Ⅰ Ekero Omorwoti Antioko o kane arenge goeta Mesopotamia ime yechingongo chi’ebitunwa akaigwa amang’ana yomochie bwe Elimaisi ase ense ya Abaperisi oyio okumete kegima ase obonda bwaye bw’echifeta ne etaabu. Ⅱ Hekalu yaye nigo yabwate obotenenku obonene, eichire chinguba chi’etaabu, abietubo biegekuba na ebirwanero biatigetwe aroro na Alekisanda omwana bw’omorwoti mosinto o Filipo omorwoti o Makedonia oyio orenge omoteneneri bw’eritang’ani bwa Abagiriki. Ⅲ Antioko agaika Elimaisi, agateema gosakora na koyoira omochie oyio korende tanyaara egekogera konye abamenyi b’omochie oyio bamanyire omoroberio oye, Ⅳ barabwo bagasangereria abarwani esegi baabo na koamererania nere. Ekaba Antioko akairana gochia Babuloni ore n’obororo. Ⅴ Agwo Perisi, omorwoti Antioko akarenterwa amang’ana buna abarwani esegi abwo atomete Yudea babaiurwe; Ⅵ boigo buna Lisia na abarwani esegi baye baria barenge abanyanguru nigo babetereretigwe gotama Abayahudi; buna Abayahudi bakong’ire mono kobwatekana nogosangereria ebirwanero ebio babeire bagosakora korwa ase abarwani esegi b’ababisa baabo Ⅶ buna barabwo batagoire egesasiimero kia enyasae y’oborimo eyio Antioko aagachete agwo igoro y’egesasiimero kia Abayahudi agwo Yerusalemu; boigo buna barabwo baetananirie enyasi entambe ase Hekalu buna yarenge omochakano konye ere Antioko ataracha, buna barabwo bairire na koyorenda omochie o Beth-zuri oyio oreenge oyomo bw’emechie y’omorwoti Antioko. Ⅷ Ekero omorwoti aigwete amang’ana ayio, agaichana na konyegerigwa akagwa borere akarwara ase engencho amang’ana abeete mamincha nogosemeria kwaye. Ⅸ Ere akaba ore omorwaire ase ebiro ebitambe ase engencho ya amang’ana ayio; akarambereria na akarora omosunte bw’obwoba, erio akamanya ng’a ngokwa are. Ⅹ Erio akabarangeria abasani baye bonsi akabateebia: Tindi na toro na enkoro yane yaichoirwe n’obwoba nokoiroka. Ⅺ Ritang’ani nigo neboretie ninki kiagerete emechaando eye ekanyoora inche agwo ase oborwoti bwane inche nabeire omuya na bwanchire na abanto bonsi! Ⅻ Erio inche nkainyora obobe nakorete Yerusalemu ase okobogoria ebibeekerero bietaabu n’efeta korwa ase Hekalu erio inche inkarigia kobasiria bosa abamenyi ba Yudea. ⅩⅢ Namanyire buna eke nakio kiagerire obokong’u abo bwanchicheire nainche bono nigo inde ang’e gokwa ase ense eye y’abanyene. ⅩⅣ Erio akamorangeria Filipo, oyomobwa abaseemia baye omonene akamoa bionsi ebio ere abwate. ⅩⅤ Akamoa egutwa yaye, eyanga yaye nebonyi yaye yomouri. Akamochiika amorere na komosomia omwana oye Antioko o gatano goika ere obeire omorwoti. ⅩⅥ Omorwoti Antioko agakwa ase omwaka o 149. ⅩⅦ Ekero Lisia aigwete buna omorwoti okuure, Akamobeka omosae Antioko ase oborwoti ribaga ria ise na komoa erieta Eupatori. Lisia konye omorerire Antioko o gatano kowa obwana bwaye. ⅩⅧ Ase ebiro ebio ababisa nigo barenge ase chinsinyo barenge kona kobatianera Abaisraeli ang’e nenseemo ye Hekalu. Barabwo nigo barenge kona goteema kera ekero kobaremaria Abayahudi na kobikong’ia ebisaku binde. ⅩⅨ Erio Yuda akaroberia kobasiria kegima. Akabasangereria abanto baye bonsi erio babanarie ababisa. ⅩⅩ Abanto bagasangererekana na goetanana orwaki orwo ase omwaka o 150, na bakaagacha emerobiri na ebibekerero binde biokoruta ebirwanero. ⅩⅪ Ekaba ase egati ya ababisa baria banaaretigwe bagatama, na egati yabo Abayahudi ababe abwo bababwatesetie. ⅩⅫ Erio bakageenda ase omorwoti, bagateeba, “Aye ninki oganyete otarachia goakana egesiomba ase amabe ayio bakoreirwe abaaminto? ⅩⅩⅢ Intwe nigo tweruete komokorera iso, kobwata amachiiko aye na koigwera amorokererio aye. ⅩⅩⅣ Intwe inki twanyoorete? Bono abanto baminto babeire ababisa baito. Ase ekeene bamoitire kera oyomo oito oyio bakorora na boigo gotoibera chinibo chiaito. ⅩⅩⅤ Korende nintwe tweka batarakorera bobe; babagwereire abababebekaine bonsi. ⅩⅩⅥ Bono baetananire orwaki rwa Yerusalemu nigo batagete koyoira. ⅩⅩⅦ Aye otakoreti bwango ase okobatanga rirorio barabwo inabakore amange naye tokonyara kobatanga.” ⅩⅩⅧ Ekero omorwoti aigwete ayio, ere akabea mono. Akabasangereria abateneneri ba abarwani be esegi bonsi, abanene ba abarwani baye be esegi na baria batenenerete abarwani be chibaarasi. ⅩⅩⅨ Boigo akabagora abasikai b’eng’eria korwa chinse chinde na korwa ase ebisinga bia Abagiriki. ⅩⅩⅩ Abarwani baye be esegi bagotaara na amagoro bakaba 10,000, abechibaarasi 20,000 ne chinchogu chi’eseegi 32. ⅩⅩⅪ Barabwo bagaetera Idumea erio bagende koyonaria omochie o Beth-zuri agwo ase aseegi yairete amatuko amange. Abarwani be esegi bo omorwoti bakaagacha chitinga chi’okoruta ebioge korende abanto abwo barenge omochie ime bakerwanerera noboremu bagasooka isiko na gosaamba etinga eyio yababisa yarenge kobaruta ebioge. ⅩⅩⅫ Erio Yuda akabarusia abarwani baye be esegi korwa ase orwaki rwa Yerusalemu, akabeeka ekambi aria Beth-zaria, koumerana ne ekambi y’abarwani be esegi b’omorwoti. ⅩⅩⅩⅢ Mambia chuni ase rituko riare kobwatia omorwoti akabogoria abarwani baye b’esegi ase obwango na kobabeeka ase enchera yokogeenda Beth-zakaria. Ebiombe bia abarwani be esegi baye bikebaanga na kwearigania ase esegi; bakabugia egetuureri. ⅩⅩⅩⅣ Bagachinyoinsia chinchogu chiabo amaache yeemesabibu ne chibiribiri erio gochiseegeta ase esegi. ⅩⅩⅩⅤ Chinchogu echio chikagaba ebiombe bia abasikari bagochiera amagoro: ase kera enchogu eyemo, abasikari ba amagoro 1,000 babeegete ebigogwa chiechuma ase emetwe yaabo na abarwani be chibaarasi 500, bagotunyana chinchogu echio korwa magega. ⅩⅩⅩⅥ Abwo bakaba bakobwatia chinchogu echio gochia kera ase chiarenge kogeenda batari gochitiga nonya ng’ake. ⅩⅩⅩⅦ Agwo ase omogongo bwenchogu nigo baagachete enyomba enkong’u yabwate abanto baane bare ne ebioge nyuma y’Omoindi oyio orenge kogendia enchogu eyio. ⅩⅩⅩⅧ Lisia akabaroberia baria bariinete chibarasi ase amakere ya abarwani be esegi baye ase okorio na bomosi, agwo ase barenge konyaara gokengerwa na abasikari baria bagochiera amagoro erio barabwo bagendererete koumokera ababisa. ⅩⅩⅩⅨ Risase rigachimesia chinguba chiabo chi’etaabu ne chichuma, ebitunwa bikairaneria obomekameku boria buna ebieri bi’omorero. ⅩⅬ Ensemo ya abarwani be esegi b’omorwoti ekaimokererigwa buna ebigoro ebitambe na ebinde bireng’anaine erio abasikari bagasuka motwe ase ogwesigoria na obokanyeku. ⅩⅬⅠ Bonsi bakegosa ekero baigwete amatitiria ya amagoro abo na ogoakana kwebirwanero biabo. Ase ekeene abarwani be esegi baabo nigo barenge abange naende bare nechinguru kegima. ⅩⅬⅡ Korende Yuda na abarwani be esegi baye bagasoa ase esegi na goita abarwani be esegi b’omorwoti 600. ⅩⅬⅢ Eliezari oyio okorokwa Avarani akarora buna enchogu eyemo nigo yarenge enene kobua echinde na buna nigo yaboyirie emiambaro yomorwoti. Erio akarengereria buna omorwoti omonyene nao ariinete enchogu eyio. ⅩⅬⅣ Ere akerua obogima bwaye ere omonyene kobatooria abanto baye erio ere boigo enyoorere esiiko etaere. ⅩⅬⅤ Ase oboremu akayechiera enchogu eria ase egati ya abarwani be esegi bagochiera amagoro. Ere agasuka motwe bwango ogoita abanto okorio no okobee nonya na abasikari b’omorwoti bakamwebachera kera ensemo. ⅩⅬⅥ Akanyenyeka inse yamagoro yenchogu eria na koyebeta ritimo ase enda yaye. Enchogu eria agakwa, ekamogwera Eliezari na komoita. ⅩⅬⅦ Ekero Abayahudi barooche chinguru chia abarwani be esegi b’omorwoti na okorwana kwabo, bakairana magega. ⅩⅬⅧ Omorwoti na abarwani be esegi baye bagasuka motwe erinde babagwere Abayahudi agwo ase omochie o Yerusalemu. Bakabeeka ekambi Yudea na ase egetunwa gia Sayoni. ⅩⅬⅨ Omorwoti akaroisia omorembe na abanto ba Beth-zuri, erio abanto abwo bakarua ase omochie oyio egekogera barabwo tibaarenge nendaagera ebaisaine ase omwaka oyio bw’ogotimoka ekero abanto batari korema gose gosimeka. Ⅼ Omorwoti akaira omochie o Beth-zuri na kwebekera abareendi baye aroro agwo. ⅬⅠ Akayeetanana na kogitera Hekalu ase ebiro ebitambe. Akaroberia na koroisia ebioge biogotagora chinyasi, chitinga chi’okoruta ebioge na ebinto biokoruta omorero amagena nechinsara boigo ebiraasi bi’okorutera amagena. ⅬⅡ Abayahudi nabarabwo boigo bakeroiseria ase oboundi bwabo ebirwanero biokoamererania na biria biababisa. Okorwana okwo gokagenderera ase amatuko amange. ⅬⅢ Korende endagera tiyatigarete ekiagera engaki eyio yarenge omwaka bw’ogotimoka na abanto konye babatameire korwa ase abanto b’ebisaku na kwebisa Yudea konye bakoorire endaagera yonsi yagachire agwo Yudea. ⅬⅣ Endaagera ekabora goika abanto bande bakabetererigwa koirana gochia ase chinka chiabo; bagatigara abanto bake igo ime ase Hekalu. ⅬⅤ Ase ebiro ebio, Filipo oria ochooretwe nomorwoti Antioko buna omorere omwana oye goika obeire omorwoti, ⅬⅥ akairana korwa Perisi na Media. Nigo ere airanete na abarwani esegi b’omorwoti na igo nigo aroberetie kobogoria oborai bweserekari. Ekero Lisia aigwa amang’ana ayio, ⅬⅦ akarua ogochika barue agwo bwango. Akamoteebia omomura oria omosae amo na abanene baye: Kera rituko chinguru chiaito nigo chigendererete gokea. Titobwati endagera etoisaine, na aase aiga ase toonchokananete nakong’u mono. Goetania erio, amang’ana nareo yegeserekari atobetereretie gokora. ⅬⅧ Bono tiga tokore okobwatana na Abayahudi amo negesaku kiabo ekegima. ⅬⅨ Tobaakere buya ase ogotunyana amachiiko na amorokererio abo buna barenge gokora omochakano. Emechaando eye yonsi nigo yachaagete ekero intwe twabachegetie Abayahudi ase okorusia na gotuguta amachiiko, amenario abo. ⅬⅩ Ekerengererio ekio kegancheranwa nomorwoti amo na abanene baye. Erio Lisia akabaa Abayahudi amachiiko y’omorembe, na barabwo bakayancherana. ⅬⅪ Ekero omorwoti na abarai baye banchete koyabwatia amachiiko ayio ase okoria chiira, Abayahudi bakarua ase oborendi bwabo. ⅬⅫ Korende ekero omorwoti asoete ase egetunwa gia Sayoni na korora buna orwaki orwo rwakong’ete, akabuna chiira chiaye echio konye ariire akarua ogochika chinyasi echio chiatananete orwaki chitagorwe. ⅬⅩⅢ Erio agasoka ase obwango akageenda Antiokia. Agwo akamonyora Filipo obogoirie omochie, ere akarwana nere na koyoira omochie bwa Antiokia n’echinguru.