Ⅰ Konye Yuda oiguure chinkuma chia Abaroma, buna barabwo nigo bare nechinguru chinene chi’abasikari be esegi. Ere namanyete buna barabwo nkoarigania bareenge bonsi baria bakorigia kobwatana nabarabwo na boigo buna bonsi abwo bagosoa ase bare nabo barenge kobanyoora buna abasani b’ekeene ba Rumi. Ⅱ Boigo abanto mbamoteebetie Yudaigoro ye esegi ya Abaroma yarwanete, na buna bababuete Abagalatia noboremu na kobetereria abanto baabo kobaruera ebango. Ⅲ Nateebetigwe boigo buna Abaroma bakorete aria ase Isipania na buna babwatete chingoro chi’efeta ne etaabu. Ⅳ Ase emeroberio yaabo na okoganya, nigo bayebwatete ense yonsi ya Isipania nonya ero yarenge oboare korwa Rumi. Boigo barabwo mbababuete abarwoti babachierete ase esegi korwa ase chinse chia aare, bakabamoinogora na kobabua goika nonya mbaria batakwete ekebabetereria kobaruera Abaroma ebango kera omwaka. Ⅴ Konye barabwo barwanire esegi na kobua Filipo, Pereseo, omorwoti o Makedonia, na bonsi abwo babwatanete na aba ase okorwania Rumi. Ⅵ Konye babuire ninya na Omosike Antioko, omorwoti o Asia oyio obagwerete Abaroma ne chinchogu 120, chibaarasi, chigari ne emeganda ya abarwani esegi. Ⅶ Bakamobwata Antioko ore moyo, bakamobetereria ere amo na abarwoti abwo bamobwatisetie korwa ebango enene, koira abooswa sobo, boigo korwa na koira ensemo ere engiya ye chingongo chiabo. Ⅷ Buna ense ya India, Media na Lidia. Bakaira chinsemo echio na komoa omorwoti Eumene. Ⅸ Ekero Abagiriki bakorete emeroberio yokobaumokera na kobasiria, Ⅹ Abaroma bagategora emeroberio eyio, bakaira ejamadari eyemo ekabaonchia. Abaroma bakabaita Abagiriki ase obonge, bakabaira abakungu na abana baabo koba abasomba, bakabasakora na gotwara ense yaabo, bagatagora chinyasi chiabo na barabwo boigo bakabakora koba abasomba buna bare ase rituko eri. Ⅺ Boigo mbabaitete na kobakora abatomwa abanto ba amarwoti ande ase chinse chire chingegu ye enyancha na onde bwensi origetie korwana na barabwo. Ⅻ Korende mbagendereretie obosaani ase ababwatani baabo baria babetigerete ase oborendi. Bakabaita na kobabua abarwoti ba ang’e na abaare na kera omonto oigwete chinkuma chia Abaroma nigo abairogete. ⅩⅢ Barabwo mbabakoonyete abanto bande koba abarwoti, na ase ensemo ende bakabarusia abande ase oborwoti. Ekeene Abaroma nigo barenge nokobua ase ebisaku bionsi bi’ense. ⅩⅣ Nonya nabo, tarenge Omoroma oyomo origetie gokiinia ekerogo kiaye ere omonyene gose kweboyia chianga chi’abarwoti chimonyinga ase ogwetang’anania. ⅩⅤ Barabwo nigo baroisetie egeikaranso kiabagaaka 320 abwo barenge goikaransa na goetia amang’ana yogokinigwa kwabo. ⅩⅥ Ase kera omwaka nigo barenge komoa omonto oyomo emeremo yokoyeraa ense engima. Kera omonto nigo arenge komoigwera omorai oyio na onde tarenge nonya noyomo ore komoigwera endamwamu gose ribero. ⅩⅦ Bono Yuda, akabachoora Eupolemo mosinto o Yohana omoochokoro bwa Akosi, Yasoni mosinto bwe Eliezari, akabatoma Rumi koroisia okobwatana bw’obosani na okobwaterana na Abaroma. ⅩⅧ Ere nigo akorete ayio erio gwesibora korwa ase obosomba bwa Abagiriki, boigo ase engencho Abayahudi konye barorire buna ngokorwa bare koba abasomba. ⅩⅨ Yasoni na Eupolemo bagaika Rumi nyuma y’orogendo orotaambe na orokong’u. Bakabanyoora egeikaranso kia abagaaka na kobateebia iga: ⅩⅩ “Yuda Makabi, bamura bamwabo, na egesaku kia Abayahudi batotomire ase more erio toroisie okobwatana kwomorembe noborendi nainwe erio tonyaare koriikwa koba ababwatani baino boronge.” ⅩⅪ Abaroma bagancherana ogosaba okwo, ⅩⅫ na aya naro amariiko ye ekaratasi eyio arigetwe ase ebisamunye bie etai, akairwa Yerusalemu erio abe ekeinyorio giokobwatana okwmbe na okobwaterana: ⅩⅩⅢ Obobui bobeo botambe ase Abaroma na egesaku kia Abayahudi, ase ense na ase enyancha! Omoro tobakuna; omobisa tabaika ang’e. ⅩⅩⅣ Ekero esegi eraabe yarariigwe ase Abaroma, gose omobwatani oye onde bwensi ande onsi aria, ⅩⅩⅤ egesaku kia Abayahudi nkerue ogokoonya gwokwerwa ne chinibo koreng’ana nokogania korabeo. ⅩⅩⅥ Na ababisa abwo barakore esegi, Abayahudi tibabaa gose kobaereria endagera, ebirwanero gose chimeeri buna twancheranire na Rumi. Abayahudi mbaikeranie amachiiko ayio batari goakanwa. ⅩⅩⅦ Boigo kerabeo esegi ekorarigwa ase Abayahudi, Abarumi mbarue ogokoonya bwechiniibo na okwerua, koreng’ana nokogania korabeo. ⅩⅩⅧ Na ababisa abwo barakore esegi, Abarumi tibabaa gose kobaereria endagera, ebirwanero gose chimeeri buna twancheranire na Rumi. Abayahudi mbaikeranie amachiiko ayio komocha gotaiyo. ⅩⅩⅨ “Aya naro amachiiko yokobwatana Abaroma bakorire n’egesaku kia Abayahudi. ⅩⅩⅩ Korende, kerabe agwo motwe, chinsemo echi ibere chiaganirie komenta gose korusia ekeng’ese kende gionsi, n’yaancherwe gokora boigo na kende gionsi kerarusigwe gose komentwa nkebe giancheire. ⅩⅩⅪ Naende boigo, ase amabe ayio omorwoti Demeturio abakoreire Abayahudi, twamoriikeire Demeturio buna ekobwatia: Nase ki okobakorera bobe na kobarianania bobe igo abasani na ababwatani baito Abayahudi? ⅩⅩⅫ Ekero barabe bachire ase tore na kwemurungania ase engencho yaino naende, intwe ntobabwatesie Abayahudi, ntokoranie nainwe ase amaache na ase ense enyomo.”