Ⅰ Yuda, oyio naende omanyekanete buna Makabi akaira ribaga ria ise na Matathia akaba omoteneneri bw’abarwani b’esegi. Ⅱ Abamura bamwabo bonsi amo na ababwatani baabo abegeni bakamoa okoboko, nabarabwo bakebeeka ang’e ase okogendereria esegi ya Abaisraeli. Ⅲ Yuda akamenta obonene bwa abanto baye. Buna etwoni, akeboyia egiekengero kia gekuba, akabogoria ebirwanero na koraa esegi; na ase omoro oye akarenda ekambi yaye. Ⅳ Ere nigo arenge buna endo ase amakora aye, buna endo ensae ekoruma ekero egotwara. Ⅴ Akabarigia akabatunyana abwo barenge gosaria amachiiko; akabasamba n’omorero abwo barenge kounereria abanto baye. Ⅵ Abagosaria amachiiko bagakwa omoyo ase okomoiroka Yuda; ababe bonsi bakaigusigwa na gotutukana; ase amakora aye akarwanerera na goikerania obosibore. Ⅶ Akabageechia abarwoti abange, korende amakora aye akabagokia abanto ba Yakobo; ase ayio ere naimokererigwe igoro kare na kare. Ⅷ Akagenda aa na aaria ase emechie ya Yudea, na kobasiria bonsi baria batamoirogete Omonene; na gotanga Israeli korwa ase endamwamu y’Omonene. Ⅸ Chinkuma chiaye chigasarera goika chinsinyo chionsi chi’ense; akabasangereria bonsi baria konye basirire. Ⅹ Korende Apolonio agasangereria abanto be ebisaku binde, ase egati yabwo ekeombe ekenene korwa Samaria, erio bayegwere Israeli. Ⅺ Ekero Yuda anyoorete amang’ana ayio, agasooka na korwana ne ekeombe ekio; agakebua na komoita Apolonio. Ababisa abange bagaakwa chingoma na abande baabo bagachia bichuko. Ⅻ Ase egati yebisakorwa biatogete, Yuda akaira omoro bwa Apolonio, oyio akorerete emeremo ase amatuko onsi yobogima bwaye. ⅩⅢ Seroni, omoteneneri bwa abarwani esegi ba Siria, akanyoora amang’ana buna Yuda osangereirie abarwani esegi abegenwa baye abwo bebegete ang’e korwana inse yoborai bwaye. ⅩⅣ Erio Seroni agakwana ase omoyo oye, “Inche ninyenyoorere erieta na esiko ase oborwoti obo eisa koba namorwanirie na goita abarwani baye abwo batari abaigweri ase ogochika kwo omorwoti.” ⅩⅤ Erio abarwani abaange ase ekeombe keria getamoirogeti Omonene bakabwatana nere ase okomobwatesia goakana egesiomba ase Abaisraeli. ⅩⅥ Ekero Seroni abaange ne ebitiiro bia Beth-horoni, Yuda akamochiera ore nekeombe kiabarwani egeke. ⅩⅦ Korende ekero abanto ba Yuda barooche abarwani b’ababisa bakobaachera, bakamoteebia Yuda: “Inaki eranyaarekane intwe korwana nekeombe ekenene buna eke kiabarwani ase abarwani baito abake? Tari igo rioka, omobaso omogima intwe titoraria gento na titobwati kende!” ⅩⅧ Yuda akabairaneria, Teri akong’u ase abarwani abake kobua abarwani abange. Ase Omonene gwatanana tikoiyo buna totoorigwe na abanto abange gose bake igo. ⅩⅨ Obobui ase esegi tibiri korengwa na obonge bwa abarwani korende obobui nigo bokorwa igoro. ⅩⅩ Ababisa baito nigo bagotochera nokogosa amo negekuba, nigo basemeretie gosakora chinibo chiaito naende boigo goita abakungu amo na abana baito. ⅩⅪ Korende intwe nigo tokorwana toegerere obogima na amachiiko y’Omonene oito. ⅩⅫ Omonene omonyene nabakoore ababisa baito. “Ase igo inwe timobaisa kobairoka.” ⅩⅩⅢ Erio kegima gakoorire gokwana amang’ana ayio, Yuda amo na abanto baye bakamogwera Seroni na abarwani baye, bakabasegenya. ⅩⅩⅣ Bakababwatia goetera ase ebitirimboko bia Beth-horoni goika omweya. Agwo bagaita abanto 800, na abande bagatama gochia ase ense ya Abafilisiti. ⅩⅩⅤ Magega yayio, abanto be ebisaku binde kera ensemo bagachaaka komoiroka Yuda na abamura bamwabo. ⅩⅩⅥ Chinkuma chia Yuda chikamoikera omorwoti Antioko, na abanto be ebisaku bakaba bagokwana igoro y’obobui bwa Yuda. ⅩⅩⅦ Ekero omorwoti Antioko anyoorete amang’ana ayio, akageechigwa mono. Agachiika abarwani esegi baye bonsi basangererekane na koroisia ekeombe ekenene gieseegi. ⅩⅩⅧ Agataoria chitaabu korwa ase ekegancha kiaye na goakana abarwani abwo eng’eria y’omwaka omogima na kobachiika bebeke ang’e ase mobasokano onde bwensi orabeo. ⅩⅩⅨ Erio akanyoora buna ekegancha kiaye nigo kere bosa na tikeri naende na emonga yechitaabu. Okonyora kwe ebaango konye kwaguure ase engencho ye chiburuburu ne chiseegi echi chiachete ase okoruusi richiiko erio riarenge kogambera abanto korwa emiaka ne emiaka. ⅩⅩⅩ Agasogwa nobwoba buna naborwe chitaabu chiogoakanera emeroberio yokogendereria oborai bwaye, na buna tarenge gochia konyora enchera yokorwa ebiegwa aande onsi igo buna enaretie ekiagera ere nigo arenge omosiboku korua kobua abarwoti bonsi abwo bamotang’anerete. ⅩⅩⅪ Akegosa mono. Omoerio agaetia agende Persia achie gosangereria ebango ase orogongo orwo erio enyorere omosamogoko bwe chibeesa. ⅩⅩⅫ Akamochoora Lisia, omonto omanyekanete korwa ase eamate yomorwoti, ere abe omoteneneri bw’omorwoti ase ensemo eyio yonsi gochaakera orooche rwe Eyufurate goika orobebe rwa Misiri. ⅩⅩⅩⅢ Boigo akamobeka abe omorendi bw’omwana oye Antioko o gatano goika oiranire ere omonyene. ⅩⅩⅩⅣ Akamobeka Lisia abe omorigereria bwe chinchogu chionsi na boigo omoteneneri bw’ekeng’ese ekemo kiabarwani baye be esegi. Boigo akamoa chinkwana chinyikeranu igoro y’amang’ana ere atagete akoreke na mono aria aganetie bakorerwe abamenyi ba Yudea na Yerusalemu. ⅩⅩⅩⅤ Lisia agachiikwa abogorie abarwani esegi babagwere Abayahudi, mono Abayahudi ba Yerusalemu, erio babune chinguru chiabo, babasirie na kobaabusa kegima korwa ase oboiko bw’ense. ⅩⅩⅩⅥ Agachiikwa abaure chindemero chiabo erio chiegwe abamenyi abwo baramenye orogongo orwo rwonsi. ⅩⅩⅩⅦ Erio omorwoti akarua ase omochie oye omonene Antiokia nekeng’ese kiabarwani esegi baye ase omwaka o 147. Akamboka orooche rwa Eyufurate, agaetera ase chingongo chi’ebitunwa. ⅩⅩⅩⅧ Lisia akabachoora Tolemai mosinto o Dorimene, Nikanori na Ggorigia, abanto ebiata ase egati ya abasani b’omorwoti. ⅩⅩⅩⅨ Akabatoma bagende basirie ense ya Yuda buna omorwoti amochiigete. Akabaa abachiiki abwo b’esegi abarwani esegi bagochiera amagoro 40,000, na abagochira chibaarasi 7,000. ⅩⅬ Bonsi bagasooka na kobeka ekambi yabo ang’e ne Emau ase omweya. ⅩⅬⅠ Abaonchoreria benseemo eyio, abwo bang’usetwe n’amang’ana banyoorete kobwatekana na abarwani esegi abwo bakabogoria chitaabu chi’etaabu chinyinge amo nemenyororo bakagenda ase ekambi erio babaire Abaisraeli bachie koba abasomba baabo. Ebiombe bi’abarwani esegi bia Siria na Filisiti boigo bigaacha kobwatana na abarwani abwo. ⅩⅬⅡ Yuda na bamura bamwabo bakarora buna ebinto biagendereire koba ebikong’u. Abarwani esegi ba ababisa konye babeekire ekambi ase ense yaabo. Na omorwoti ochiikire buna barabwo basirigwe kegima. ⅩⅬⅢ Korende barabwo bagateebania, Bono tiga toagaache oboyia egesaku giaito! Torwane toegerere abanto baito na egesasiimero giaito. ⅩⅬⅣ Erio ekeombe ekegima kegasangererekana na kwebeeka ang’e ase esegi ase ogosaba Omonene abakwere mabera na abaabere. ⅩⅬⅤ Omochie o Yerusalemu nigo okamogete buna erooro; tarengeo omomenyi oye ore gosoka gose gosoa omochie. Hekalu nigo yabegetwe ogotacheneka na abageni; abamenyi nigo nabwo bayotenenerete na abanto be ebisaku nabwo bamenyeteo. Omosasoko nigo obarwete abanto ba Yakobo; tikwarengeo okobugigwa gwechisirimbi gose amakano. ⅩⅬⅥ Ekaba abanto ba Yuda bakaumerana na kogenda sobo Mizipa ang’e na Yerusalemu ase engencho ase amatuko a magega, Abaisraeli mbabwate ase bare gosasiimera agwo Mizipa. ⅩⅬⅦ Bakeng’ata ase rituko erio na kweboyia chianga chi’echigunia, bakeaka riibu ase emetwe yaabo na gotandora chianga chiabo. ⅩⅬⅧ Ase amang’ana anga buna ayio, nigo yarenge kobabetereria abanto b’ebisaku korangeria chinyasae chiabo erio chibateebie engencho yaye, korende Abaisraeli bagasokia egetabu kia amachiiko erio banyoore oboseemia korwa ase Omonene. ⅩⅬⅨ Bakarenta emiambaro ya abakuhani, okorua kwe rigesa riogotongora na ensemo ya ikomi. Naende bakarenta baria batakeire bagaikerania ogotakerwa kwabo. Ⅼ Bono omosangererekano bwonsi ogasaba ase eriogi bagoteeba: “Ninki tokobakorera abatakerwa aba? Ng’ai tokobaira bono? ⅬⅠ Hekalu yao yatiringirwe ase obochaayi na kobekwa ogotacheneka, na abakuani bao nigo bakorera ase omoroso. ⅬⅡ Rora bono, abanto b’ebisaku basangererekanire batosirie; naye nomanyete emeroberio eyio emebe bakorire mamincha yaito. ⅬⅢ Inaki intwe toranyare koamererania nabarabwo onye aye togotokoonya?” ⅬⅣ Erio bakabugia rirandi na gokuura neriogi rinene. ⅬⅤ Erio Yuda akabaatanana abanto baye ase ebiombe bia abanto ikomi ikomi, emerongo etano, rigana na elifu elifu. Ere boigo akabeeka kera ekeombe inse y’omorai gete. ⅬⅥ Erio kobwatekana ne richiiko, akabairania gochia inka oria orenge koagacha enyomba, oyo konye onywomire ase obwango obwo, oyo orenge komeria chintetere chi’emesabibu gose oria orenge omwoba. ⅬⅦ Erio abarwani b’esegi ba Yuda bagasooka na kobeeka ekambi isiko ensemo ya Irianyi y’omochie bwe Emau. ⅬⅧ Agwo Yuda akabateebia abanto baye, “Ebeeke ang’e ase esegi! Eremie! Ankio mambia chuni mobe ang’e kobaita abanto aba b’ebisaku binde abwo basangerekanire erio batorwanie na gotosiria intwe twensi amo ne Hekalu yaito. ⅬⅨ Nigo ere buya intwe tokwe ase esegi kobua gotengera ogosambwa kwe egesaku giaito amo ne Hekalu yaito. ⅬⅩ Korende Omonene ere oyio ore igoro nakore buna aganetie omonyene.”