Ⅰ Ekero ebisaku bibebekaine biaigwete buna Abayahudi baagachire egesasiimero kiabo boyia na buna Hekalu yaigoirwe buna yarenge omochakano, bakaberorokwa nekeririanda, Ⅱ bagaetia kobasiria abaibore ba Yakobo abwo bamenyete ase egati yaabo. Erio bagachaaka goita na gosaria chinibo chi’abaanto. Ⅲ Aria Akrabatene, Idumea, basinto be Esau nigo babeete bakobachaanda Abaisraeli. Erio Yuda akabarwania esegi na kobasiria kegima, akabaringania na gosakora chinibo chiabo. Ⅳ Boigo tabeeba basinto ba Baeani abwo bareenge okoirokia na omotego ase Abaisraeli, ase engencho barabwo bareenge kobaboera na kobaumokera Abaisraeli ase chinchera. Ⅴ Yuda akabagitera Ababaeani ime yebiita biabo, akaria eira yokobasiria, agachisamba chimbago chiabo na kobasamba bonsi abwo barenge imeo. Ⅵ Erio akaamboka kobachiera Abaamoni. Akanyora abarwani esegi abaange bare n’echinguru, barenge koragwa na Timotheo. Ⅶ Yuda akabarwania abarwani abwo b’esegi boire; goika akababua chinguru. Ⅷ Akayoira omochie o Yezeri amo ne ebinyoro biaye erio akairana ase omochie o Yudea. Ⅸ Abanto be ebisaku bagasangererekana agwo Gileadi erio babagwere na kobasiria Abaisraeli abwo bamenyete sobo. Korende Abaisraeli bagatama goika ebiita bia Dathema, Ⅹ na komoriikera Yuda amo na abamwabo riruube erio riarenge goteeba: Abanto bebeisaku abwo tobebekaine nabarabwo basangererekanire erio batosirie. Ⅺ Barabwo nigo barobeirie gocha ase twebisete na Timotheo nere okobaraa abarwani esegi baabo. Ⅻ Bono kora bwango ochiche ototoorie ekiagera abanto baito abaange baitirwe. ⅩⅢ Abanto baminto bonsi abwo barenge ase ense ya Tobu baitirwe; ababisa bairire abakungu baabo, abana baabo ne chinibo chiabo na goita abanto goika ekerengo kia 1,000. ⅩⅣ Ekero bagendererete gosoma riruube erio, abatomwa bande, abwo batandorete chiayanga chiabo ase obororo bakarenta amang’ana agwekaine ayio korwa Galili. ⅩⅤ Bagateeba: “Abarwani esegi korwa Tolemai, Turo, Sidoni na orogongo rwonsi rwa Galili nigo basangererekanete erio batosirie.” ⅩⅥ Ekero Yuda amo na abanto baye baigwete amang’ana ayio onsi, bakarangeria omosangererekano omonene erio baetie enchera bagochia kobakoonya abanto bamwabo abwo bachaandegete ase okoumokerwa na ababisa. ⅩⅦ Yuda akamoteebia Simioni momura omwabo: “chora abanto bake korwa ase ore ogeende obatoorie Abayahudi baminto bare Galili, erio inche amo n’oyominto Yoronathani togende Gileadi.” ⅩⅧ Yuda akabitiga ebiombe binde bia abarwani esegi inse yoborai bwa Yosefu omwana o Zakaria na Asaria omorai bwa abanto barende Yudea. ⅩⅨ Ere akabateebia abwo babere: “Barigererie abanto aba korende inwe timwesoyia ase okorwana esegi na abanto b’ebisaku binde goika intwe twairanire.” ⅩⅩ Simioni akabogoria abanto 3,000 na kogenda nabarabwo goika Galili, nere Yuda akageenda na abanto 8,000 ase ensemo yaye. ⅩⅪ Ekero Simioni aigete Galili, akarwana chiseegi na chinyinge na abanto b’ebisaku goika ere akababua ⅩⅫ na kobatunyana goika omochie o Tolemai. Akabaita abanto goika omobaro o 3,000 boigo agasakora chinibo chiabo. ⅩⅩⅢ Erio akababogoria Abayahudi abwo barenge Galili na Aribata amo na abakungu baabo, abana ne chinibo chiabo chionsi, akairana amo nabwo goika Yudea ase ogochenga okonene. ⅩⅩⅣ Ase ebiro ebio Yuda Makabi na Yonathani momura omwabo konye barabwo batambokire orooche rwa Yorodani na goeta erooro ase rituko ria gatato. ⅩⅩⅤ Bakaumerana na abande ba abamenyi ba Ababetea abwo babaariganetie ase omorembe na boigo kobamanyia aria abanyoorete Abayahudi bamwabo agwo Gileadi. ⅩⅩⅥ Ababetea abwo bakabamanyia buna Abayahudi abange nigo barenge abasibwa ase emechie egiteire ya Bozira, Bosori, Alema, Chafuso, Makedi na Karinaimu; emechie emenene n’emeke; ⅩⅩⅦ abande nigo basibire ase emechie emeke emeke ya Gileadi. Boigo bakabateebia buna ababisa beariganetie gochigwera chimbago erio bababwate na kobasiria Abayahudi bonsi ase rituko erimo. ⅩⅩⅧ Kegima Yuda na abarwani baye b’esegi bagekiora na goeta ase echera ye erooro. Bakayogwera na koyoira omochie o Bozira na kobaita abanto bonsi ase omochie oyio bakayosakora na koyosamba omochie oyio. ⅩⅩⅨ Erio bagasooka na gotaara ase obotuko obwo obogima goika bagasoa ase chimbebe chia omochie o Dathema. ⅩⅩⅩ Mambia chuni, Yuda amo na abanto baye bakarora abarwani esegi abange batanyaare kobareka babogoretie chingazi na ebirwanero, baganetie koira ense na kobagwera Abayahudi. ⅩⅩⅪ Ekero Yuda aigwete eriogi na okobuga gwechitarumbeta korwa ime yomochie, akamanya buna esegi yachaakire. ⅩⅩⅫ Erio akabateebia abanto baye: “Tiga torwane esegi reero ase engencho ya Abayahudi baminto!” ⅩⅩⅩⅢ Yuda akaroberia abanto ase ebiombe bitato, bageende motwe ensemo ya magega ya ababisa baabo; bakabugia egetuureri na gosaba ase eriogi rinene. ⅩⅩⅩⅣ Abarwani esegi barenge koragwa na Timotheo bakamanya buna oyio Makabi okobaachera, erio bakaminyoka bagatama bamotang’anere motwe. Yuda akabaita ogoita okonene goika ekerengo kia abanto 8,000 ase rituko erio. ⅩⅩⅩⅤ Erio Yuda akayoonchokera omochie bwa Alema akayogwera na kobaita abanto baye bonsi, agasakora na koyosamba omochie oyio ⅩⅩⅩⅥ Korwa agwo agasuka motwe na akayeira emechie ya Chasifo, Makedi, Bosori na eyende ya Gileadi. ⅩⅩⅩⅦ Magega yayio, Timotheo agasaangereria abarwani esegi bande, akabeeka ekambi ase chinsinyo chia Rafoni ase engegu ya kabere y’orooche. ⅩⅩⅩⅧ Naende Yuda agatoma abanto bande kogenda koroota ekambi eyio ya ababisa. Barabwo bakamoiraneria amang’ana buna abanto bebeisaku binde babwatanire na Timotheo na koroisia ekeombe kia abarwani esegi abange mono. ⅩⅩⅩⅨ Timotheo boigo konye ogorire abarwani esegi ba Abaarabu abwo boigo bebegete ang’e ase ekeng’umbu kiengegu ende yorooche erio bamogwere Yuda. Yuda agasooka kogenda korwana na barabwo. ⅩⅬ Ekero Yuda na abarwani esegi baye baikire ang’e norooche, Timotheo akabateebia abanene baye, “Onye ere kagototang’anera kwamboka orooche, titokonyaara komoiraneria ekero agotogwera ere nigo aratobue. ⅩⅬⅠ Korende ere aise kwoboa na gotenena ekeng’umbu, intwe nigo tokwamboka na komogwera na komobua.” ⅩⅬⅡ Ekero Yuda aigete ase engegu, akabateebia abanene baye: timobaisa gotiga onde atenene; tiga abanto bonsi basoe ase esegi! ⅩⅬⅢ Erio ere akaba omonto bw’eritang’ani kwamboka orooche. Abanto baye bonsi bakamobwatia. Ababisa bagaitwa bobe erio bagatuguta ebirwanero biabo inse na gotama gochia Hekalu yarenge ase omochie o Karinaumu. ⅩⅬⅣ Ekaba Yuda na abanto baye bakayoira omochie oyio, bakeyesamba omorero hekalu eyio na kobasamberania bonsi abwo barenge ime. Karinaimu okairwa na abanto baye tibanyaara naende komotanga Yuda. ⅩⅬⅤ Ere Yuda akabasangereria Abayahudi bonsi barenge Gileadi, korwa abana abake goika abagaaka abagotu, abakungu na abana amo ne chinibo chiabo chionsi; gekaba ekeombe ekenene gekoirana gochia Yudea. ⅩⅬⅥ Bakagenda goika Efuroni. Oyio nomochie orenge omonene naende omokong’u kegima oagaachire enchera ensemo. Tibanyaarete koyoetanana gochia borio gose komosi; ekababetereria goetera gati gati yomochie. ⅩⅬⅦ Korende abamenyi ba Efuroni bakabasiekera Abayahudi isiko na gosieka ebiita bi’omochie na amagena. ⅩⅬⅧ Yuda akabatomera amang’ana agoteeba iga: “Totige intwe toete gati yomochie oino erio toirane gochia seito. Onde taiyo orabamochere inwe. Nigo toraete na kogeenda seito.” Korende barabwo bakaanga koigora ebiita. ⅩⅬⅨ Erio Yuda akabateebia bonsi abwo babwatanetie naabarwani esegi baye batenene ase bare. Ⅼ Erio akabateebia abasikari baye kwearigania ase esegi ase omochie o Efuroni. Ekaba esegi omobaso boira na obotuko bokia goika omochie okairwa na Abayahudi. ⅬⅠ Yuda akabaita abasacha bonsi ba Efuroni ase omoro agataagora omochie na gosakora. Barabwo ere amo na abarwani esegi baye bagaeta gati gati ya amaomo abo bagotacha ebitindo igoro. ⅬⅡ Bakaamboka orooche rwa Yorodani na goika ase ense omweya bosio bwa Beth-sheani. ⅬⅢ Agwo ase enchera Yuda akaba okobabogoria baria konye barosire na kobaa omoyo abanto baye goika ekero baigete Yudea. ⅬⅣ Ase omochengo na okoiraneria buya, bakariina egetunwa gia Sayoni, erio bakarua ebing’wanso biogosaamba ekiagera barabwo bairanete buya batasireti nonya noyomo ase egati yaabo. ⅬⅤ Ekero Yuda na Yonathani barenge Gileadi na ekero Simioni momura omwabo ayogwerete omochie o Tolemai agwo Galili, ⅬⅥ Yosefu na Asaria abanene be esegi abwo batigarete Yudea, bakaigwa amang’ana igoro yoboremu na obobui bwabo. ⅬⅦ Bagateebania: “Tiga naintwe tochaake esegi nebisaku ebi bitoetanaine erio naintwe twenyoorere esiko.” ⅬⅧ Erio bakarua ogochika ase abanto baabo, na barabwo bakayogwera omochie o Yamunia ⅬⅨ Gorgia na abanto baye bagasooka erio bakarwana amo na Abayahudi abwo. ⅬⅩ Abanto ba Gorgia bakababua Asaria na Yosefu na kobamonyokia goika chinsinyo chio omochie o Yudea. Ase rituko erio, bagaita Abaisraeli batari inse yabaanto 2,000. ⅬⅪ Ogosiria okwo nigo kwabanyoorete ase engencho Yosefu na Asaria barigetie benyorere esiko bakanga kobaigwera Yuda na abamura bamwabo. ⅬⅫ Goetania ayio, barabwo tibarenge abeamate ya Makabi abwo konye Omonene achoorete korenta obosibore ase Abaisraeli. ⅬⅩⅢ Yuda Makabi amo na abamura bamwabo nigo basikire mono na Abaisraeli na abanto bonsi be ebisaku binde. Ekero abanto baigwete chinkuma chiabo, ⅬⅩⅣ nigo barenge kobekana amo ase ebiombe ase okobairaneria mbuya mono. ⅬⅩⅤ Erio Yuda, amo na abamura bamwabo bakageenda Irianyi gochia korwania basinto b’Esau. Akagwera Heburoni amo nemechie yabaetanaine, agatagora chinsinyo chiaye na gosamba chinyasi chiaye chionsi. ⅬⅩⅥ Erio akaba oikire ase ense ya Abafilisiti agaetera Marisa. ⅬⅩⅦ Ase rituko erio abakuani batari bake bagaitwa ase esegi ase engencho yogwetakera esiiko y’oboremu ebio biagerete bagaturia esegi. ⅬⅩⅧ Yuda akaonchoka na kogenda Ashidodi ime ya Filisiti. Agwo agataagora ebisasimero biabo, agasaamba emegwekano y’echinyasae chiabo omorero, erio ere akairana gochia ase omochie o Yudea.