ⅩⅬⅤ
Ogoteera kw’enyangi y’omorwoti
(Ogoteera kw’obwanchani korikire na basinto ba Kora)
Ⅰ Enkoro yane nigo eichire namang’ana amaya,
engero yane nigo ere igoro y’omorwoti;
oromeme rwane nigo rore buna ekaramu y’omoriki omuya.
Ⅱ Aye nigo ore omoseera kobua abanto bonsi;
ebikoba biao nigo bigokwana amang’ana ’obwanchani.
Ase ayio Nyasae ogosesenirie goika kare na kare.
Ⅲ Aye omobui, eboeranie omoyio o birende ase ekenema kiao,
aye nigo ore nobonene na ogosikwa okonene.
Ⅳ Genda bosio nobobui na obonene,!
Okengere ekeene, na obwororo, na oboronge;
na okoboko kwao gw’okorio ngokworokererie amang’ana ’ogokumia.
Ⅴ Emegwe yao nigo ere emioge,
nigo ekobeta chinkoro chi’ababisa bao aye omorwoti
abanto nigo bakogwa inse yao.
Ⅵ Aye Nyasae, ekerogo kiao ki’obonene nigo kegendererete kobao kare na kare.
Enyimbo yao y’oborwoti nigo ere ey’oboronge.
Ⅶ Aye nigo bwanchete oboronge na kogechete ebibe.
Ase ayio, Nyasae, oyore Nyasae oo ogoakire amaguta,
okorenteire omogooko kobua oyo bw’abande bamino.
Ⅷ Chiganchwa chiao nigo chikouboka rimisu ri’amaguta a manemane,
na ay’omogaka, na aya kasia.
Korwa ase chinyomba chichabeire amaino e chinchogu
abanto nigo bakobugia amakano na gokogokia.
Ⅸ Abaiseke b’abarwoti nigo bare amo nabwo bakogokorera ase amasikani;
eting’ana bwechaberete netaabu ekorwa Ofiri,
nigo ateneine ase okoboko kwao gw’okorio.
Ⅹ Aye omoiseke, igwa! Ntegerera mono!
Eba bono abanto baino na ab’enyomba ya iso.
Ⅺ Oboseera bwao mbogere omorwoti agosanere,
ekiagera ere nomonene oo, goika bwekumbe ase obosio bwaye.
Ⅻ Abanto ba Turo, abare abanda mono, nigo barakorentere ebiegwa,
barigie ogwancherwa kwao.
ⅩⅢ Omoiseke bw’omorwoti nigo are ime ase eero yaye ore nobonene,
obegete eganchwa yaye eroiseirie etaabu.
ⅩⅣ Nigo akoirwa ase omorwoti obegete chiganchwa chi’ebieni ao ao,
nigo agotunyanwa nabaiseke abekungi abare abagisangio baye;
bonsi nigo bakoirwa ase omorwoti.
ⅩⅤ Nigo bakoirwa bare nomogooko na omochengo,
erio basoigwa ase enyomba y’omorwoti.
ⅩⅥ Abana bao abamura mbabe ribaga rie chisokoro chiao,
naye nobabeeke babe abagaambi igoro ase ense yonsi.
ⅩⅦ Ninkore erieta riao ribe rikoinyorwa nebiaare bionsi;
ase ayio, abanto b’ebisaku mbabe bakogotogia goika kare na kare.