ⅬⅩⅤ
Ogotogia na okoiraneria ng’a mbuya mono
(Ogoteera gwa Daudi)
Ⅰ Aye Nyasae o Sayoni, ogotogigwa nokwao;
goika togoikeranerie chiira chiaito.
Ⅱ Aye nigo okoigwa ogosaba,
ase ayio abanto bonsi mbache asore.
Ⅲ Nonya ebibe biambuire
aye nigo okwabera ogosaria okwo.
Ⅳ Nasesenirie omonto oyio gwachorire na komoikia ang’e,
amenye naye ase chigoora chiao.
Intwe ntoisaneke nobuya bw’enyomba yao,
Hekalu yao Enchenu.
Ⅴ Aye Nyasae ore ogotooreka gwaito,
ase ogokora kw’ogokumia ogotoigwa ase oboronge bwao;
naye ore ogosemeria kw’abaanto bamenyete ase ense,
nonya ngoika chinsinyo chi’ense,
na ase chinyancha chi’aare.
Ⅵ Aye gwakong’irie ebitunwa ne chinguru chiao,
ekiagera aye nigo bweboetie okobua.
Ⅶ Aye nigo ogotoereria enyancha ekoruma, na emerindo yaye,
naboigo namarorooche a Mwanyabaanto.
Ⅷ Abamenyete ase chinsinyo chi’ense
nigo bagokumia ebimanyererio biao.
Abare ase erioba rigosoka korwa
goikera ase rikogwa gochia,
nigo okogera batera nomogooko.
Ⅸ Aye nigo ogwechandera ense, kwayerentera embura,
nigo okoyea obotenenku obonge mono;
chindooche chiao aye Nyasae nigo chiichire namaache.
Ase okoroisia riroba igo
nigo okoa abanto endagera.
Ⅹ Aye nigo okorenta embura ase chinchwara chi’emegondo y’ense;
nigo okwarania aase aimokererete igoro,
erio gwatoma embura yororobia riroba
na gosesenia ebigokina ase emegondo.
Ⅺ Kwabeekeire omwaka egutwa y’obuya bwao,
amabarato ao nigo agotonya obonoru.
Ⅻ Amarisia e chirooro nigo agotonya boigo,
na ebigoro nigo bieboetie omogooko.
ⅩⅢ Ebirubo nigo biichire namaicho e ching’ondi,
na amakura nigo atubire ne chindagera.
Kera egento nigo kegochenga nomogooko.