ⅭⅩⅬⅧ
Ense Yonsi Ekorangerigwa Goocha Gotogia Nyasae
Ⅰ Motogie Omonene!
Motogie Omonene korwa agwo igoro!
Momotogie agwo igoro mono!
Ⅱ Inwe abamalaika baye mwensi, motogie,
nainwe emeganda yaye yonsi, motogie!
Ⅲ Aye risase, na aye omotienyi, motogie,
nainwe ching’enang’eni chionsi chikobara, motogie.
Ⅳ Inwe igoro ya igoro chionsi, motogie
Nainwe amaache are igoro ya igoro, motogie!
Ⅴ Ebinto ebio bionsi tiga bitogie erieta ri’Omonene,
ekiagera nere ochiigete, na ebio bigatongwa.
Ⅵ Omonene obibeekire bigenderere kobao goika kare na kare;
nigo abibeekerete ogochika okwo gotaetanigwe.
Ⅶ Motogie Omonene korwa ase ense,
nainwe ebitongwa bie chinyancha ne chindiba chionsi!
Ⅷ Motogie, inwe omorero na amagena y’embura, na obokeng’entu, na amare,
na aye omwaga omotindi ogoikerania aya achiigete!
Ⅸ Motogie Omonene, inwe ebitunwa na ebigoro bionsi,
nainwe emete ekwama amatunda, na emecharake yonsi,
Ⅹ nainwe ching’iti chi’orosana na echitugire chionsi,
nainwe echikwagura amo ne chinyoni chionsi!
Ⅺ Motogie inwe abarwoti b’ense na abanto bonsi,
nainwe abagaambi na abanachi ebiina mwensi,
Ⅻ nainwe abamura na abaiseke mwensi,
nainwe abanto abagotu na abana.
ⅩⅢ Inwe mwensi, togia erieta ri’Omonene,
ekiagera erieta riaye nario rioka rire rinene rikobakwa;
obonene bwaye nigo boetanaine ense na igoro.
ⅩⅣ Omonene omeririe abanto baye ching’unchara,
erinde abachenu baye bonsi bamotogie;
ee, Abaisraeli abwo bare ang’e nere bamotogie!
Motogie Omonene!