Ⅰ Ase chingaki echio Matathia mosinto o Yohana na omoochokoro o Simioni Omokuani bw’ororeria rwa Yoaribu, akarua Yerusalemu akageenda komenya Modeini. Ⅱ Ere narenge na abana abamura batano: Yohana oyio orenge korokwa Gadi, Ⅲ Simioni oyio nainde okorokwa Tasi.

Simioni oyio oreenge korokwa Thasi, Ⅳ Yuda oyio korokwa Makabi, Ⅴ Eleazari oyio oreenge korokwa Avarani, na Yonathani oyio oreenge korokwa Afusi. Ⅵ Ekero Matathia arooche obokaayayu bwakoregete Yudea na Yerusalemu, Ⅶ akarera ogoteeba: “Aye bwandire iga! ’Ninki naiboreretwe goika indore obobe obo bwonsi, abanto baane bagosarigwa, ogosarigwa kwomochie omochenu? Imbe inche bweka aiga ndigereretie bosa igo, ase omochie omochenu okobeekwa ase amaboko ya ababisa ne Hekalu enchenu egotigerwa abamenyi? Ⅷ Hekalu yabeire buna omonto otari ne esiko; Ⅸ Ebibekerero biaye bie erigori biasakoirwe na gosombwa. Abana baye ebing’werere baiteirwe ase chinchera, abasae baye banyenyirwe n’omoro bwa ababisa. Ⅹ Kera egesaku giense kiamenyete ime y’omochie oito na gosakora chinibo chiaito! Ⅺ Ogochaberwa kwaye gwonsi kwarusiigwe na gosambwa; bono nomosomba na tori omochie omosibore naende. Ⅻ Rora bono Hekalu yaito; tebwati obuya gose ogocheneka konde gwonsi, abanto b’ebisaku bayeturutumbire. ⅩⅢ Ninki keragere intwe togenderere komenya?” ⅩⅣ Erio Matathia na abana baye bagatandora chiaanga chiabo, bakeboyia chigunia na korera na amayianda amo no okweumia okonene. ⅩⅤ Erio abateneneri bo omorwoti baria barenge kobabetereria abanto komotiga Omonene, bagaika ase omochie o Modeini kobabetereria abamenyi ba aroro gokora ekengwanso. ⅩⅥ Abaisraeli abange bakabachera abanene abwo, ase egati yabwo, Matathia na abana baye. ⅩⅦ Abanene b’omorwoti bakamoteebia Matathia, “Aye nomorai osikire ase omochie oyo, na nigo okobwatisegwa amo na abana ne eamate yao. ⅩⅧ Ninki keragere aye bono toba omotang’ani goikerania ogochika kwomorwoti? Rora abanto bonsi be ebisaku binde, abanto ba Yudea, na abanto bonsi batigarete Yerusalemu baikire goikerania ayio. Oise goikerania ogochika kwomorwoti, aye amo na abana bao nigo moraegwe esiko enene na korokwa abasani b’omorwoti,’ boigo inwe imoegwe efeta na etaabu amo nebiegwa ebinde ebinge.” ⅩⅨ Matathia akairaneria ase eriogi rinene, “Neisa koba ebisaku bionsi bire inse yoborai bw’omorwoti biaikire koigwera na gokora ogochika kwomorwoti, na igo gotiga ogosasiima kwabo kwomochaakano, ⅩⅩ inche na abana baane amo na bamura baminto nigo toragenderere gotunyana okobwatana ogochenu intwe twakorete n’Omonene oito. ⅩⅪ Ase ogokonywa n’Omonene oito, inwe titokonyaara gotuguta amachiiko aye, gose kobuna amachiiko aye Omonene oito nonya ng’ake. ⅩⅫ Ogochika kwomorwoti titogokobwatia nonya ng’ake, na intwe titokoonchoreria ensemo enke yogosasiima gwaito!” ⅩⅩⅢ Ekero Matathia are ang’e gochia gokoora enkwana yaye, Omoyahudi oyomo korwa ase eamate ya Modeini agesookia na korigia korwa ekeng’wanso igoro ase egesasiimero kiarenge ang’e agwo koreng’ana nogochika kwomorwoti. ⅩⅩⅣ Ekero Matathia amorora, ere agasambwa nobororo na enkoro yaye egaateka. Akanyegerigwa n’obororo akamochiera na komoita agwo agwo igoro ase egesasiimero. ⅩⅩⅤ Akamoita boigo omoteneneri bw’omorwoti oyio orenge kobabetereria abanto korwa ekeng’wanso na agwo akagetagora egesasiimero ekio. ⅩⅩⅥ Ase enchera eyio Matathia agetogeria richiiko, buna boigo Finehasi nere aorogetie ekero amoitete Zimuri mosinto o Salu. ⅩⅩⅦ Erio Matathia agaeta ase egati yomochie ogoaka eriogi: “Kera omonto osigete richiiko ri’Omonene oito na okobwatia okobwatana kwaye ogochenu antunyane!” ⅩⅩⅧ Matathia bweka amo na abamura baye bagatama gochia igoro y’ebitunwa na gotiga bionsi ebio babwate ase omochie oyio. ⅩⅩⅨ Ase ebiro ebio, Abaisraeli bonsi baria barigetie gotunyana esiko yedini na amachiiko abo, bagatirimboka na koagaacha obomenyo bwabo ase chinsana, ⅩⅩⅩ barabwo amo na abana baabo, abakungu baabo, ne chitugo chiabo ase engencho konye ogochaandwa kwabo kwabanyaarire. ⅩⅩⅪ Erio amang’ana akabaikera abateneneri b’omorwoti na abarwani esegi barenge Yerusalemu, Omochie o Daudi buna abanto batatagete koigwera ogochika kwomorwoti batamire na kwebisa erooro. ⅩⅩⅫ Abarwani abange be esegi bakababwatia, bakabanyoora na kwearigania kobaumokera ase rituko ri’Esabato. ⅩⅩⅩⅢ Erio bakabateebia, “Bono aisanire! Soka isiko moikeranie ogochika kw’omorwoti nainwe motorie obogima bwaino.” ⅩⅩⅩⅣ Korende barabwo bakairaneria, “Titogosooka nonya ng’ake! Boigo titokonyaara gokora ogochika kwomorwoti erio tosarie rituko ri’Esabato.” ⅩⅩⅩⅤ Ekaba rimo rioka, ababisa abwo bagachaaka kobaumokera Abayahudi. ⅩⅩⅩⅥ Korende Abayahudi tibairaneria ase okoumokerwa okwo nonya nokoruta rigena gochia ase bare, gose kobatanga tibasoa ase ebiebisero biabo, ⅩⅩⅩⅦ ekiagera bateebaanetie, Intwe tiga tokwe twensi nechinkoro chitari gotogaambia. Erio igoro na ense bienekie ase ribaga riaito buna nigo mogotoita ase enchera etari noboronge bonde bwonsi. ⅩⅩⅩⅧ Ase rituko ri’Esabato, barabwo bagaita abanto 1,000, abasacha na abakungu amo na abana. Bagachisaamba chitugo boigo. ⅩⅩⅩⅨ Ekero Matathia amo na abamura baye baigwete amang’ana ayio, bakabareera mono abamwabo. ⅩⅬ Erio kera omonto agateebia oyomwabo, “Tomochanie tokore buna abaaminto baakorete na totige titwerwanerera korwa ase ababisa baito ase okoegerera obogima bwaito, ase obwango barabwo nigo bagochia gotosiria korwa ase oboiko bw’ense.” ⅩⅬⅠ Gochaakera rituko erio bagaetia ase obomo buna goika berwanerere eisa koba buna onde bwensi obagwereire ase rituko ri’Esabato egere tibacha goitwa bonsi buna abamwabo baitetwe agwo ase bebisete. ⅩⅬⅡ Erio barabwo bagasoa ase ekeombe kia Abahasidi abwo bebegete ang’e ase okorwanerera amachiiko abo naboigo abaremu kegima ase okorwana esegi. ⅩⅬⅢ Ekaba kera omonto orenge kogania gotama korwa ase ogochaandwa, akabwatana ne ekeombe ekio erio kerokio gekagenderera gokiina. ⅩⅬⅣ Erio barabwo bagasangereria abarwani be esegi, na ase ekeririanda bakabagwera Abayahudi abwo batasigete richiiko. Baria baruete monwa bagatama na kwebisa ime ase ebisaku binde. ⅩⅬⅤ Matathia amo na abasani baye bagaeta aa na aaria na gotaagora ebisasimero bie chinyasae, ⅩⅬⅥ na kobaarokia ne chinguru abamura bonsi bare konyoora bataarokiri ime ya Israeli. ⅩⅬⅦ Boigo bakabua kobabeeka biara abateneneri abatwambu b’omorwoti. ⅩⅬⅧ Igo bakayatoria amachiiko a Musa korwa ase chinchera chia abanto be ebisaku binde na omorwoti oye, erio tibamotiga omonyabibe abue. ⅩⅬⅨ Ekero Matathia arooche buna amatuko aye yogokwa abereire ang’e, akabateebia abana baye: Bono endamwamu na amachaaya okire omorero. Echi bono ne chingaki chiogoita na egesiomba ekeroro! Ⅼ Korende, inwe abana baane, goika mwerue ase engencho ya amachiiko na korua obogima bwaino ase engencho yokobwatana ogochenu kwa abagaaka baito. ⅬⅠ Moinyore aria abagaaka baito bakorete ase chingaki chiabo nainwe inamoegwe egutwa yobonene na esiko etakoera. ⅬⅡ Moinyore buna Aburahamu abeete omwegenwa ekero ere ateemetwe, erio agancherwa koba omoigweri. ⅬⅢ Ekero Yusufu arenge ase emechaando, akaigwera amachiiko o Omonene, agakorwa koba omoteneneri bw’ense ya Misiri. ⅬⅣ Sokoro yaito Finehasi, ase engencho yogotaarera aria egenete, nigo arieretwe eira buna abaibori baye inababe abakuhani. ⅬⅤ Yoshua agakorwa koba omogambi ase egesaku kia Abaisraeli ase engencho aigwerete amachiiko. ⅬⅥ Kalebu akarenta amairanerio amaya ase omosangererekano, ere akaegwa ensemo yendemero. ⅬⅦ Daudi ere ase engencho areenge na amaabera, akaegwa ekerogo kiobogaambi getakoera. ⅬⅧ Elija, ase engencho yogotaarera amachiiko kegima, akabogorigwa gochia igoro. ⅬⅨ Hanania, Asaria na Mishaeli bagatoorigwa korwa ase omorero ase engencho barenge abegenwa ase Omonene. ⅬⅩ Danieli nigo arenge omonto omoigweri nere Omonene akamotoria korwa ase omonwa bw’echindo. ⅬⅪ Kera oyomo bwa abagaaka aba baito nomogwekano o maiso marore buna kera oyomo oria omosemeretie Omonene tana koborwa obokoonyi. ⅬⅫ Timoiroka okogosererigwa kwomonto omobe. Moinyore buna ere boigo nakwe na obwerori bwaye bwonsi inabosire boigo omobere oye oguunde na koriegwa na amakonde. ⅬⅩⅢ Nabo eranyaarekane ere atogigwe na koimokererigwa igoro, korende ankio arweo; omobere oye oirane gochia ase orotu na emeroberio yaye eerere ase embeo. ⅬⅩⅣ Korende inwe, abana baane, mwee omoyo, motenene bokong’u ase okobwata amachiiko, ase engencho goetera ase amachiiko inamoegwe obonene n’esiko. ⅬⅩⅤ “Momura omino omonene Simioni nare nechisemi amo n’obong’aini. Igo inwe momoigwere buna mwarenge konyigwera inche iso. ⅬⅩⅥ Yuda Makabi obeire etwoni ase esegi korwa obosae bwaye; ere nabe omoteneneri oino ase esegi, na kobaraa ase okoamererania noria omobisa. ⅬⅩⅦ Onde bwensi oria okobwatia amachiiko, moariganie abwatane nainwe; erio moakane egesiomba ase amabe aria abanto baino bakoreretwe. ⅬⅩⅧ Moakane kera egesaku ase aria babakorerete; naende mobwatie amachiiko ase amatuko onsi.” ⅬⅩⅨ Ekero abasesenirie, Matathia agakwa. ⅬⅩⅩ Ere agatindekwa ase chimbeera chi’echisokoro chiaye aria Modeini na abanto bonsi ba Israeli bakamoreera. Ayio nigo akorekanete ase omwaka o 146.