ⅭⅩⅬⅦ
Ogotogia Nyasae ore Omobui
Ⅰ Motogie Omonene!
Nigo ere buya komoterera Nyasae oito ase okomotogia,
ayio naro amaya mono na atogwenerete.
Ⅱ Omonene naagache Yerusalemu naende,
nasangererie amo Abaisraeli abwo baserebaanetigwe.
Ⅲ Nigo akogwenia abwo chinkoro chiabo chiasionoirwe,
na koboa amaote abo.
Ⅳ Nigo amanyete omobaro bwe ching’enang’eni chionsi;
boigo kera eyemo nigo ayerogete erieta.
Ⅴ Omonene oito nigo are omonene mono,
ne’chinguru chiaye nechinyinge;
obong’aini bwaye tibokorengeka.
Ⅵ Omonene nigo akoimokereria abanto abaitongo igoro,
korende abakori amabe nigo akobaiyeria inse.
Ⅶ Moterere Omonene na komoiraneria ng’a mbuya mono;
bugeria Nyasae oito amakano n’amariogi amaya!
Ⅷ Omonene nigo agotuba igoro n’amare,
bwariganeria ense embura,
nigo akomeria obonyansi ase ebitunwa.
Ⅸ Nere okoa ching’iti chionsi endagera yaabo,
naende orageria amage y’ebigonkoru ekero akorera.
Ⅹ Omonene tagokiri ne’chinguru chi’echibarasi,
gose ase omoayerero bw’omonto,
Ⅺ korende nigo agokirie n’abanto abwo bamoirogete,
abwo basemeretie obwanchani bwaye bogendererete botambe.
Ⅻ Aye Yerusalemu, togia Omonene!
Aye Sayoni, togia Nyasae oo!
ⅩⅢ Ere nigo agokong’ia emekorogoto y’ebiita biaino;
nigo agosesenia abana bamenyete ime yao.
ⅩⅣ Omonene nigo akobeeka omorembe oba ase chimbebe chiao,
naende nigo agoichoria engano ere engiya mono.
ⅩⅤ Nigo agotoma amachiiko aye goocha ase ense,
ne ring’ana riaye riaranda bwango.
ⅩⅥ Ere nigo akorenta amagena y’embura agwekaine amarionya amarabu,
oyasiarera buna agosiara ribu.
ⅩⅦ Nigo agosiarera amagena ayio buna amaemba enkomba.
Ning’o oraremererie obokendu bwaye?
ⅩⅧ Nigo agotoma ring’ana riaye,
na amagena ayio amakendu anyititoke.
Erio ogusia embeo amaache ageenda.
ⅩⅨ Ere nigo akomanyia abanto ba Yakobo ring’ana riaye,
ee, Abaisraeli emeroberio yaye n’amachiiko aye.
ⅩⅩ Omonene tana‐gokorera abanto b’ebisaku binde amang’ana buna ayio,
barabwo tibamanyeti amachiiko aye.
Motogie Omonene!