ⅭⅨ
Ekerero ki’omonto ore ase emechando
(Ogoteera gwa Daudi)
Ⅰ Aye Nyasae ningotogie, tobaisa gokira‐kiri.
Ⅱ Abakori amabe abare abang’ainereria nigo bagokwana igoro yane,
ee, nigo bagokwana oborimo igoro yane.
Ⅲ Bang’etananire bagokwana amang’ana y’obobisa,
nigo bakondwania ’ntari na komocha konde.
Ⅳ Nonya inche ’mbanchete, barabwo nigo bangeechete,
ee, nonya ngendererete kobasabera ebisio.
Ⅴ Nigo bakong’akana amabe ase amaya aane
na okogeecha ase obwanchani bwane.
Ⅵ Chora omonto omobe amogambere omobisa one,
na tiga oria omosoeri atenene ase okoboko kwaye gw’okorio amosoere.
Ⅶ Ekero agambiigwe ekiina, tiga abarerwe okomocha,
nonya n’ogosaba kwaye kobarwe ng’a nebibe.
Ⅷ Amatuko aye tiga abe amake,
na oboteneneri bwaye omoao aboire.
Ⅸ Tiga abana baye batigwe bare chintakana,
na omokungu oye atigwe ore omoboraka.
Ⅹ Abana baye babe bakoombogana na kona‐gosaberera,
bageende kona‐korigia endagera aare korwa ase amatuuri bamenyete.
Ⅺ Tiga abamoete ebinto singo bache baire ebinto biaye bionsi;
abanto abaao bache basakore ebi bakorerete emeremo emekong’u.
Ⅻ Monto onde tabaisa koba omuya asare,
gose onde taba n’amaabera ase abana baye bare chintakana.
ⅩⅢ Tiga ororeeria rwaye rosirigwe,
na erieta riaye riebwe kegima ase ekiare gia kabere.
ⅩⅣ Ebibe bie chisokoro chiaye biinyorwe ase obosio bw’Omonene,
na ebibe bia ng’ina tibibaisa gotinyigwa.
ⅩⅤ Ebibe biabo tiga bigenderere kobeera ase obosio Omonene botambe;
na barabwo tibaabaisa koinyorwa ase ense nonya ng’ake.
ⅩⅥ Omonto oyio tainyorete koorokia amaabera,
korende abataka, na abaremerwa, na abasionoire chinkoro chiabo,
nigo abachaandete goika ogokwa kwabo.
ⅩⅦ Ere nigo anchete koragereria,
bono tiga okoragereria okwo komoiranere.
Ere tanchete gosesenia,
ase ayio ogosesenigwa kobe aare asare.
ⅩⅧ Nigo ambarete okoragererigwa buna akwambara egoti yaye;
bono tiga konywere ase omobere oye buna amaache akonywera ase omobere,
na buna amaguta akweakwa akonywera aika ase amauga aye.
ⅩⅨ Tiga okoragererigwa okwo kobe buna egetambaa akwambara,
naende kobe buna orokini akweboeria botambe.
ⅩⅩ Tiga Omonene abaakane igo abwo bagonsoera,
abwo bagokwana bobe igoro y’obogima bwane.
ⅩⅪ Korende aye Nyasae, Omonene one, ondwanerere ase engencho y’erieta riao,
intoorie, ekiagera obwanchani bwao bwa botambe nigo bore obuya.
ⅩⅫ Inche nigo ’nde omotaka oremeire mono,
na nigo ’nde n’obororo ase enkoro yane ime.
ⅩⅩⅢ Nigo ’ngoeta buna omorengari o mogoroba,
nigo nkoirurukigwa buna chingige.
ⅩⅩⅣ Amaru aborirwe chinguru ase engencho y’okweng’ata,
na omobere one oreeire mono.
ⅩⅩⅤ Nabeire omonto ogosekererwa nabansoeri;
ekero bakondora, nigo bagonchaaya basingisia emetwe yaabo.
ⅩⅩⅥ Aye Omonene, Nyasae one, inkonye!
Intoorie, ekiagera aye nigo obwate amaabera amange!
ⅩⅩⅦ Tiga abansoeri abwo bamanye ng’a aya nigo arure ase okoboko kwao.
Aye Omonene, naye gwakorire aya.
ⅩⅩⅧ Barabwo tiga bandagererie, korende aye onsesenie.
Tiga abwo bagonkorera bobe barore obosooku,
korende inche, omosomba oo, nimbe n’omogooko.
ⅩⅩⅨ Tiga abansoeri baboigwe ogochaaywa,
tiga obosooku obwo bobatube buna egetambaa gi’okwambara.
ⅩⅩⅩ Ning’iranerie Omonene ng’a mbuya mono kegima n’omonwa one,
nimbe nkona‐komotogia ase egati y’ abanto abange.
ⅩⅩⅪ Omonene nigo ateneine ensemo y’okoboko gw’okorio kw’omotaka,
ase okomotooria korwa ase abwo bakomonachera ekiina ki’ogokwa.