ⅬⅩⅢ
Amaiga ase okoba na Nyasae
(Ogoteera gwa Daudi ekero arenge ase erooro ya Yuda)
Ⅰ Aye Nyasae, Nyasae one, naye ngotang’ana korigia.
Omoyo one nigo ore nerang’o asore,
na omobere one nigo okoganetie,
ase ense y’eguru‐gura enyomo pa etari namaache.
Ⅱ Nabeire ngokorigia ase Obomenyo Obochenu,
erinde ndore okobua kwao na obonene bwao.
Ⅲ Obwanchani bwao bogendererete botambe
nigo bore obuya kobua obogima,
ase ayio nimbe nkogotogia nomonwa one.
Ⅳ Nimbe nkona‐kogotogia ase obogima bwane bwonsi,
ase erieta riao nindambore amaboko aane gochia igoro.
Ⅴ Omoyo one oisanekire buna oyorire obonoru bw’emeseto na ebitinya,
nimbe nkogotogia nomonwa one ore nebikoba bire nomogooko.
Ⅵ Ekero indaire ase oborere bwane, nigo nkoba nkorengereretie,
ase obotuko obogima ebirengererio biane nigo bikona‐gokoiranerera.
Ⅶ Aye kwabeire botambe ogokonya kwane,
na inse y’ekiiriri gie chimbaaba chiao nintere nomogooko.
Ⅷ Omoyo one nokobwaterere mono,
ekiagera aye nonsiirete nokoboko kwao gw’okorio.
Ⅸ Abanto abwo bakorigia gosiria obogima bwane,
mbagende gochia inse kegima y’ense.
Ⅹ Barabwo nigo bararuegwe baitwe nemioro,
babe endagera ye chisese chi’orosana.
Ⅺ Nonya naboigo omorwoti nabe okogoka ase Nyasae,
na abanto bonsi abagotiana asare mbabe bagwetogia,
korende emenwa y’abanto bagokwana oborimo nekirigwe.