Ⅰ Ekero Demeturio aigwete buna Nikanori amo na abarwani esegi baye basiriigwe ase esegi, akabairania naende Alikimo na Bakide amo na ebiombe bi’abarwani esegi baye bokorio Yudea. Ⅱ Bagaetera enchera egochia Giligali na kobeeka ekambi yaabo agwo Aribela, Bakayoira omochie o Mesalothi na kobaita abanto abange. Ⅲ Ase omotienyi bw’eritang’ani bw’omwaka 152, bakabeeka ekambi yaabo chimbebe chia Yerusalemu. Ⅳ Korwa ime ye ekambi bakageenda Beroya na abasikari bagochiera amagoro 20,000, na abagochiera chibaarasi 2,000. Ⅴ Yuda nigo abaegete ekambi Elasa, ore na abasikari 3,000 bachoorire. Ⅵ Korende ekero barora obonge bwa abarwani esegi ba ababisa, bakabwatwa nobwoba obonene. Abange ase bare bagatama korwa ekambi erio bagatigara abanto 800 boka. Ⅶ Ekero Yuda arooche buna abarwani esegi baye bagendereire gokea naende buna ere tabwati ebiro aranyare kobasangereria ase esegi konye yabereire ang’e, agakwa omoyo. Ⅷ Konye ere okuure omoyo. Korende akabateebia abarwani esegi baria batigarete nere: “Tweariganie ase esegi; nabo eranyaarekane tobue ababisa.” Ⅸ Korende abanto baye bagatema komotanga bakoboora, “Intwe titokonyaara kobabua. Onye torigetie gotooria obogima bwaito, tiga intwe bono toirane gochia seito. Erio intwe ntochiche amo na abaminto; erio tobarwanie ababisa. Ase bono intwe nabake mono.” Ⅹ Yuda akabairaneria: “Yaaya, tekoba! Nigo ere obosooku ase tore intwe gokora boigo gotama esegi. Kerabe omoerio oito oikire, tiga intwe tokwe ase engencho y’Abayahudi baminto. Intwe titosaria erieta riaito!” Ⅺ Agwo abarwani be esegi ba Bakide bagasoka na kweroberia kobarwania Abayahudi esegi. Abasikari bakoira chibaarasi bakaroberigwa ase ebiombe bibere. Abasikari ebiata bakabekwa motwe, korende abasikari bakoruta chinsara amo na abebirasi bagatang’anigwa motwe kegima. Ⅻ Bakide omonyene akeroberia ase okoboko gwokorio. Abasikari bagochiera amagoro bagachaaka gosuka motwe barabwo bagiteire korwa chinsemo ibere na baria bariinete chibaarasi. Ebituureri bi’eseegi biakabugigwa na abasikari ba Yuda nabarabwo bakabugia ebituureri biabo. ⅩⅢ Ekero abarwani abwo be esegi baumeranete, ense egatengecha. Bakarwana korwa mabia goika mogoroba. ⅩⅣ Yuda akamanya buna Bakide na abasikari ebiata nigo bare ase okoboko gw’okorio. Erio baria abaremu na ebiata bakabwatana amo nere, ⅩⅤ Bakabasenyentasenyenta abasikari bokorio ba Bakide na kobaminyokia goika egetunwa gia Azoto. ⅩⅥ Korende ekero abarwani be esegi ba Siria ba komosi barooche buna abamwabo bokorio baitirwe mono, bagekiora na komobwatia Yuda na abarwani baye be esegi korwa magega. ⅩⅦ Esegi ekaba endoro mono. Abasikari abange bechinsemo chionsi bagasiria obogima bwabo. ⅩⅧ Omoerio Yuda omonyene agaitwa erio abanto baye bonsi bagatama. ⅩⅨ Yonathani na Simioni bakabogoria omobere oye na koyotindeka ase chimbeera chi’echisokoro chiabo agwo Modeini. ⅩⅩ Bagaikaransa agwo ase embeera na komoreera Yuda. Abaisraeli bonsi bakamoreera ase amatuko amange bagoteeba: ⅩⅪ “Inaki omonyanguru agwa ere orenge omotooria bwa Abaisraeli!” ⅩⅫ Amakora ande a Yuda, esegi arwanete, oboremu bwaye, na okobua kwaye okonene tibianyaarete koriikwa egekogera biarenge ebiinge mono. ⅩⅩⅢ Magega yogokwa kwa Yuda, abatwambu baria batabwatete amachiiko bagachaaka kororekana kera ensemo ase ense ya Yudea na ababe bonsi bakarorekana naende. ⅩⅩⅣ Ase engaki eyio, enchara enene ekaba ase ense na ense engima ekaba ase ensemo ya ababe abwo. ⅩⅩⅤ Erio Bakide ase ogwancha akabachoora abanto abwo ababe korwa ase Abayahudi babe abarain b’ense. ⅩⅩⅥ Erio bakabarigia abasani ba Yuda na kobaira ase obosio bwa Bakide. Bakide akabachaanda na kobairania inse kegima. ⅩⅩⅦ Engaki eyio nigo yarenge e yogochaandwa na obororo obonge kobua ekero ababani bachaagete kobora ase egati ya Abaisraeli. ⅩⅩⅧ Erio abasani bonsi ba Yuda bakaumerana na komoteebia Yonathani: ⅩⅩⅨ “Korwa momura omino Yuda akwete, taratoka naende onde omogwekaine oratorae mamincha ya ababisa baito, mamincha ya Bakide amo na Abayahudi baito abwo bagotoengereria. ⅩⅩⅩ Ase igo reero intwe twagochoorire aye koba omorai oito na omoteneneri bwe esegi ribaga riaye erio intwe togendererie esegi yaito.” ⅩⅩⅪ Yonathani akabogoria oborai ase rituko erio na kobogoria ensemo ya Yuda momura omwabo. ⅩⅩⅫ Ekero Bakide amanyete ring’ana erio, agaetia amoite Yonathani. ⅩⅩⅩⅢ Korende ekero Yonathani amanya emeroberio eyio, agatama gochia ase erooro ya Tekoa, ere amo na momura omwabo, Simioni amo na abanto baabo. Agwo bakabeeka ekambi ange neritibo ria Asifari. ⅩⅩⅩⅣ (Bakide akanyoora amang’ana ayio ase rituko ri’Esabato, akaamboka orooche ere amo na abarwani baye be esegi bonsi.) ⅩⅩⅩⅤ Yonathani akamotoma momura omwabo Yohana oyio orenge gokorera chiamate chi’abasikari abasabe Ababetea, abasani ba Yonathani ribaga riokogacha ebinto biabo ebinge bachete nabio ase ekiage kiabo. ⅩⅩⅩⅥ Korende abanto be eamate ya Yamburi korwa Medeba bakamogwera Yohana bakamobwata na koira ebinto bionsi arenge nabio. ⅩⅩⅩⅦ Ase ebiro ebike Yonathani na momura omwabo Simioni bakaigwa buna eamate ya Yamburi nigo yebegete ang’e gochengera enyangi enene. Boigo buna barabwo nigo barenge goci gotwara okorobera okonene gwokomokooba omoriakari korwa ase omochie o Nadabathi. Omoriakari nigo arenge omoiseke bw’oyomo bwa abanene ba Kaanani. ⅩⅩⅩⅧ Yonathani na momura omwabo bagaetia koirania egesiomba ase engencho ya amanyinga a momura omwabo Yohana ayio aiteretwe. Barabwo amo na abanto baabo bakariina egetunwa ekemo na kwebisa. ⅩⅩⅩⅨ Bakarigereria na korora abanto babogoretie chigurube bagoeta na goaka egeturi. Omonyanyaangi, abasani baye, ne eamate yaye konye bachire koumerana na barabwo. Nigo babogoretie ebirwanero naboigo bakobugia chikonu na ebinto binde biogoteera. ⅩⅬ Agwo Abayahudi bakarwa ase obwebisero bwabo bakabagwera na kobaita abange baabo; abaminchoretie bagatama gochia ebitunwa. Abayahudi bakaira obotenenku bwabo bwonsi. ⅩⅬⅠ Erio enyaangi eyio akaonchoka koba ebirero na amateera yomochengo akaonchoka akaba ay’ebirero na okweumia. ⅩⅬⅡ Ekero Yonathani na Simioni bakoorete goakana egesiomba ase amanyinga a momura omwabo, bakairana gochia ase amatibo a Yorodani. ⅩⅬⅢ Bakide akanyoora amang’ana igoro yayio akoregete. Ase rituko ri’Esabato agaika na abarwani baye be esegi goika ase engegu yorooche rwa Yorodani. ⅩⅬⅣ Yonathani akabateebia abanto baye: “Bono goika torwane esegi yogokwa no okoba. Twaonchokananirwe mono kobua ngaki ende yonsi. ⅩⅬⅤ Ababisa nigo bare bosio bwaito. Magega yaito norooche. Borio na bonosi bwaito nebisarara namatibo. Ng’ai intwe toratamere gochia? ⅩⅬⅥ Bono saba Omonene atotoorie korwa ase chinchara chi’ababisa baito.” ⅩⅬⅦ Esegi egachaaka. Yonathani akarambora okoboko kwaye erio amoite Bakide. Korende Bakide akebacha agatama gochia magega ya abarwani baye be esegi. ⅩⅬⅧ Erio Yonathani na abanto baye bagasoa ime yorooche rwa Yorodani. Bagaaka obari goika ng’umbu erio banyaare gotama. Korende abanto ba Bakide tibaabogete kobabwatia. ⅩⅬⅨ Bakide agasiria abanto baye ang’e 1,000. Ⅼ Magega yokoirana goika Yerusalemu, Bakide akaagacha chinyasi chintambe na ebisieri ebikong’u ase chinyomba chiaye ase omochie o Yudea: Emau, Beth-horoni, Betheli, Timunati, Farathoni, Tefoni; na ase orwaki rwa Yeriko. ⅬⅠ Ase emechie eyio yonsi, Bakideakabeeka ebiombe bia abasikari erio barabwo babakorere bobe Abayahudi. ⅬⅡ Agakong’ia boigo chinyomba chia Beth-zuri na Gazara naboigo eburi ya Yerusalemu. Akabeeka aroro ebiombe bia abarwani be esegi ne ebiage bie endagera. ⅬⅢ Erio akababwata abana ba abanto basikire ase omochie na kobakora abooswa na kobasiekera ime ase eburi ya Yerusalemu. ⅬⅣ Ase omotienyi o kabere ase omwaka o 153, Omokuani omonene, Alikimo agachiika enyasi ya ime ye Hekalu etaagorwe. Gokora boigo nigo konga buna ogosaria keria ababani bakoorete; ekero bachia gochaaka ogotagora enyasi, ⅬⅤ Alikimo akanyoora amaakwa na emeremo egatenena. Omonwa oye okagataa agasinywa koyomumora, gokwana gose koriera abanto baye omwando. ⅬⅥ Agakwa ore n’obosareru obonene. ⅬⅦ Ekero Bakide anyorete amang’ana yo ogokwa okwo, akairana gochia ase omorwoti Demeturio na ense ya Yudea ekaba n’omorembe ase emiaka ebere. ⅬⅧ Erio abakaayayu bonsi bagateeba: “Rora, Yonathani na abanto baye nigo bare n’omorembe amo nobuya. Toise komorenta Bakide aiga, ere nigo arababwate bonsi ase obotuko obomo.” ⅬⅨ Barabwo bakageenda gokora ebigambo na Bakide. ⅬⅩ Bakide akaimokia na abarwani esegi baye abange kegima na kibariikera amarube abobisi abasani baye bonsi bareenge ase ense ya Yudea, okobaboria bamobwate Yonathani na abanto baye. Korende barabwo tibanyaara goikerania ayio ase engencho omoroberio obo omanyekanete mapema. ⅬⅪ Yonathani na abanto baye bakababwata abarua abwo 60 na kobaita. ⅬⅫ Kegima Yonathani, Simioni na abarwani esegi baabo bagasooka kogenda Beth-basi ase ense y’erooro. Agwo bagachuka amatombe yechinyomba na gotenenia oborendi bwo omochie o Beth-basi. ⅬⅩⅢ Ekero Bakide ayanyoorete ayio onsi, agasangereria abarwani be esegi baye bonsi na kobabeeka amo bonsi baria barenge komobwatesia ase ense ya Yudea. ⅬⅩⅣ Erio ere akageenda na koyogwera omochie o Beth-basi korwa chinsemo chionsi. Akaagacha etinga ye esegi. Ekero esegi yagenderera ase amatuko amange, ⅬⅩⅤ Yonathani akamotiga momura omwabo ime yomochie, akageenda ensemo ye emegondo ase ense eyio ore nekeombe kia abanto abake igo. ⅬⅩⅥ Agwo Yonathani akamobua Odomera na abanto baye erio akabagwera eamate ya Fasironi ase chiema chiabo. Abwo babuetwe bakabwatana nere ase okorwana. ⅬⅩⅦ Ase chingaki echio echio, Simioni na abanto baye bagatama korwa ase omochie o Beth-basi bakayesamba etinga eria ye esegi. ⅬⅩⅧ Ase esegi eyio, Bakide akabwatwa bobe mono goika emeroberio yaye yonsi egatantanigwa. Ere akabugwa ae esegi. ⅬⅩⅨ Ere akababea mono Abayahudi baria bamoseemetie na komosegeta agende Yudea; akabaita abange baabo. Erio ere Bakide agaetia koirana gochia ense yaye. ⅬⅩⅩ Korende ekero Yonathani anyora amang’ana ayio, akabatoma abanto baye gochia ase Bakide igoro yokoroisia emeroberio ya amachiiko yomorembe na koirania abasibwa ba Boyahudi. ⅬⅩⅪ Bakide agaitabera gokora kobwatekana nokoboria kwa Yonathani na gotiana ase chiira buna takomokorera bobe ase obogima bwaye bwonsi. ⅬⅩⅫ Bakide akamoiraneria Yonathani abasibwa bonsi Abayahudi konye abwatire na kobaira korwa ense ya Yudea. ⅬⅩⅩⅢ Agwo esegi egatiga korwana ase ense ya Israeli. Yonathani agakora obomenyo bwaye Mikimashi, agachaaka kobaraa Abaisraeli, na kobaseria baria ababe bonsi korwa ense eyio.