Ⅰ Ase omwaka o 151, Demeturio mosinto o Seleuko akarua Rumi agaika ase omochie oyomo ase engegu yebisinga bie enyancha ya Mediterania ore na abanto bake igo. Akeraria koba omorwoti aroro agwo. Ⅱ Ekero aimogete kogenda ase enyomba y’oborwoti ya abagaaka baabo, abasikari bakababwata Antioko o gatano na Lisia na kobaira ase Demeturio. Ⅲ Korende ekero Demeturio aigwete omoroberio oyio agateeba: “Inche tindigeti korora amasio abo.” Ⅳ Ekaba abasikari bagaita Antioko o gatano na Lisia na ere Demeturio agaikaransa ase ekerogo kioborwoti. Ⅴ Ekaba Abayahudi baria ababe na batamosigete Omonene, ase oborai bwa Alikimo oyio oganetie koba Omokuani omonene, bakamochiera Demeturio. Ⅵ Bakabasoera Abayahudi bamwabo bakoboora: “Yuda amo na bamura bamwabo babaitire abasani bao bonsi nabarabwo batoseririe intwe korwa ase ense yaito. Ⅶ Bono aye motome monto onde bwensi omwegenete arore buna barabwo basambete chinibo chiaito na buna ense yomorwoti yasaretigwe erio aye obae egesusuro Yuda na bamura bamwabo na abakoonyi baabo bonsi.” Ⅷ Ekaba omorwoti akamochoora Bakide, oyomo ase abaseemia baye oyio orenge omogabana bw’orogongo rwa ng’umbu y’orooche. Ere Bakide nigo arenge omonto bw’engeencho enene naende omwegenwa kegima ase omorwoti. Ⅸ Omorwoti akamotoma kogeenda noria omotwambu Alikimo, oyio ochooretwe nomorwoti koba Omokuani omonene; akabachiika goakana egesiomba ase Abayahudi. Ⅹ Barabwo bakarua Antiokia, bagaika Yudea bare na abarwani be esegi abange. Bakide agateema kobang’aina Yuda na bamura bamwabo ase okobatoma abanto na amang’ana yokorigia omorembe. Ⅺ Korende ekero Yuda amo na abamwabo barooche buna aba nigo bachicha bare na abarwani be esegi abange, barabwo tibeegena amang’ana ya baria batometwe. Ⅻ Bono ekeombe kiabamanyi ba amachiiko gekamochiera Alikimo na Bakide kogania amachiiko yoboronge. ⅩⅢ Abaasidimo abwo nabwo Abayahudi b’eritang’ani bateemete korigia omorembe korwa ase Alikimo na Bakide. ⅩⅣ Barabwo nigo barengereretie buna Alikimo oyio orenge Omokuani omonene ase ororeria rwa Aroni nonya ochete na abarwani be esegi, ase nchera ende yonsi, tarenge gochia kobakorera bobe. ⅩⅤ Alikimo agakwana na barabwo amang’ana y’omorembe na koria chiira ase ogotiana ogoteeba: “Intwe titokobakorera bobe inwe abanyene gose abasani baino.” ⅩⅥ Barabwo bakamwegena. Korende erio kegima akababwata abanto 60 ase egati yaabo na kobaita rituko erio erio, buna eriikire: ⅩⅦ “Amanyinga ya abegenwa bao agaiterwa, emebere yaaboegatugutwa aa na aaria Yerusalemu; tatigarete oyo orenge gotindeka ebitondo.” ⅩⅧ Abanto bonsi bakaboboa Bakide na Alikimo bagoteeba: “Barabwo tibamanyeti engencho ye ekeene na oboronge. Nigo batianete ase chiira na barabwo bakabuna chiira chiabo barabwo abanyene!” ⅩⅨ Bakide akarua Yerusalemu na koroisia obomenyo bwaye agwo Beth-zaithi. Erio agachiika barigigwe na kobwatwa Abayahudi baria bamotamete na akabaita na koruta emebere yaabo engoro ime abande ase egati yaabo. ⅩⅩ Erio ere akamotigera Alikimo oborai bw’ense eyio. Akamotigera ebiombe bia abarwani be esegi bamokonye, ere akairana gochia ase omorwoti. ⅩⅪ Erio Alikimo agachaaka emeroberio yogokiinia obokuani bwaye obonene. ⅩⅫ Abanto bonsi abachege bakabwatana nere. Bayebwata na koyebetereria ense ya Yudea koigwera bakarenta ogosiria okonene ase Israeli. ⅩⅩⅢ Yuda akarora amabe ayio Alikimo na abamwabo bakorete ase egati ya Abaisraeli; ayio nigo arenge amabe kobua aria akoretwe na abanto bebeisaku binde. ⅩⅩⅣ Erio Yuda agaetanana ase ense yonsi ya Yedea, agaakana egesiomba ase abanto bonsi baria bamotamete na kobwatana na Alikimo, akabagitera tibarwa ase omochie kogeenda mogondo. ⅩⅩⅤ Ekero Alikimo arooche buna Yuda amo na abanto baye, bamentekanire chinguru, na komanya buna takonyaara koamererania na barabwo, ere akairana ase omorwoti na kobateebera baabo Yuda oborimo. ⅩⅩⅥ Errio omorwoti akamotoma Nikanori oyomo bwa abanene baye abasike otyio boigo ageechete, Abayahudi mono na komochiika abaite na kobasiria Abayahudi. ⅩⅩⅦ Nikanori agaika Yerusalemu na abarwani be esegi abange ogokumia. Agateema boigo komong’aina Yuda amo na abamwabo na amang’ana yomorembe, ⅩⅩⅧ ogoteeba: Engencho teiyo nonya nenke yogokora esegi gati yaino naintwe. Inche ninchiche na abanto bake igo agwo obosio ase obosio ase chinkwana chimorembe. ⅩⅩⅨ Nikanori akamochiera Yuda na gokwanania nere kebosaani. Ani ababisa nigo beariganetie komobwata Yuda. ⅩⅩⅩ Ekero amanya buna ogoocha kwa Nikanori nigo kore okwobong’ainereria bwokomorigia, Yuda akamoiroka na kwanga koumerana nere eria kabere. ⅩⅩⅪ Nikanori akamanya buna omoroberio oye omanyekanire. Erio akarua Yerusalemu na kogenda korwana na Yuda ang’e na Kafari-salama. ⅩⅩⅫ Abanto koreng’ana 500 ase abarwani be esegi ba Nikanori bagaitwa, na baria baminchoretie bagatama gochia ase orwaki rwa Daudi. ⅩⅩⅩⅢ Magega ya amang’ana ayio gakorekanire, Nikanori akageenda ase egetunwa gia Sayoni. Abande ase egati ya abakuani na abagaaka ba abanto bakamoarigania na amang’ana yomorembe, boigo bakamworokia ekeng’wanso kiogosaambwa ekio kiarenge koruugwa ase engencho yomorwoti. ⅩⅩⅩⅣ Korende Nikanori akabachaaya na kobasaria erio ere agakwana nobwetogia bosio bwabo. ⅩⅩⅩⅤ Agakorera gotiana: “Onye Yuda amo na abarwani be esegi baye tibagotiga abanyene esegi na gonsika bono, inche ninsaambe omorero Hekalu eye kegima ekero nabuire esegi nkoirana goocha.” Akarwa agwo nekeririanda. ⅩⅩⅩⅥ Abakuani baria bakairana gochia ime ye Hekalu na gotenena bosio bw’egesasiimero bakarera bagoteeba: ⅩⅩⅩⅦ “Omonene naye gwachoorete Hekalu eye erokwe ase erieta riao, boigo ebe enyomba yogosaba na ogosorora ase engencho ya abanto bao. ⅩⅩⅩⅧ Bono moe egesusuro omonto oyo amo na abarwani be esegi baye; na bonsi baitwe ase omoro. Inyora okorama kwabo; aye tobatiga bagenderere komenya naende.” ⅩⅩⅩⅨ Nikanaori akarua Yerusalemu, akabeeka ekambi yaye agwo Beth-horoni na agwo abarwani be esegi ba Siria bakabwatana amo nere. ⅩⅬ Yuda nere akabeeka ekambi yaye Adasa, ore na abanto 3,000. Ere agasaba okobora: ⅩⅬⅠ “Omonene, ekero abanto baria batometwe bakoraamete, omomalaika oo nigo abaitete Abaashuru 185,000. ⅩⅬⅡ Bono ase enchera eyio eyio, reero osegenyesegenye abarwani be esegi bare ase obosio bwaito. Erio kera omonto amanye buna Nikanori nigo akoegwa egesusuro ase engencho achaayete Hekalu yao enchenu. Aye omoe egesusuro koreng’ana nobobe bwaye.” ⅩⅬⅢ Ase rituko ria ikomi na gatato ase omotienyi bwa Adari, abarwani esegi bakarwana esegi endito. Abarwani esegi ba Nikanori bakabugwa. Nikanori akaba omonto bw’eritang’ani goitwa ase esegi, ⅩⅬⅣ na ekero abasikari baye barooche buna ere oitirwe, bakuruta ebirwanero biabo inse bagatama. ⅩⅬⅤ Abayahudi bakabamonyokia omobaso boira, korwa Adasa goika Gazara na ekero bagendererete kobaminyokia bakaba bakobugia egetuureri gieseegi. ⅩⅬⅥ Abanto bababebekaine korwa ase ebinyoro bionsi bia Yudea bigasooka na kobagwera ababisa abwo barenge gotama. Ababisa bakabetererigwa koirana magega na koumerana na abarwani be esegi abwo barenge kobamonyokia. Ababisa bonsi bagaitwa ase esegi eyio; tatigara nonya n’omonto obo oyomo. ⅩⅬⅦ Erio Abayahudi bakabogoria ebisakore na abooswa baabo. Bakamonacha Nikanori omotwe nokoboko kwaye gwokorio koria aramborete noboenenu bakabiira Yersalemu na kobitonga isiko. ⅩⅬⅧ Abayahudi bakagooka mono na gochengera rituko erio buna rituko riomogooko omonene, ⅩⅬⅨ na gochiika boigo richengerwe kera omwaka, riruko ria ikomi na gatato riomotienyi bwa Adari. Ⅼ Ase ebiro ebike, ense ya Yudea ekaba nomorembe.