ⅩⅬⅣ
Ogosaba gw’okonyora okorendwa okuya
(Ogoteera kwa basinto ba Kora)
Ⅰ Nyasae, intwe tweigwereire namato aito,
chisokoro chiaito nchiatotebetie
amang’ana gwakorete ase amatuko a kare.
Ⅱ Aye omonyene nigo gwaseretie abanto b’ebisaku nokoboko kwao,
korende chisokoro chiaito okabarenta okabasimeka aroro;
nigo kwarentete emechando ase abanto b’ebisaku,
korende chisokoro chiaito okabamentekania bakaranda.
Ⅲ Abanto bao tibairete ense eria ase okoyerwania nemioro,
gose tari chinguru chi’amaboko abo chiabarenterete obobui,
korende nokoboko kwao gw’okorio ne chinguru chi’amaboko ao,
amo noborabu bwaruete ase obosio bwao,
ekiagera aye nigo kwagogetigwe nabarabwo.
Ⅳ Aye naye omorwoti one, na Nyasae one,
ase ayio, chiika ng’a abanto b’ororeria rwa Yakobo baegwe obobui.
Ⅴ Ase chinguru chiao nigo toraiyerie inse ababisa baito;
goetera ase erieta riao nigo toratiringere inse abwo bagocha gotorwania esegi.
Ⅵ Inche tinsemeretie obota bwane; gose omoro one tong’a obobui.
Ⅶ Korende naye gwatoete obobui igoro y’ababisa baito,
abwo batogechete nigo kwabasoogetie.
Ⅷ Intwe ntogenderere gwetogia asore aye Nyasae,
ntobe tokoiraneria ng’a mbuya mono ase erieta riao kogenderera botambe.
Ⅸ Nonya naboigo gwatotigire na gotosookia,
tori kogenda amo nabarwani baito b’esegi.
Ⅹ Gwatokorire gotama ababisa baito,
na barabwo babeire bagosakora ebinto biaito.
Ⅺ Aye kwarure ribaga toriegwe buna ching’ondi chikoriegwa,
gwatosiareire gochia ase abanto b’ebisaku.
Ⅻ Aye kwaoonirie abanto bao ase rigori risinini mono;
tikwababeekerete rigori rinene.
ⅩⅢ Gwatokorire koba okogechia ase abanto baito;
twabeire togochaywa na gosekererwa nabaanto batoetanaine.
ⅩⅣ Gwatokorire koba omorabaaro ase egati y’abanto b’ebisaku,
twabeire togosingiserigwa emetwe nabaanto.
ⅩⅤ Ogochaywa kwane nigo kogendererete asende omobaso boira,
na obosooku bwatubire obosio bwane
ⅩⅥ ekero nkoigwa amang’ana ’abagonchecheria na gonkwana bobe,
na ekero nkorora obosio bw’omobisa na obw’oyo okorusia egesiomba.
ⅩⅦ Amang’ana aya onsi atonyorire,
nonya intwe titoraba togokweba,
gose titorasaria okobwatana kwao kw’ogotianania.
ⅩⅧ Chinkoro chiaito tichionchogeti chigotige,
gose titotigeti kobwatia enchera yao,
ⅩⅨ erinde otoake na gototuguta ase chisese chi’orosana chimenyete,
gose gototuba ekiriri ki’amakweri.
ⅩⅩ Onye ntwebire erieta ria Nyasae oito,
gose ntwaramboire amaboko aito ase ogosasiima enyasae ende eng’ao.
ⅩⅪ Inee, Nyasae tari komanya amang’ana ayio?
Ere nigo amanyete obobisi bwonsi bore ime ase enkoro.
ⅩⅫ Korende ase engencho yao nigo togoitwa omobaso boira,
nigo tokobarwa buna ching’ondi chikonyenywa.
ⅩⅩⅢ Aye Omonene, boka oimokerere igoro?
Nase ki oraire?
Boka, tototuguta kegima!
ⅩⅩⅣ Nase ki aye kwabisire obosio bwao korwa ase tore?
Nase ki aye kwebire emechando yaito na ogokorerwa bobe gwaito?
ⅩⅩⅤ Amaene, emioyo yaito yaiyerigwe inse ase orotu,
emebere yaito yabwateranigwe inse ase riroba.
ⅩⅩⅥ Imokerera igoro, ochiche otokonye!
Ototoorie ase engencho y’obwanchani bwao bogendererete botambe.