathani momotaarie goika omochie omonene na koraria buna monto onde tancheiri komosoera Yonathani ase ing’ana rinde rionsi, na monto onde bwensi tabaisa goteema komorosia ase engencho ende yonsi.” ⅬⅩⅣ Ekero okorari okwo kwabete na baria bonsi baroberetie komosoera barooche buna Yonathani aeirwe esiko na koimokererigwa igoro boigo kobekerwa egutwa yoborwoti, bagatama. ⅬⅩⅤ Omorwoti akagenderera koa Yonathani esiko goika akamobeka ase omobaro bw’eritang’ani ase “Abasani b’omorwoti,” na komokora koba omochiki bw’eseegi omogabana ase orogongo rwaye. ⅬⅩⅥ Erio Yonathani akairana gochia Yerusalemu, ore n’omogooko omonge n’okonyoora okonene. ⅬⅩⅦ Ase omwaka o 165 Demeturio o kabare mosinto o Demeturio bw’eritang’ani, akarua Kirete na goika ase ense yechisokoro chiaye. ⅬⅩⅧ Ekero omorwoti Alekisanda anyoorete amang’ana ayio, akegosa mono, akairana gochia Antiokia. ⅬⅩⅨ Erio Demeturio akamochoora Apolonio koba omogabana bw’orogongo rwa Siiria. Apolonio akaroisia ekeombe ekenene kia abarwani baye be esegi na kobeeka ekambi ang’e nomochie o Yamunia. Erio akamotomera Yonathani Omokuani omonene amang’ana akobwatia: ⅬⅩⅩ “Aye naye bweka orachiche goteema gotorwania. Ninki rende gekogera aye ogendererete gokora ogweatanana agwo ase ebitunwa naye tobwati onde ogokobwatesia? ⅬⅩⅪ Onye ekeene aye bwegenete abarwani bao be esegi, tirimboka goocha aiga ense omweya erio torengane chinguru. Ring’ana rireo neri buna ebiombe bionsi bia abarwani be esegi ase emechie nigo bire magega yane. ⅬⅩⅫ Aye mbwemanyere buna inche ning’o na abasani baane mbarabi naboigo nomanye buna tokobua kende ase obosio bwaito. Baria bagotangarete aye babeire bagoitwa ase riroba riabo abanyene; ⅬⅩⅩⅢ inaki aye orasemerie kobabua abariini chibaarasi baane amo na abarwani esegi baane bengeencho eye inche mbwate ase ense eye yomweya? Oinyore inse aiga taiyo amagena gose ebigena bikogoto oranyaare aye kwebiserera boigo tobwati enchera oratamere.” ⅬⅩⅩⅣ Ekero Yonathani anyoorete amang’ana ayio korwa ase Apolonio, akabea mono. Agachoora abasikari 10,000 korwa Yerusalemu na Simioni momura omwabo nere akarenta abasikari bande. Ebiombe ebio ⅬⅩⅩⅤ bikabeeka ekambi isiko ya Yopa. Abanto b’omochie oyio bakanga kobaigorera basoe ase omochie oyio egekogera ekeombe kia abarwani esegi ba Apolonio nao barenge ime agwo. Yonathani agachaaka esegi. ⅬⅩⅩⅥ Abanto b’omochie oyio bakaba nobwoba, bakaigora ebisieri bi’omochie. Yonathani akayoira omochie o Yopa. ⅬⅩⅩⅦ Ekero Apolonio aigwete aria agendererete, akabogoria abarwani baye be esegi be chibaarasi 3,000 na abasikari abange bagochira amagoro akageenda Ashidodi, buna ere agendererete ase orogendo rwaye. Ere kagendererete gwetogeria abarwani baye be chibaarasi, agasuka motwe goika ense yomweya. ⅬⅩⅩⅧ Yonathani akamobwatia Apolonio goika Ashidodi ne esegi egachaaka. ⅬⅩⅩⅨ Kani Apolonio nabwate abarwani baye be esegi be chibaarasi 1,000 abisete korwa magega. ⅬⅩⅩⅩ Goika agwo konye Yonathani tamanyete buna otegeirwe. Ekaba mobasokano abarwani baye be esegi bakaonchokanwa. Erio chinsara chi’ababisa chikabatonyera korwa igoro buna embura korwa mambia goika mogoroba. ⅬⅩⅩⅪ Nonya nabo, abarwani ba Yonathani be esegi bagatenena bokong’u, buna ere abachiigete goika abariini chibarasi ababisa bagachaaka kogoya. ⅬⅩⅩⅫ Goika ekero abariini chibaarasi abwo bagoya kegima, Simioni akaoroka ase egetii gieseegi ore ne ebiombe bia abarwani baye be esegi. Ere akabagwera rimo rioka na kobabua abarwani be esegi ba amagoro ababisa erio barabwo bakang’ea gotama chimbero. ⅬⅩⅩⅩⅢ Abariini chibarasi abwo bachong’ononete ase egetii giosi gieseegi, bagatama gochia Ashidodi, agwo na barabwo bakebisa ase Hekalu ye enyasae yaabo ekorokwa Beth-dagoni. ⅬⅩⅩⅩⅣ Korende ere Yonathani akayosamba omochi o Ahidodi boigo ne Hekalu ya Beth-dagoni, akabaita na kobasamba abwo bonsi batamete gochia aroro. Boigo akayesamba emechie yabebekaine na koyesakora. ⅬⅩⅩⅩⅤ Ase rituko erio, abanto goika 8,000 bagaitwa goetera ase omoro gose omorero. ⅬⅩⅩⅩⅥ Magega yayio Yonathani agasoka akageenda na kobeka ekambi yaye Asikeloni, na abanto b’omochie oyio bagasooka komoarigania nomochengo omonene. ⅬⅩⅩⅩⅦ Yonathani na abanto baye bakairana Yerusalemu na abooswa abange. ⅬⅩⅩⅩⅧ Ekero omorwoti Alekisanda anyoorete amang’ana ayio, akamoa Yonathani esiko enene kobua. ⅬⅩⅩⅩⅨ Akamotomera egetita gietaabu buna engencho ere ase omorwoti komokorera omorwoti onde boigo akamoa omochie o Ekironi ne chitaano chiaye.